O Centro Cultural "Marcos Valcárcel" acolle a exposición "Sombra natural", do pintor Juan Carlos Román

  • A mostra, que será inaugurada mañá venres ás 20.00 horas, poderá visitarse ata o día 15 de agosto.

Ourense, 21 de xuño de 2018.- O Centro Cultural "Marcos Valcárcel" da Deputación de Ourense acolle unha nova mostra de pintura nas súas instalacións, "Sombra natural", do artista Juan Carlos Román. A exposición foi presentada hoxe polo vicepresidente da Deputación de Ourense, Rosendo Fernández; o director do Centro Cultural, Francisco González; o comisario da mostra, Ángel Cerviño; e o propio artista.

O vicepresidente da Deputación de Ourense explicou que a mostra exposta no Centro Cultural é "unha selección dos últimos quince anos na produción do artista Juan Carlos Román" e que presenta "unha montaxe distinta á habitual". Neste mesmo senso, o comisario da mostra explicou que a aposta por esta montaxe "é idea do propio artista e responde á intención de recrear eses grandes museos como o Louvre, cunha mostra na que o pintor rende homenaxe á gran pintura española de tódolos tempos".

Francisco González destacou a "satisfacción de poder acoller neste centro traballos relevantes da plástica ourensana, galega e nacional". "Sombra natural" pretende facer un retrato imaxinario español, nela amósanse pinturas, debuxos e colaxes que definen o carácter discursivo do artista, onde mantén ese carácter crítico, irónica e ás veces, incisivo nas súas imaxes e pensamentos. Así, o comisario da mostra lembra que a obra de Juan Carlos Román "hai que pasala polo filtro da ironía, da retranca", mentres que, o artista destacou que con esta mostra pretende demostrar que "ser un pintor figurativo implica unha carga relixiosa e ética".

A mostra, que será inaugurada mañá venres ás 20.00 horas, poderá visitarse ata o día 15 de agosto.

"Presente e futuro dos servizos municipais: a dimensión óptima", tema do II Congreso Red Localis

Ourense, 21 de xuño de 2018.- O vicepresidente da Deputación de Ourense, Rosendo Fernández, inaugurou hoxe no Centro Cultural "Marcos Valcárcel" o II Congreso Red Locais, que nesta edición centra o debate no "Presente e futuro dos servizos municipais: a dimensión óptima", durante os días 21 e 22 de xuño. O Congreso, cun variado programa de relatorios e mesas redondas sobre esta cuestión, está dirixido a técnicos da administración local de toda España.

Sendeirismo, música e gastronomía no "Xurés Walking Festival"

  • O evento terá lugar do 18 ao 22 de xullo na Reserva da Biosfera Transfronteiriza Gerês-Xurés.

Ourense, 21 de xuño de 2018.- O primeiro Festival de Sendeirismo do Xurés, o "Xurés Walking Festival", ofrecerá do 18 ao 22 de xullo, na Reserva da Biosfera Transfronteiriza Gerês-Xurés, un completo programa de actividades que mestura sendeirismo, música e gastronomía. A presentación desta iniciativa tivo lugar hoxe no Pazo Provincial, acto no que participou o vicepresidente da Deputación de Ourense, Rosendo Fernández; o concelleiro de Turismo de Muíños, Israel León Rodríguez; a alcaldesa de Lobios e os alcaldes de Bande e Lobeira, Mª Carmen Yáñez, Jose Antonio Armada e Antonio Iglesias; e as organizadoras, Marta Delgado e Ana Canal.

O vicepresidente da Deputación de Ourense explicou que este evento fusiona "natureza e historia para ofrecer unha gran alternativa de ocio: camiñar por vías romanas, visitar a Igrexa visigótica do s. VII, ou adentrarse na historia do megalitismo, dos castrexos ou das mouras da mitoloxía galega". Pola súa parte, Mª Carmen Yáñez destacou, en nome dos concellos colaboradores (Muíños, Lobeira, Lobios, Entrimo, Calvos de Randín e Bande), "o apoio a este tipo de iniciativas privadas que completan a oferta cultural e deportiva que estamos a levar a cabo entre todos nós, porque traballamos de maneira coordinada na dinamización da Baixa Limia e do Xurés". Asemade, a alcaldesa de Lobios dixo que este evento con "atractivo gastronómico e natural, redunda no beneficio, dinamización e difusión do noso territorio", e salientou a inclusión no programa do evento de rutas deseñadas para familias que permiten que "pais e fillos gocen da natureza e fagan deporte xuntos".

O Festival ofrece un total de 19 rutas de diferente duración (día completo ou medio día) e outras delas están dirixidas a familias e aos máis cativos adaptadas as súas idades e deseñadas para mesturar a formación medioambiental co goce da natureza. Así mesmo, tódolos días haberá un espazo infantil aberto para os máis cativos. Por último, as rutas complétanse coa celebración de veladas tódalas noites onde os participantes poderán degustar unha cea a base de produtos típicos da zona amenizada con música tradicional en concerto.

Marta Delgado explicou que o obxectivo deste evento é "mostrar e poñer en valor a nosa terra a través de rutas, da música e da gastronomía, dando un impulso á zona do Xurés", e salientou que este proxecto "engloba a toda a comarca e permite mostrar tódolos nosos atractivos patrimoniais e naturais, o potencial turístico e histórico desta zona, nesta edición e nas vindeiras". Os interesados en participar poderán inscribirse, tal e como dixo Ana Canal, a través do correo electrónico This email address is being protected from spambots. You need JavaScript enabled to view it. , ou a través dos números de teléfono: 617.164.082 ou 696.760.910.

A comisión de Cooperación abordará a redución de tarifas do aparcadoiro do hospital

  • Prevese que os novos prezos entren en vigor a partires do 1 de xullo.

Ourense, 20 de xuño de 2018.- A comisión informativa de Cooperación, Infraestruturas e Medio rural da Deputación de Ourense tratará hoxe o tema das tarifas dos aparcadoiro anexo ao Hospital "Santa María Nai" de Ourense. Na reunión analizouse a aprobación da modificación do contrato de concesión para a explotación do estacionamento para vehículos en terreos anexos ao dito centro hospitalario, que tería efectos a partires 1 de xullo de 2018 no que atinxe ás tarifas do servizo que serían as seguintes: primeiros 30 minutos (0,00 €/minuto), seguintes 30 minutos (0,025 €/minuto) e o resto do tempo (0,020 €/minuto), o que supón unha importante redución das tarifas xerais actuais. E tamén se propoñen tarifas especiais para bonos que van dos 4 días ao mes, para bonos de empregados no CHUOU, para residentes ou por horas. Para a redución das tarifas proponse unha redución do canon a 26.375,50 € anuais a partir de 2019, e a 37.819,13 euros para o ano 2018.

Por outra banda, a comisión informativa de Transparencia e Administración Provincial abordará a aprobación inicial da Relación de Postos de Traballo do persoal da Deputación de Ourense, conforme co documento aprobado na Mesa Xeral de Negociación do pasado 6 de xuño. A súa aprobación definitiva determinará a obriga de incorporar as súas previsión nos orzamentos da Deputación para o exercicio 2019.

Outro dos temas a abordar nesta reunión será a aprobación inicial do Plan de Ordenación de Recursos Humanos 2018, complementario á RPT da Deputación de Ourense.

Por último nas xuntanzas de hoxe, a comisión informativas Especial de Contas e de Facenda e Economía abordará o expediente nº 2/2018 para a modificación de créditos nos vixentes orzamentos da Deputación, que ascende á cifra total de 296.235 euros.

Na xornada de mañá xoves, 21 de xuño, será a quenda para as comisións de Termalismo, Cultura e Igualdade. Na comisión de Cultura, Deportes e Mocidade abordarase o nomeamento do xurado da XV edición do Premio de Narración e Ilustración "Pura e Dora Vázquez" de literatura infantil e xuvenil, que estaría integrado por: José Manuel Fernández López (proposto polo grupo Popular), Carlos Rodríguez Calvo (proposto polo grupo do PSdeG-PSOE), Mario González Sánchez (proposto polo grupo de Democracia Ourensana), e Xosé Manuel Cid Fernández (proposto polo grupo do BNG).