Reunión do Padroado da UNED na Deputación de Ourense e acto de inicio do curso 2013-2014

  • Na xuntanza analizouse a organización académica do curso 2013-2014, a aprobación da conta xeral e do presuposto para 2014, así como a memoria académica.

  • Posteriormente tivo lugar o acto de apertura do curso académico 2013-2014, no Centro Cultural "Marcos Valcárcel"

Na sala de xuntas do Pazo Provincial tivo lugar a reunión do Padroado do Consorcio do Centro Asociado da UNED en Ourense, presidida polo titular da institución provincial e presidente do consorcio, Manuel Baltar. Na xuntanza analizáronse temas orzamentarios e de organización académica, entre os que figuraron o informe do director do centro, a aprobación da memoria académica do curso 2012-2013, a organización académica do curso 2013-2014 e a aprobación do orzamento para o ano 2014.

Na reunión participaron, ademais de Manuel Baltar, o director da UNED en Ourense, Jesús de Juana, e o vicerreitor de Profesorado e Ordenación Académica, Ignacio Zúñiga, xunto a outros membros do padroado.

Posteriormente, no salón de actos do Centro Cultural "Marcos Valcárcel" tivo lugar a apertura do curso académico da UNED en Ourense 2013-2014.

O Centro asociado da UNED en Ourense cumpre este curso 21 anos de funcionamento en Ourense, posibilitando o acceso a estudos superiores a persoas que doutro xeito non poderían conseguilo, ben por razón de renda, de residencia ou por calquera outra dificultade.

A UNED, a maior universidade de España, conta cunha oferta educativa que abrangue 26 títulos de grao, e ofrece unha segunda oportunidade a persoas que no seu momento non puideron acceder á ensinanza superior convencional.

Deputación de Ourense e Inorde reúnense cos representantes de ADEGAL para informarlles do proxecto "Regenera Limia"

  • Na xuntanza, Manuel Baltar e José Manuel Rodríguez analizaron cos representantes de ADEGAL a iniciativa dun sistema para a xestión de abonos e fertilizantes.

  • A acción, que será realizada polo Centro de Desenvolvemento Agrogandeiro, enmárcase no proxecto "Regenera Limia" para reducir a contaminación das augas do río Limia.

O presidente da Deputación de Ourense, Manuel Baltar, e o xerente do Inorde, José Manuel Rodríguez, xunto co director da Área de Medio Ambiente da institución provincial, Javier Bobe, reuníronse hoxe en Xinzo con representantes da Asociación de Empresarios, Gandeiros e Agricultores da Limia (ADEGAL) para informarlles do proxecto "Regenera Limia" e facelos partícipes dos obxectivos do mesmo co fin de poder contar coas súas achegas e opinións que permitan fornecer a candidatura do proxecto ao "Programa Life", co que se pretende reducir a contaminación das augas do río Limia.

Dentro deste proxecto, a Deputación de Ourense implementará na Limia, a través do Centro de Desenvolvemento Agrogandeiro, pertencente ao Inorde, un sistema de control integrado de xestión de fertilizantes e abonos en solos agrarios, que se levará a cabo en dez parcelas piloto e se poderá ampliar posteriormente ao resto de explotacións agrarias, iniciativa da que foron informados hoxe os membros de ADEGAL.

Manuel Baltar considera fundamental que neste proxecto ,"exista a máxima colaboración entre entidades públicas e privadas, cooperación e asociacionismo que chegan mesmo ao ámbito supranacional como xa se puxo de manifesto hai unhas semanas na presentación oficial do proxecto".

Ademais, desta importante achega para a xestión de fertilizantes e abonos, a Deputación de Ourense elaborará un mapa de solos e cede unha parcela de 6.000 metros cadrados para investigar sobre o tratamento de purines.

Baltar destacou a "perfecta sintonía" desta iniciativa cos programas que ven desenvolvendo a Deputación de Ourense, entre os que figuran a adhesión á Carta das cidades cara a sostibilidade -Carta de Aalborg-, ou a posta en marcha da Rede de Municipios e do Observatorio cara á Sostibilidade na provincia de Ourense. "Poñer en valor o medio ambiente fai que sexamos un "goberno ambiental implicado e preocupado ao máximo polo noso ben natural", afirmou Baltar.

As 23 accións que inclúe o proxecto "Regenera Limia" teñen como obxectivo mellorar o río Limia e a súa contorna, atallando cuestións como as cianobacterias que teñen afectado tanto a Alta como a Baixa Limia, con especial incidencia no encoro das Conchas.

"Regenera Limia" está promovido e coordinado pola Confederación Hidrogáfica Miño-Sil nunha comarca, A Limia, a máis importante de Galicia en canto ao sector agrogandeiro e de alto aproveitamento agrario. Trátase de mellorar a xestión medioambiental nos terreos agrarios e optimizar o uso de fertilizantes, ademais de investigar alternativas á xestión de purines e reducir a contaminación por nutrintes nas augas, todo elo acompañado dun apartado de formación e información ao cidadán. O orzamento global do proxecto é de 2.248.434 euros.

Convenio entre a Confederación Hidrográfica e o Concello de Xinzo para melloras fluviais no río Limia

  • O acordo foi asinado polo presidente de la CHMS, Francisco Marín, e o alcalde de Xinzo de Limia, Antonio Pérez, acompañados polo presidente da Deputación de Ourense, Manuel Baltar, o delegado do Goberno, Samuel Juárez, entre outras autoridades.

O presidente da Confederación Hidrográfica Miño-Sil, Francisco Marín, e o alcalde de Xinzo de Limia, Antonio Perez, asinaron hoxe no Concello de Xinzo un convenio de colaboración entre ámbalas dúas entidades por medio do cal o Ministerio de Agricultura, Alimentación e Medio Ambiente investirá 837.347 euros nas obras de mellora do dominio público hidráulico e da capacidade de desaugamento do río Limia.

As actuacións previstas contemplan a demolición da actual pasarela peonil de acceso ás piscinas, actualmente en desuso, e a construción dunha nova pasarela, ademais da ampliación da ponte de O Bouzo para permitir o paso simultáneo de dous vehículos e mellorar a seguridade vial.

O acto contou ademais coa presenza do presidente da Deputación de Ourense, Manuel Baltar; o delegado do Goberno en Galicia, Samuel Juárez, o subdelegado do Goberno en Ourense, Roberto Castro, e o delegado da Xunta en Ourense, Rogelio Martínez, entre outras autoridades.

Estas actuacións están incluídas no programa operativo de financiamento con cargo aos Fondos FEDER, que a Confederación Hidrográfica do Miño-Sil ten deseñado dentro do período 2007-2013, y que contan coa participación e o apoio cidadán das poboacións implicadas, para levar a cabo actuacións para a mellora medioambiental do entorno dos ríos.

O proxecto contempla o acondicionamento e posta en valor do río Limia mellorando a súa capacidade como elemento canalizador da drenaxe natural, e a integración deste dentro da trama urbana na que ten lugar a actuación. Os traballos consistirán na limpeza e desbrozamento selectivo da vexetación de ribeira, eliminando as especies invasoras e con mal estado fitosanitario. Por outra banda, levaranse a cabo labores de restauración de marxes e taludes debilitados, empregando para elo técnicas de bio-enxeñería e revexetación.

O proxecto tamén contempla a construción dunha nova pasarela peonil de metal, xa que a existente atópase en moi mal estado e supoón un risco para os peons. Ademais, ampliarase a ponte do Bouzo e faranse obras de mellora na contorna da EDAR municipal e na zona do Mato. As actuacións realizaranse nun prazo aproximado de 12 meses.

Ferrín recibe o premio Otero Pedrayo, "un galardón que leva o nome de quen marcou a miña vida coa súa palabra"

  • O acto de entrega, presidido polo titular da Deputación de Ourense, Manuel Baltar, tivo lugar no Centro Cultural "Marcos Valcárcel".

  • O xurado do premio, que conceden as deputacións galegas co apoio da Xunta, recoñece en Méndez Ferrín "a traxectoria dun dos grandes intelectuais galegos contemporáneos".

O escritor e intelectual galego, Xosé Luís Méndez Ferrín, recibiu hoxe en Ourense, a súa cidade natal, o Premio Otero Pedrayo, nun acto que tivo lugar no Centro Cultural "Marcos Valcárcel" da Deputación de Ourense, presidido polo titular da institución ourensá, Manuel Baltar, e que contou coa presenza do secretario xeral de Cultura da Xunta de Galicia, Anxo Lorenzo.

O xurado do premio -que conceden as catro deputacións galegas co apoio da Xunta de Galicia-, recoñece en Méndez Ferrín "a traxectoria dun dos grandes intelectuais galegos contemporáneos", e destaca as súa achegas "nos eidos da docencia, da literatura, do xornalismo, na difusión exterior da literatura galega (foi candidato ao Nobel pola literatura galega), e no eido da política e do seu compromiso coa clase traballadora".

O acto solemne da entrega do premio arrancou coas palabras de Don Ramón Otero Pedrayo no discurso pronunciado en 1959 diante da colectividade galega en Bos Aires, para, de seguido, dar paso a entrega do premio e ao discurso do galardonado, quen agradeceu o recoñecemento afirmando que lle enche de satisfacción "recibir un premio que leva o nome dun mestre, autoridade ética e patriota que me orientou na mocidade e cuxa palabra marcou toda a miña vida". No seu discurso, Méndez Ferrín fixo un percorrido polo Ourense histórico e cultural, "cuxo progreso –dixo- naceu ao carón da estrada de Madrid e coa chegada do ferrocarril; un Ourense comercial, proletario, mercantilista e que tivo unha sinalada actividade financeira autónoma".

Ferrín lembrou ao seu Ourense e á súa vila de Vilanova dos Infantes como "os modelos literarios que configuraron a súa vida como escritor", e do premio dixo sentir "unha fonda honra" por ser o máis importante do país, "aínda que hai moitas e moitos que o poderían recibir con máis méritos ca min", para rematar dedicándolle o premio a súa familia, a súa dona, aos camaradas e amigos vivos e mortos, especialmente a Otero Pedrayo, "porque os que perdimos alentan a nosa memoria".

Pola súa banda, Manuel Baltar tivo palabras de lembranza para Otero Pedrayo e de gavanza para Méndez Ferrín, destacando que asistimos a un acto "de honra e xusto recoñecemento e mais tamén de fonda e trascendente significación", cualificando a Otero Pedrayo e a Méndez Ferrín como "dous dos principais cabezaleiros da Galicia contemporánea, activos impulsores das súas xeracións e caracterizados polo talento e o patriotismo; pola ansia permanente de engrandecer a nosa terra".

Baltar subliñou "o paralelismo ético, intelectual e de compromiso coa causa de Galicia" de Ferrín e Otero Pedrayo, "respectados tamén polas xeracións actuais ás que, se mo permitides, eu chamo "Xeración Vós", por ser protagonista e responsable do noso futuro neste ámbito común de todos que é o sentimento de Ourensanía".

Anxo Lorenzo, secretario xeral de Cultural, destacou o "maxisterio exemplar de Otero Pedrayo e o compromiso de Méndez Ferrín, dúas figuras da nosa literatura", e estendeu tamén o galardón "ás persoas que fan posible o avance da cultura galega, foco de enerxía e piar da nosa identidade".

A proposta do galardón desta edición –a número 36ª deste premio- , foi realizada polo presidente da Deputación de Ourense, Manuel Baltar, e referendada polo xurado, que cualificou a obra de Méndez Ferrín como "culta e con vocación universalista, que incorpora diferentes tradicións e bebe en fontes varias: dende a canteira popular aos modelos clásicos e as vangardas".

O Premio Otero Pedrayo é un premio honorífico que conceden dende 1977 as deputacións provinciais de Galicia, co apoio da Xunta de Galicia. O premio é de carácter rotatorio e nesta edición correspondeulle a súa organización á Deputación de Ourense. O xurado deste ano estivo integrado por representantes da Xunta de Galicia, das catro deputacións galegas, das tres universidades galegas, un representante da RAG, outro do Instituto Padre Sarmiento, ademais de cinco persoas independentes designadas pola Xunta, de solvencia científica e literaria.