"Caminos de tierra" promocionará Ourense nunha viaxe por Europa cunha caravana autosostible

  • Manuel Baltar dixo, na presentación deste proxecto, que a Deputación de Ourense "implicada desde o primeiro minuto coa promoción da nosa provincia, viu neste proxecto unha oportunidade para rendibilizar turísticamente Ourense".

  • O proxecto consiste nunha gravación dun documental que narrará a aventura da viaxe que tres mozos farán de Galicia a Galitzia (Polonia) nunha caravana equipada por paneis fotovoltaicos con capacidade para cubrir as necesidades de electricidade.

  • A viaxe levará a tres mozos a percorrer 11 países en 45 días co obxectivo de poñer en valor e deixar testemuña do potencial das enerxías renovables aplicadas ao transporte e do atractivo turístico da provincia de Ourense.

Ourense, 11 de abril de 2019.- O proxecto "Caminos de tierra" inicia hoxe a súa aventura que promocionará Ourense nunha viaxe por Europa cunha caravana autosostible que levará a tres mozos a demostrar o potencial das enerxías renovables e do atractivo turístico da provincia de Ourense, así o explicaron na presentación desta iniciativa, que tivo lugar nos xardíns Padre Feijoo, o presidente da Deputación de Ourense, Manuel Baltar; e o organizador e o coordinador do proxecto, José Quintas e Diego Maraña.

No acto, Manuel Baltar dixo que a Deputación de Ourense "como o mellor axente comercial da provincia, implicada desde o primeiro minuto coa promoción do noso territorio, viu neste proxecto unha oportunidade para rendibilizar turísticamente Ourense nunha experiencia de 45 días e 10.000 quilómetros que vamos a poder seguir en directo e tamén a través do documental no que estes tres ourensáns divulgarán a riqueza turística da nosa provincia".

Esta viaxe promocional comezou hoxe, ao carón do Pazo Provincial, e vai a conectar esta Galicia coa Galitzia polaca, a terra da que era orixinario o Papa Juan Pablo II, entre outros", dixo Manuel Baltar, quen propuxo aos protagonistas desta aventura o reto de que unha vez culminen esta expedición, a Deputación de Ourense "apoiará tamén unha nova excursión medioambiental, sostible e que promocione o mellor da nosa provincia, que conecte o Ourense no que estamos agora co Orense de Bos Aires, outros 10.000 quilómetros, cunha parte por mar que haberá que solventar con barco, pero que alí vos recibirán cos brazos abertos".

Esta iniciativa, impulsada por Pixel Audiovisuais e MundiNova Consultores de Comunicación, consistirá na gravación dun documental que narrará a viaxe de Galicia a Galitzia (Polonia) nunha caravana vintage autosostible. A peculiaridade da caravana desta iniciativa é que se trata dun modelo de 1986, localizada e restaurada polos protagonistas e que está equipada por paneis fotovoltaicos con capacidade para cubrir as necesidades de electricidade da aventura. Ademais a caravana está rotulada con algunhas das imaxe máis representativas de Ourense.

11 países en 45 días

A aventura será protagonizada por tres mozos: José Quintas, Nacho Sola e Andrés Gonzalo, que percorrerán 11 países (España, Francia, Mónaco, Italia, Austria, Hungría, Polonia, República Checa, Alemaña, Países Baixos y Bélxica), en 45 días co obxectivo de poñer en valor e deixar testemuña do potencial das enerxías renovables aplicadas ao transporte e do atractivo turístico da provincia de Ourense, de modo que se vai a promocionar a nosa provincia como destino turístico e termal, así como a Ribeira Sacra, declarada por unanimidade candidata de España a Patrimonio Mundial da UNESCO.

Na presentación desta iniciativa, o coordinador do proxecto destacou "a cooperación de Pixel Audiovisuais e MundiNova Consultores de Comunicación, que aportou un valor diferentes ao que ó principio era unha aventura de tipo persoal". O proxecto "Caminos de Tierra", ao ser xerado en Ourense e que quería poñer en valor a sostibilidade, "involucrouse á Deputación de Ourense para que esta iniciativa fose unha embaixadora máis da provincia e da súa riqueza turística, termal e natural, por toda Europa", engadiu Diego Maraña.

Pola súa parte, José Quintas dixo que o documental, ademais de mostrar o comportamento das fontes renovables aplicadas á caravana, "mostrará tamén a nosa experiencia persoas nesta aventura que se afasta completamente do nosa vida cotiá, percorrendo distintos países nunhas condicións diferentes e interactuando coas persoas que nos atopemos polo camiño como prescriptores de Ourense en Europa".

A viaxe, que comeza hoxe desde Ourense, terá a súa primeira parada na cidade de Madrid, onde mañá venres, os protagonistas desta aventura "Caminos de tierra" serán recibidos pola embaixadora de Poloña en España, Marzena Adamczyk. Tódolos interesados que queira seguir esta viaxe a diario poderán facelo a través das redes sociais: Instagram (www.instagram.com/caminosdetierraeuropa; Facebook (www.facebook.com/Caminosdetierraeuropa); e Twitter (@CaminosTierra).

Javier Fraiz gaña o XXIX Premio "Carracedo" de xornalismo polos seus artigos "en perfecto equilibrio entre literatura e periodismo"

  • O xurado ditaminou outorgar o galardón, que concede a Deputación de Ourense, á súa serie de artigos publicados no xornal Faro de Vigo ao longo de 2018, "un traballo "rompedor" co xornalismo clásico, tratando de igual a igual a escrita literaria e informativa".

  • O premio, dotado con 3.000 euros e diploma, entregarase o vindeiro 3 de maio, Día Internacional da Liberdade de Prensa, nun acto que se celebrará no Salón de Plenos da Deputación de Ourense.

Ourense, 11 de abril de 2018.- O xornalista José Javier López Fraiz (Javier Fraiz) é o gañador do XXIX Premio de Periodismo "Xosé Aurelio Carracedo" que convoca anualmente a Deputación de Ourense. O xurado, reunido hoxe no centro cultural "Marcos Valcárcel", ditaminou outorgar o galardón á súa serie de artigos publicados no xornal Faro de Vigo ao longo de 2018, un traballo cualificado como "rompedor" co xornalismo clásico, "tratando de igual a igual a escrita literaria e informativa nun equilibrio perfecto".

O premio, dotado con 3.000 euros e diploma, entregarase o vindeiro 3 de maio, Día Internacional da Liberdade de Prensa, nun acto que se celebrará no Salón de Plenos da Deputación de Ourense. O certame, que nesta edición chega á súa 29ª convocatoria, foi instaurado para honrar a memoria do xornalista ourensán que lle da nome ao premio, Xosé Aurelio Carracedo, falecido en 1988.

O xurado destaca o alto nivel dos traballos presentados ao certame e valora dos artigos de Javier Fraiz o feito de ser "pezas literarias baseadas na realidade do día a día", salientando "o estilo propio e definido co que as executa, o que se aprecia de maneira constante en todos os artigos". Así mesmo, subliña "os bos desenlaces" dos artigos e a circunstancia de que acheguen "datos e información, arroupados por unha escrita literaria; unha perfecta conxugación entre o literario e o xornalístico".

Na acta, o xurado fai constar ademais, e dado que na vindeira edición de 2020 o premio cumpre o seu trinta aniversario, a proposta de impulsar unha especial e maior relevancia na próxima convocatoria e de organizar actividades con motivo desas tres décadas do premio que poñan en valor a figura de Xosé Aurelio Carracedo traendo á actualidade o que supuxo humana e profesionalmente este senlleiro xornalista ourensán.

O xurado, presidido polo deputado provincial de Cultura, Manuel Doval Soto, estivo integrado por Xosé Ramón Pousa Estévez, decano da Facultade de Ciencias da Comunicación de Santiago de Compostela; Xulia Campo Vázquez, vicepresidenta da Asociación de Xornalistas de Santiago, en representación da Federación de Asociacións de Periodistas de España (FAPE) e Xosé Manuel Rubín Carballo, xornalista, en representación do Colexio Profesional de Xornalistas de Galicia, actuando como secretario o responsable de Comunicación da Deputación de Ourense, Fernando Rodríguez Méndez.

Javier Fraiz (Ourense, 1986) é licenciado en Xornalismo pola Universidade de Santiago de Compostela (USC). Traballa desde 2009 na edición ourensá de Faro de Vigo. Ten colaborado con Onda Cero, Radio Nacional de España (RNE) e a axencia EFE. Durante dous anos foi cronista musical, especializado en jazz e música independente, para Son Estrella Galicia e o ciclo de jazz 1906.

Francisco Rodríguez analiza "A España Soberanista", na "I Semana Ourensá de Análise Política"

Ourense, 10 de abril de 2019.- O político e mestre Francisco Rodríguez analizou hoxe na antiga Biblioteca do Pazo Provincial, a temática de "A España Soberanista", dentro da "I Semana Ourensá de Análise Política", un ciclo de conferencias que organiza a Deputación de Ourense e a Fundación Castelao centrado nas visións e perspectivas da organización territorial do Estado. Francisco Rodríguez Sánchez, ademais de mestre, é autor dun importante número de estudos, ensaios e investigacións relacionados coa realidade galega e a súa bibliografía tamén contén estudos documentados sobre autores fundamentais da nosa literatura.

Mañá xoves, 11 de abril, someterase a análise "O caso catalán", da man do catedrático de Historia Contemporánea da Universidade de Santiago de Compostela, Ramón Villares.

Presentación do spot da "Ruta do Viño do Ribeiro"

  • No acto, celebrado no centro cultural "Marcos Valcárcel", Manuel Baltar dixo que "se algo ten o Ribeiro, entre o moito que posúe, é futuro, que depende de todos: institucións, empresas, colleiteiros e emprendedores, para seguir potenciándoo con iniciativas como a que hoxe presentamos, este spot, que contribuirá a difundir as excelencias do Ribeiro".

  • Juan Manuel Casares salientou que O Camiño do Viño "ten como obxectivo "promocionar os recursos do noso territorio, utilizando o viño do Ribeiro e a riqueza da nosa historia como fíos condutores dunha estratexia dirixida a facer máis atractiva esta comarca vitivinícola".

Ourense, 19 de abril de 2019.- O Centro Cultural "Marcos Valcárcel" acolleu esta mañá a presentación do spot publicitario "O camiño do viño. Ruta do viño do Ribeiro", unha iniciativa enmarcada nas actividades que impulsan conxuntamente a asociación "Ruta do viño do Ribeiro", a Deputación de Ourense, o Consello Regulador da denominación de Orixe Ribeiro e o Xeodestino O Ribeiro-Carballiño, para potenciar o territorio histórico do Ribeiro.

O acto contou coa participación do presidente do goberno provincial, Manuel Baltar; o presidente da asociación "Ruta do Viño do Ribeiro" e do Consello Regulador da Denominación de Orixe Ribeiro, Juan Manuel Casares; e o presidente do xeodestino O Ribeiro-Carballiño, Francisco José Fernández, e no que estiveron presentes alcaldes e outros representantes institucionais dos concellos desta comarca.

Baltar destacou que falar de viño en Ourense "é falar de termalismo, de patrimonio, de territorio e de turismo, e hoxe vemos os primeiros froitos da cooperación conxunta iniciada hai unhas semanas entre as catro entidades que participamos nesta iniciativa, e que ten como obxectivo a aposta pola visualización do enoturismo nunha comarca fundamental da provincia de Ourense, como é a do Ribeiro", expresou o presidente, quen remarcou que pronto estaremos a pouco máis de dúas horas de Madrid, coa chegada da Alta Velocidade, o que nos abrirá un mundo de oportunidades, e preparar a provincia para ese momento histórico é a nosa obriga".

O presidente do goberno provincial lembrou que o Ribeiro "é a segunda denominación de orixe máis antiga de España" e destacou que foi a primeira da que se pode falar de internacionalización, porque os seus viños foron pioneiros na chegada, daquela, ao novo continente". "Uns viños cunha pegada histórica que ninguén pode negar, e se algo ten o Ribeiro, entre as moitas cousas que posúe, é futuro, que depende de todos: institucións, empresas, colleiteiros e emprendedores, para seguir potenciándoo con iniciativas como a que hoxe presentamos, este spot en versión longa e curta, que contribuirá a difundir as excelencias do Ribeiro", dixo Baltar.

Pola súa banda, Juan Casares expresou que O Camiño do Viño ten como obxectivos "promocionar os recursos do noso territorio, utilizando o viño do Ribeiro e a riqueza da nosa historia como fíos condutores dunha estratexia dirixida a facer máis atractiva esta comarca vitivinícola, e tamén espertar a memoria de Galicia respecto do Ribeiro e poñer en valor todo un rico patrimonio material e inmaterial que forma parte do acerbo histórico de Ourense e Galicia".

Na mesma liña, Francisco José Fernández salientou que "o spot que hoxe presentamos é a primeira acción que desenvolvemos neste ambicioso proxecto do que nos sentimos orgullosos polo que supón de difusión dos máis grandes valores da comarca do Ribeiro".

O enlace do spot estará dispoñible a partir de hoxe na web: http://rutadelvinoribeiro.com/

Outras actividades que se van desenvolver neste ámbito durante o ano 2019 serán unha campaña promocional nas redes sociais apoiada na edición de folletos e vídeos da Ruta do Viño do Ribeiro, e unha presentación en Santiago da Ruta do Viño do Ribeiro, O Camiño do Viño, na simbólica Porta de Mazarelos, lugar histórico de entrada do produto a Compostela.

Asemade, unha misión inversa de xornalistas e escritores especializados daralle unha dimensión nacional á estratexia, e unhas xornadas históricas sobre a Cultura do Viño en colaboración coa Asociación de Amigos e Amigas do Museo Etnolóxico e do Conxunto Histórico de Ribadavia tentarán sentar os alicerces históricos e culturais do Ribeiro. Finalmente, a Asociación Ruta do Viño do Ribeiro celebrará no mes de xuño a VIII edición da Xornada de Portas abertas das Rutas do Viño de Galicia.