A colección "Andante" trae a 200 artistas ao Centro Cultural da Deputación

A colección de arte contemporánea "Andante", promovida polo arquitecto Ramón Alvarez, trae ao Centro Cultural "Marcos Valcárcel" da Deputación de Ourense a máis de 200 artistas de ámbito galego, nacional e internacional. O proxecto naceu hai tres anos, cando o promotor empezou a enviar formas de zapato a artistas co reto de ver se eran capaces de convertelas nunha peza de arte. E así foron xurdindo retos creativos aos que cada pintor, escultor, fotografo ou deseñador se enfrontou dunha maneira particular, creando unha colección que é "un universo plural" onde xa se superaron as 500 pezas.

Tanto o promotor coma o director do Centro Cultural, Francisco González, coincidiron en sinalar que esta colección pode ser un elemento de dinamización cultural para a cidade de Ourense pola gran presenza de artistas doutros lugares e tamén un elemento de difusión de Galicia e a súa creatividade alí onde se leve".

O deputado provincial de cultura, Avelino García Ferradal, felicitou ao impulsor desta colección polo gran traballo desenvolvido e pola súa implicación a prol da cultura, engadindo o apoio que a Deputación presta de maneira permanente a este sector.

"Andante" ten viaxado por diferentes lugares de Galicia, León, Ponferrada e ten proxectos para viaxar a Estados Unidos e Xapón, entre outros lugares.

Na exposición están representados escultores como Acisclo Manzano, Paco Pestana, Alvaro de la Vega ou Manolo Paz; pintores como Alfonso Abelenda ou Quintana Martelo, fotografos como Vari Caramés, deseñadores como Roberto Verinno, etc.

Esta exposición poderá verse ata o 24 de xuño no Centro Cultural "Marcos Valcárcel".

"Raigame" converte un ano máis a Vilanova dos Infantes na capital etnográfica de Galicia

  • O evento, declarado "Festa de Interese Turístico de Galicia", é unha homenaxe aos oficios tradicionais galegos e premia a entidades que traballan na defensa das tradicións galegas.
  • A Deputación de Ourense colabora dende o seu inicio "con este parque temático cultural do noso", como o definiu hoxe Manuel Baltar no acto de presentación.

Cada 17 de maio, Día das Letras Galegas, a vila de Vilanova dos Infantes (Celanova) "convértese na capital cultural e etnográfica de Galicia, un verdadeiro parque temático interactivo do noso, que pon en valor as tradicións da nosa terra". Así definiu hoxe o presidente da Deputación de Ourense, Manuel Baltar, a celebración da romaría etnográfica máis importante das que se celebran en Galicia, "Raigame", que este ano chega a súa 12ª edición, co apoio da institución provincial.

Esta celebración de exaltación das tradicións, declarada "Festa de Interese Turístico de Galicia", reúne cada ano ao redor da torre e do burgo medieval de Vilanova dos Infantes a milleiros de persoas que se achegan "para realizar a súa particular viaxe no tempo, que nos permite lembrar pero tamén potenciar as tradicións dos gremios e artesáns galegos doutros tempos, e tamén fornecer a nosa cultura con maiúsculas, integrada polo noso idioma e a nosa etnografía", explicou Baltar.

O acto de presentación tivo lugar no Centro Cultural "Marcos Valcarcel" da Deputación de Ourense, e contou coa presenza, ademais do presidente provincial, do alcalde de Celanova, José Luis Ferro; da directora do Centro de Cultural Popular "Xaquín Lorenzo", Mariló Fernández Senra, e do profesor Xosé Manuel Cid.

A celebración da Romaría Etnográfica "Raigame" enmárcase dentro do proxecto de posta en valor do núcleo medieval de Vilanova dos Infantes, como un elemento máis do potencial turístico-cutural que oferta Celanova dentro do programa "Celanova, un paseo pola historia de Galicia", que pretende dar a coñecer os momentos máis importantes da historia de Galicia a través dun curto percorrido xeográfico, pero dun gran salto a través da historia, como son o mundo castrexo de Castromao, a etapa alto-medieval de San Miguel a riqueza baixo-medieval de Vilanova dos Infantes, o esplendor do barroco do Mosteiro de San Rosendo e o rexurdimento da lingua galega da Casa dos Poetas.

"Raigame" consolídase dende o ano 2002 como un certame festivo-artesanal no que se pretende destacar as singularidades e características que conserva o pobo de Vilanova dos Infantes e, por extensión, toda Galicia. As numerosas actividades que se desenvolven abranguen teatro e monicreques, música, e ambientación polas rúas, ao que se engaden bailes populares, xogos, contacontos, artesanía, exposicións e un concurso de fotografía.

O circo, protagonista este ano

Nesta XII edición "Raigame" rende homenaxe a Secundino Feijoo, fundador do Circo Feijoo a finais do século XIX, e o Padre Silva, creador do Circo dos Muchachos a mediados do século XX, veciños ámbolos dous de Vilanova dos Infantes, que levaron o nome de Ourense por todo o mundo cos seus espectáculos circenses.

Preséntase tamén o premio honorífico "Xoan de Barros", que nesta edición se entregará a título póstumo ao antropólogo Xosé Antón Fidalgo Santamariña. O premio recoñece a persoas ou colectivos o traballo e a colaboración na promoción e actividades da romaría, así como os valores etnográficos que "Raigame" pretende exaltar.

O traballo que Fidalgo Santamariña realizou sobre a parroquia de Vilanova dos Infantes foi clave para o desenvolvemento da realidade etnográfica e cultural que hoxe é "Raigame", coa que cada ano os ourensáns celebran o Día das Letras Galegas. Co gallo da entrega do premio Xoan de Barros presentarase tamén o libro de actas do congreso "Os camiños de Santiago: miradas e experiencias", congreso no que participou tamén Xosé Antón Fidalgo Santamariña.

A Deputación de Ourense pon en marcha un programa europeo para fomentar o emprego no sector socio-sanitario

  • Na primeira fase do proxecto, presentado hoxe por Manuel Baltar, participan 150 demandantes de emprego, que percibirán durante catro meses un salario de formación de 400 €.
  • O presuposto do programa ascende a 2,5 millóns de euros, cofinanciados polo Fondo Social Europeo.

O presidente da Deputación de Ourense, Manuel Baltar, presentou hoxe o programa "Innova Emprego", unha iniciativa promovida pola institución provincial que ten como obxectivo fomentar a creación de emprego no sector socio-sanitario na provincia de Ourense. Nas primeiras accións do programa participarán un total de 150 demandantes de emprego –maioritariamente mulleres-, que percibirán durante catro meses un salario mensual de 400 euros, o 75% do IPREM, o máximo permitido polo Fondo Social Europeo Este período divídese en dous meses para actividades formativas e dous meses de prácticas.

O orzamento co que conta este programa é de 2.478.935 euros, cofinanciado polo Fondo Social Europeo dentro do Programa Operativo "Adaptabilidade e Emprego". É un dos 59 proxectos aprobados para España co obxectivo de facilitar a inserción socio-laboral a demandantes de emprego a través de programas mixtos de formación e inserción laboral.

No acto de presentación, Manuel Baltar estivo acompañado do director da Área de Benestar da Deputación de Ourense, José Juan Cerdeira, e da adxunta á dirección desta área, Montserrat Rodríguez.

Este proxecto de políticas activas de emprego da Deputación de Ourense considera diferentes itinerarios de cualificación laboral, cada un deles nun ámbito de actividade e dirixidos a colectivos moi diferentes que van dende mulleres desempregadas e sen cualificación ata mozos/as licenciados/as universitarios/as en situación de desemprego. Os colectivos identificados como potenciais beneficiarios para a cualificación e recualificación profesional para o emprego foron determinados por presentar índices de desemprego altos dentro da provincia de Ourense.

Perfís de alta demanda laboral

Para a súa implantación, a Deputación de Ourense ten divido a provincia en catro áreas e 11 zonas denominadas "zonas de actuación", que estruturan o territorio provincial en atención a criterios de poboación e distancia. O obxectivo é que toda a provincia se beneficie dos diferentes itinerarios de cualificación profesional no interese de achegar as oportunidades ás persoas e facilitar a súa participación en proxectos de políticas activas de emprego. Esta semana dará comezo un dos itinerarios de cualificación profesional do proxecto: Atención socio-sanitaria a persoas dependentes en institucións sociais. En cada zona seleccionáronse os participantes a través das oficinas do Servizo Público de Emprego correspondentes.

Tres mil horas de formación

O programa é mixto, pois abrangue formación e inserción laboral, polo que as persoas participantes terán a posibilidade durante catro meses de adquirir formación e experiencia laboral nun ámbito de traballo no que existe demanda de recursos humanos na provincia de Ourense. Para iso, complementarase a formación teórica, impartida por docentes cualificados nas distintas materias, coa inmersión laboral. A fase teórica terá unha duración de dous meses, contando con 105 expertos docentes que desenvolverán 3.025 horas de formación especializada.

Debido á maior taxa de desemprego e a menor taxa de actividade que presenta na provincia de Ourense o colectivo feminino, este ten acceso prioritario ao proxecto, e só no caso de non se cubrir as prazas por mulleres nalgunha acción formativa podería ter acceso o colectivo masculino. Das 150 prazas, un 37% dos participantes son maiores de 45 anos, e en canto ao nivel formativo, un 61% teñen un nivel formativo equivalente á educación primaria ou inferior. En termo de permanencia no paro, un 27% levan menos de 6 meses, un 28% entre 6 meses e un ano, o 45% levan máis dun ano.

Cooperación empresarial

A Deputación de Ourense deseñou unha cualificación laboral no que ten especial importancia o período de inmersión laboral en empresas. Para iso, establecéronse convenios con empresas do sector de actividade do coidado de persoas en situación de dependencia, que veñen traballando nas distintas zonas de actuación do proxecto, para colaborar nesta fase.

Trátase de que as persoas participantes teñan un coñecemento real do traballo a desenvolver e a posibilidade de poñer en práctica os coñecementos adquiridos baixo a tutela e guía dos seus formadores e dos coordinadores das diferentes empresas. Esta inmersión tamén permite ás empresas coñecer a formación coa que contan estas persoas e comprobar as súas habilidades laborais, converténdose nunha ponte entre o traballador e o potencial empresario que, unha vez finalizada a formación, poida materializarse nunha relación laboral.

Salario de formación

O proxecto previuse para que conte con todos os elementos necesarios para incentivar os participantes e xerar un ámbito análogo ao laboral. Neste sentido, un dos elementos máis substanciais é o dereito que adquiren as persoas seleccionadas a percibir, durante todo o tempo que dure a formación, o chamado "Salario de Formación": mensualmente e cunha sistemática semellante a unha nómina, cada persoa recibirá o equivalente ao 75% do IPREM, 400 €, o máximo permitido polo Fondo Social Europeo.

Para a implantación do proxecto, a Deputación ten divido a provincia de Ourense en catro áreas e 11 zonas denominadas "zonas de actuación", que estruturan o territorio en atención a criterios de poboación e distancia. O obxectivo é que toda a provincia se beneficie dos diferentes itinerarios de cualificación profesional no interese de achegar as oportunidades ás persoas e facilitar a súa participación en proxectos de políticas activas de emprego.

Esta semana dará comezo un dos itinerarios de cualificación profesional do proxecto: Atención socio-sanitaria a persoas dependentes en institucións sociais. En cada zona seleccionáronse os participantes a través das oficinas do Servizo Público de Emprego correspondentes.

 

130 atletas participan na III Copa Deputación de Ourense de Triatlón e no campionato galego

Un total de 130 atletas participarán o vindeiro 12 de maio na III Copa Deputación de Ourense de Triatlón e no Campionato Galego desta especialidade, que se disputarán nos municipios de Avión, Castrelo de Miño e Leiro. Hoxe tivo lugar na sala de xuntas do Pazo Provincial a presentación deste evento, coa presenza de Francisco Villanueva, presidente da Federación Galega de Triatlón; Antonio Montero, alcalde de Avión; Maribel Rodríguez, concelleira de Deportes de Castrelo de Miño; o asesor de Deportes da Deputación de Ourense, Bernardino González, e representantes do club organizador, Beariz Triatlón.

A proba, denominada Aviaman, está considerada como unha das máis duras de España polos grandes desniveis acumulados cos que conta no seu percorrido, a subida a tres portos e rampas de ata o 30%. Percorre os citados concellos atravesando paisaxes e viñedos, "o que lle engade a esta competición deportiva un interese de promoción turística para a comarca, segundo afirmou Bernardino González.