Manuel Baltar recoñece o labor de CD Ourense nesta tempada

O presidente da Deputación de Ourense, Manuel Baltar, reuniuse hoxe no Pazo Provincial co presidente do Club Deportivo Ourense, Alejandro Estévez, e co delegado, capitán e directivos do club para amosarlle o seu apoio e recoñecer o labor desenvuelto pola entidade deportiva nesta tempada que ven de rematar, na cal acadaron a permanencia da categoría. A reunión, celebrada a instancias da Deputación de Ourense, pon de manifesto, en palabras de Manuel Baltar "que non só hai que acordarse de CD Ourense cando ascende, senón que temos que amosarlle o noso apoio institucional en todo momento, e agora é un momento acaído de facelo, ao conseguir manterse na 2ªB". Baltar remarcou que a Deputación de Ourense seguirá mantendo o apoio ao club "por ser un dos grandes embaixadores da provincia de Ourense".

 

 

Visita dunha delegación do Festival Basel Tattoo de Suiza

O presidente da Deputación de Ourense, Manuel Baltar, recibiu hoxe no Pazo Provincial a unha delegación da organización do Basel Tattoo 2014, presidida por Erik Julliard. Os organizadores do espectáculo convidaron á Real Banda de Gaitas, composta por 120 compoñentes, a participar no espectáculo Internacional que se celebrará na cidade suiza de Basel do 14 ao 26 de Xullo 2014. Será a primeira vez que participará unha formación de España neste espectáculo internacional que, baixo o patronato da Swiss Armed Forces, ven realizándose dende 2008, participando anualmente máis de medio millón de espectadores e agrupacións artísticas de 50 países. Os organizadores pretenden dar unha relevancia especial á Real Banda de Gaitas tendo en conta a súa dimensión internacional, polo que será seleccionada música tradicional de Galicia para as actuacións conxuntas, segundo afirmou o director da Real Banda, Xosé Lois Foxo.

Remata o prazo de solicitudes para o programa de Termalismo Saudable 2013

Mañá venres 7 de xuño remata o prazo de presentación de solicitudes para o Programa de Termalismo Saudable 2013 da Deputación de Ourense. Os usuarios que queiran beneficiarse deste programa poden presentar a súa solicitude a través da plataforma informática http://termalismo.depourense.es, ben de xeito particular ou ben acudindo aos departamentos de servizos sociais dos concellos da provincia de Ourense ou á Área de Benestar da Deputación de Ourense.

O Programa Termalismo Saudable 2013 inclúe dúas modalidades, a primeira contempla estancias de 6 días /5 noites en establecementos balnearios da provincia en habitación dobre en réxime de pensión completa, cun exame médico inicial para adaptar os tratamentos termais ás características de cada persoa. A segunda modalidade consiste en dez técnicas balnearias, sen estancia no establecemento, en quendas de cinco días consecutivos e a revisión médica previa. Os establecementos balnearios nos que poderán realizarse os programas son: Balneario- Hotel Baños de Molgas, Gran Balneario do Carballiño, Balneario Arnoia Caldaria, Balneario Laias Caldaria e Balneario Lobios Caldaria.

Os requisitos que teñen que cumprir os interesados son: ter máis de 50 anos, estar empadroados nalgún concello da provincia de Ourense, non padecer ningunha enfermidade que o impida para unha convivencia normal nos balnearios, así como ter capacidade para as actividades da vida diaria. De todos modos, cabe recordar, que as persoas que non cumpran estes requisitos poderán beneficiarse sempre e cando formulen a solicitude como acompañante de alguén que si cumpra os requisitos esixidos.

Baltar avoga por unha "economía verde" na presentación da Rede ourensá de municipios cara á sostibilidade

  • A Deputación de Ourense é a primeira de Galicia que lidera esta iniciativa medioambiental a prol do desenvolvemento sostible dos concellos, por medio da cooperación e o consenso político e social.

  • 22 concellos adhírense na primeira fase ao chamado "Pacto dos alcaldes", que ten como obxectivo promover iniciativas para levar a cabo "comportamentos ambientais exemplares" e cumprir a Axenda 21.

  • O programa enmárcase no Plan OURENSE 92 e ten a finalidade de converter á provincia de Ourense nun exemplo de coordinación municipal no que atinxe ao medio ambiente.

O presidente da Deputación de Ourense, Manuel Baltar, dixo hoxe, Día Mundial do Medio Ambiente, na presentación da "Rede ourensá de municipios cara á sostibilidade" que é necesario "desenvolver iniciativas que favorezan unha "economía verde" para facer máis eficientes o uso dos recursos medioambientais nos nosos concellos". Baltar destacou que a Deputación de Ourense é a primeira de Galicia que lidera unha iniciativa medioambiental "en rede" a prol do desenvolvemento sostible dos concellos, "por medio da cooperación e do consenso político e social, o que permitirá abordar os problemas do medio ambiente de maneira conxunta e con máis eficiencia e aforro, pensando exclusivamente no benestar dos cidadáns do presente e do futuro".

No acto de hoxe, que supón a primeira fase do programa, 22 concellos da provincia de Ourense asinaron o denominado "Pacto dos alcaldes", baseado na Carta de Aalborg, que ten como obxectivo promover iniciativas para levar a cabo "comportamentos ambientais exemplares" e cumprir a Axenda 21. Desta maneira, os concellos adheridos á rede comprométense a cooperar en políticas medioambientais, optimizar gastos en consumo enerxético e xestión de auga e de residuos e impulsar a xestión integral do desenvolvemento económico, social e cultural, sempre da man dunha "cooperación sostible".

O programa enmárcase no Plan OURENSE 92 e ten a finalidade de converter á provincia de Ourense nun exemplo de coordinación municipal no que atinxe ao medio ambiente. "A clave está –en opinión de Manuel Baltar- na participación activa da comunidade, cun alto nivel de cooperación interinstitucional".

"Goberno ambiental"

O presidente da Deputación defende un "goberno ambiental", transversal e interactivo, ligado a temas prioritarios como o ciclo da auga, a biodiversidade, o cambio climático, o uso do chan e a degradación da terra, para que os concellos sexan tamén "concellos ambientais".

Esa "economía verde" que propugna Baltar, como eixo que favorecerá a competitividade medioambiental, pasa pola eficiencia dos recursos "e será socialmente inclusiva, é dicir, non será unha moda pasaxeira senón que temos a obriga de que sexa o mellor sinal de identidade para o crecemento económico sostible da nosa sociedade".

Os concellos que figuran adheridos ao "Pacto dos alcaldes" son: A Bola, A Gudiña, A Merca, Baltar, Cartelle, Calvos de Randín, Celanova, Gomesende, O Barco, Os Blancos, O Carballiño, Pontedeva, Porqueira, Quintela de Leirado, Rairiz de Veiga, Ramirás, Sandiás, Sarreaus, Trasmiras, Vilar de Santos, Xinzo de Limia e Verea, aos que próximamente se irán sumando máis municipios da provincia.

O acto de hoxe, no que tamén se presentou o "Observatorio da sostibilidade do medio ambiente", tivo lugar no Centro Cultural "Marcos Valcárcel" da Deputación de Ourense, no que o presidente provincial estivo acompañado polo director da Área de Medio Ambiente, Javier Bobe, e pola xefa da sección de Xestión Natural da Deputación de Ourense, María Sabas.

A "Rede ourensá de municipios cara á sostibilidade" agrupa aos concellos da provincia que avogan polo desenvolvemento sostible. É o punto de encontro para a realización de accións comúns e o intercambio de información e experiencias, propiciando un espazo para a reflexión e o diálogo aberto entre representantes da administración, técnicos e cidadáns da provincia de Ourense.

A finalidade tamén é coñecer os condicionantes, problemas e potencialidades da provincia a través da diagnose do territorio, o que permitirá establecer accións de desenvolvemento económico, cohesión social e eficiencia ambiental.

Este proxecto consta de dúas fases, unha primeira "Etapa provincial- intermunicipal" que abrangue os vindeiros dous anos e que pretende sentar as bases para compartir e optimizar recursos e levar a cabo proxectos intermunicipais. E unha "Etapa local", na que se realizarán as "Axendas 21 locais" dos concellos adscritos á Rede.

Campañas e concurso escolar

A campaña contará có apoio técnico do Servizo de Augas e Medio Ambiente da Deputación de Ourense na realización das "A21", e có compromiso das administracións locais e provinciais, que foi ratificado no pleno de febreiro pasado coa sinatura da "Carta de Aalborg", e co "Pacto dos alcaldes", asinado hoxe. Ámbolos dous documentos recollen os compromisos institucionais en materia de sostibilidade e eficiencia enerxética.

A Deputación de Ourense, ademais de dar a coñecer á cidadanía a importancia de integrar a sostibilidade no desenvolvemento provincial, porá en marcha campañas de comunicación para facer partícipes aos veciños dos concellos das accións que se van a levar a cabo, como campañas divulgativas medioambientais, enquisas, obradoiros e foros de debate, así como un concurso escolar sobre a Axenda 21, que se convocará en setembro, co inicio do curso, no que participarán alumnos dos colexios ubicados nos concellos adscritos ao pacto.