O campamento "Explora Ourense" 2019 ofrece a nenos e mozos actividades que promoven a riqueza natural e cultural da provincia

  • A Deputación de Ourense organiza este programa, dirixido a nenos de 9 a 14 anos, que se desenvolverá do 1 ao 12 de agosto no complexo turístico do Corgo, en Muíños.

Ourense, 14 de xuño de 2019.- O Campamento da Ourensanía "Explora Ourense" 2019, que organiza a Deputación de Ourense coa colaboración do concello de Muíños e Sustinea, volverá a amosar á mocidade ourensá a riqueza natural e cultural da nosa provincia cun amplo programa de actividades lúdicas e educativas que teñen como elemento común a natureza da Baixa Limia. A presentación desta iniciativa tivo lugar hoxe no centro cultural "Marcos Valcárcel", acto no que participou o presidente da Deputación de Ourense, Manuel Baltar, e o representante de Sustinea, Paulo Vázquez.

O presidente do goberno provincial destacou o éxito desta iniciativa "que afonda na nosa aposta polos máis cativos, sumándose a outras como Pazolandia ou o programa EsquiOU". "O campamento da Ourensanía ofrece aos rapaces, no Corgo, en Muíños, en pleno parque natural da Baixa Limia, a posibilidade de desenvolver actividades en pleno contacto coa natureza", engadiu Baltar.

Neste sentido, o representante de Sustinea salientou, en base á experiencia dos seis anos que levan a desenvolver o campamento, o perfil participantes no mesmo, destacando unha maioritaria procedencia do ámbito rural e cun grande respecto e inquietude pola natureza e o medio ambiente".

O campamento, que está destinado a 50 rapaces da provincia de entre 9 e 14 anos, desenvolverase no complexo turístico do Corgo, en Muíños, en dúas quendas: do 1 ao 6 de agosto ofreceranse 25 prazas para os nenos de entre 12 e 14 anos, e do 7 ao 12 de agosto, outras 25 prazas, para os rapaces de idades comprendidas entre os 9 e os 11 anos. Os interesados en participar poderán solicitar a súa praza desde o 17 ata o 28 de xuño no rexistro da Deputación de Ourense. As follas de solicitude poderán obtelas no rexistro provincial ou na páxina web www.exploraourense.com. O sorteo das prazas realizarase o día 2 de xullo no centro cultural "Marcos Valcárcel", nun acto que estará aberto ao público e que se poderá ver a través da web da Deputación. O prezo de inscrición é de 88 euros.

Este proxecto lúdico e educativo inclúe na súa programación actividades vencelladas coa natureza, o deporte, actividades ao aire libre, xogos, entre outras iniciativas que pretenden "a inmersión na natureza" dos participantes, sinalou Paulo Vázquez.

A Deputación de Ourense destina 224.000 euros a cooperación con concellos en materia de Cultura, Servizos Sociais e Infraestruturas

Ourense, 14 de xuño de 2019.- A Xunta de Goberno da Deputación de Ourense aprobou na reunión celebrada hoxe un total de 224.688 euros para cooperar con concellos da provincia en iniciativas culturais, de servizos sociais e infraestruturas. Así o informou o deputado provincial de Cooperación, Pablo Pérez, quen deu conta hoxe dos acordos adoptados pola dita xunta, correspondentes ao venres 14 de xuño de 2019.

En concreto, aprobouse unha axuda de 20.000 euros á Mancomunidade da Comarca de Verín e outra de 70.000 euros para a Mancomunidade de Municipios da Comarca do Carballiño, co obxectivo colaborar no financiamento das actividades destas entidades no presente ano.

O concello de Xinzo de Limia, pola súa parte, recibirá tres axudas: unha delas por importe de 15.000 euros para colaborar na organización da Festa do Esquecemento 2019, a segunda achega de 4.518 euros permitirá mercar novos instrumentos para o Conservatorio da Música da capital limiá, e a terceira axuda, de 15.170 euros, será para axudar coas obras previstas na pista polideportiva da vila. Tamén se aprobou unha axuda de 100.000 euros para o Concello de Cualedro destinada á reforma da antiga escola, para acometer a segunda fase da Casa Niño, servizo que pretende facilitar a conciliación da vida laboral e familiar dos pais.

Por último, aprobáronse dúas modificacións do Plan provincial de cooperación ás obras e servizos municipais e da rede viaria provincial do exercicio 2019, relativa ao municipio de Vilar de Santos, que incorpora ao plan principal a obra "construción de Fogar Residencia en Vilar de Santos", cun orzamento total de 210.000 euros, sendo a achega da Deputación de 48.000 euros e a achega municipal de 162.000 euros. E, a segunda modificación refírese ao Concello de Melón, que incorpora ao plan principal a obra "carril-bici na N-120 da parroquia de Quins", cun orzamento total de 48.000 euros.

Medalla de ouro da provincia de Ourense, a título póstumo, para o doutor Luis Rodríguez Míguez, "pai" do termalismo contemporáneo

  • Manuel Baltar entregou á viúva e á filla do investigador o máximo galardón que outorga a Deputación de Ourense, destacando do doutor Míguez "as súas importantes achegas na investigación e promoción termal e sobre as augas mineiro medicinais e o seu uso clínico".

  • Baltar salientou que Rodríguez Míguez, "como pai do termalismo moderno, deulle estrutura e sapiencia ao elemento máis característico que nos viste de saúde: a nosa auga termal, deixándonos como agasallo a súa erudición feita practicidade, e esa pegada que só teñen os pioneiros, aqueles que cren no que fan e que o fan porque o cren".

  • O presidente da Deputación cualificou ao termalismo como "sector estratéxico de Ourense", afirmando que a auga que flúe e comunica cos seus fíos invisibles historia, cultura, pobos e xentes, "ten na nosa provincia un manancial de futuro no que todos estamos chamados a mergullarnos, e agora máis que nunca, a piques de experimentar a transformación máis importante que terá Ourense neste século XXI: a chegada da Alta Velocidade".

  • Alejandra Juno Rodríguez, filla do homenaxeado, agradeceu a distinción "pola unanimidade no seu outorgamento e porque recoñece o traballo do meu pai", destacando que este recoñecemento "sela para sempre a relación do doutor Míguez con esta terra, porque el foi un ourensán por convicción e determinación. Esta medalla acredita os seus soños".

Ourense, 13 de xuño de 2019.- A Deputación de Ourense outorgou hoxe a medalla de ouro da provincia, a título póstumo, a Luis Rodríguez Míguez, doutor en Medicina e Cirurxía, e un dos grandes especialistas en termalismo, falecido en 2016. No acto, celebrado no Salón de Plenos do Pazo Provincial, a súa viúva, Mariluz Villar e a súa filla, Alejandra, recibiron de mans do presidente da Deputación de Ourense, Manuel Baltar, a máxima distinción que concede a institución provincial, destacando Baltar "as importantes achegas do doutor Míguez na investigación e promoción termal e sobre as augas mineiro medicinais e o seu uso clínico".

O presidente da Deputación salientou no seu discurso que Rodríguez Míguez, "como pai do termalismo moderno, deulle estrutura e sapiencia ao elemento máis característico que nos viste de saúde: a nosa auga termal, deixándonos como agasallo a súa erudición feita practicidade, e esa pegada que só teñen os pioneiros, aqueles que cren no que fan e que o fan porque o cren", e cualificou ao termalismo como "sector estratéxico de Ourense", afirmando que a auga que flúe e comunica cos seus fíos invisibles historia, cultura, pobos e xentes, "ten na nosa provincia un manancial de futuro no que todos estamos chamados a mergullarnos, e agora máis que nunca, a piques de experimentar a transformación máis importante que terá Ourense neste século XXI: a chegada da Alta Velocidade".

Manuel Baltar expresou que o termalismo no que cría Rodríguez Míguez "é un elemento estratéxico para a competitividade da nosa provincia, un territorio con tradicións e singularidades que debemos seguir impulsando, facendo unha defensa máxima "do noso", de Ourense con maiúsculas, de Ourense como punto de partida, meta e cumio de tantas ilusións e proxectos que están por vir, e que seguirán situándonos no lugar que merecemos na historia como pobo traballador, creativo e emigrante que somos".

O presidente tivo palabras para resaltar "que estamos no limiar da conmemoración do centenario da "Xeración Nós", que terá lugar o vindeiro ano, 2020, no que se cumpre un século da aparición da revista e dunha xeración que alumeou o pensamento político galeguista", e lembrou a Antón Fraguas, recoñecido este ano no Día das Letras Galegas, citando unha frase súa sobre o traballo desenvolvido con modestia e ilusión. "Así foi tamén a vida e a obra de Luis Rodríguez Míguez –destacou Baltar-: un percorrido de ilusión e afecto pola súa terra, polas súas xentes e pola defensa da nosa auga. El traballou modestamente, pero agrandando horizontes e elevando ao carácter científico, e á vez cotián, o noso termalismo".

Pola súa banda, Alejandra Juno Rodríguez, filla do homenaxeado, agradeceu a distinción "pola unanimidade no seu outorgamento e porque recoñece o traballo do meu pai", destacando que este recoñecemento "sela para sempre a relación do doutor Míguez con esta terra, porque el foi un ourensán por convicción e determinación. Esta medalla acredita os seus soños". E en relación ao labor desenvolvido por Rodríguez Míguez no ámbito termal, a súa filla salientou que el "recolleu unha tradición milenaria que se proxecta cara o futuro e que seguirá traendo riqueza á nosa provincia. Así o dicía meu pai, quen demostrou sempre un amor literal por esta terra e pola auga que nace dela".

Desde que en decembro de 2016 o presidente da Deputación de Ourense, Manuel Baltar, asinara a providencia para incoar o expediente para o outorgamento desta distinción, numerosas persoas, asociacións e entidades adheríronse a esta iniciativa que tivo hoxe o seu acto solemne coa entrega da medalla de ouro á familia do doutor Rodríguez Míguez.

A laudatio sobre a figura de Luis Rodríguez Míguez estivo a cargo presidente do Parlamento de Galicia, Miguel Santalices, e do profesor da Universidade de Santiago, Juan Gestal, mentres que a instrutora do expediente de concesión da medalla, Ana Villarino, deu lectura ao acordo plenario de concesión da distinción. Gestal cualificou a Rodríguez Míguez como "a persoa que máis fixo polo termalismo en Galicia nos últimos trinta anos, servindo a Ourense ben e con largueza", e Santalices destacou "a inquietude pola realidade sanitaria da provincia de Ourense que demostrou un home de grandes valores, xusto e rigoroso, que amaba a Ourense. Así era o doutor Míguez".

O acto contou na súa parte musical coa participación do gaiteiro Marco Foxo, quen interpretou ao comezo do acto Ourense ao lonxe, e no remate, o himno oficial da provincia, Ourense no solpor.

Luis Rodríguez Míguez, médico, profesor universitario e escritor, naceu en Santiago de Compostela en 1932 e faleceu en Ourense en febreiro de 2016, logo dunha prolífica traxectoria profesional nos ámbitos da saúde e do termalismo. Licenciado en Medicina e Cirurxía pola Universidade de Santiago, foi membro do Consello Termal Ourensán -órgano que avala o cumprimento do Plan Termal Provincial-, traballou como profesor nas universidades de Santiago e Vigo, foi director do Centro de Sanidade Ambiental de Santiago, xefe provincial de Sanidade de Ourense, director de Saúde da Delegación Territorial de Ourense e director xeral de Saúde Pública, ademais de profesor no Departamento de Bioloxía Funcional e Ciencias da Saúde da Facultade de Ciencias do Campus de Ourense.

Rafa Vilar gaña o XVI Premio "Pura e Dora Vázquez" de Narración

  • O xurado, que deu a coñecer hoxe seu ditame, destaca da obra gañadora, Os outros oficios, que se trata "dun texto excepcional desde o punto de vista literario, con moito coidado da prosa e con relatos que amosan un gran coñecemento da lingua".

Ourense, 12 de xuño de 2019.- O escritor coruñés Rafa Vilar (Cee, 1968), vén de gañar coa obra Os outros oficios (presentada baixo o lema "Clara Z"), o XVI premio de literatura infantil e xuvenil "Pura e Dora Vázquez" na modalidade de narración, dotado con 1.500 euros, que convoca a Deputación de Ourense.

O xurado, que deu a coñecer a súa resolución esta mañá trala reunión mantida no Centro Cultural "Marcos Valcárcel" da Deputación de Ourense, sinalou que a obra galardoada que se trata "dun texto excepcional desde o punto de vista literario, con moito coidado da prosa e con relatos que amosan un gran coñecemento da lingua". Asemade o xurado explicou que se trata dunha obra "con gran potencialidade para públicos moi amplos, de fácil e agradable lectura, ademais de ser didáctica".

Así mesmo, o xurado dixo que na obra Os outros oficios o autor fai "unha galería de retratos que mesturan ben o xogo imaxinativo e adáptase para ser ilustrada". En canto ás obras presentadas ao premio nesta edición, o xurado agradeceu "o traballo feito" por tódolos autores presentados ao certame"

Ábrese agora o prazo para o XVI Premio "Pura e Dora Vázquez" na modalidade de ilustración polo que, os interesados en participar, poderán solicitar a obra premiada de narración a través do correo electrónico This email address is being protected from spambots. You need JavaScript enabled to view it. ou a través do teléfono 988 317790, para o cal a Deputación de Ourense abre a súa convocatoria dende hoxe ata o día 2 de setembro de 2019. A esta modalidade poderán concorrer os ilustradores que presenten os seus traballos, inéditos e orixinais que se axusten ás bases do premio e que tomen como base o texto premiado de Rafa Vilar. A dotación do premio nesta modalidade de ilustración tamén é da mesma contía co de narración de 1.500 euros.

O xurado da XVI edición do Premio "Pura e Dora Vázquez" de narración estivo presidido polo deputado provincial de Cultura, Manuel Doval, e integrado como vogais por José Manuel Fernández, Mario González, Carlos Rodríguez e Isabel Mociño, actuando como secretaria a xefa da sección de Publicacións da Deputación, Ana Malingre.

Rafa Vilar (Cee, 1968). Filólogo e escritor. Vinculado ao asociacionismo cultural de base, foi un dos promotores do Batallón Literario da Costa da Morte e mais da colección de poesía Letras de Cal. Tamén participou na creación da editora dixital Retagarda Edicións. Forma parte da Asociación de Escritores en Lingua Galega (AELG).

Como poeta, publicou unha ducia de libros. Entre outros: A sotavento dunha singradura (1995); Casa ou sombra (1997, premio Cómaros Verdes); Días de sherazade (2000, premio concello de Carral); Escoración dos días (2007, premio Eusebio Lorenzo Baleirón); Migracións (2008, premio Cidade de Ourense); Erosións (2017, premio Victoriano Taibo); A cidade e a chuvia (2019, premio Selic Compostela). Así mesmo, como autor de poesía infantil publicou os libros Acuarelas (2009); Patente de corso (2012, premio Arume de poesía para nenos/as) e Animalario estrafalario (2013).