Norberto López Amado, Premio Ourense do 24º OUFF

  • Manuel Baltar comunicoulle a concesión deste galardón que recoñece o labor do director ourensán, vencellado historicamente ao Ourense Film Festival, e que dirixirá a serie "3Camiños".

  • A serie da produtora galega Ficción Produccións, apoiada pola Xunta e Xacobeo 2021, gravarase desde finais deste ano.

Ourense, 9 de agosto de 2019.- O Premio Ourense, un dos máis arraigados na historia do Ourense Film Festival, será na 24ª edición, organizada pola Deputación de Ourense, para o director ourensán Norberto López Amado que, desde finais deste ano, dirixirá a serie "3Camiños", apoiada pola Xunta de Galicia e Xacobeo 2021, que será gravada por varios países pola produtora galega Ficción Produccións.

O presidente da Deputación de Ourense, Manuel Baltar, comunicoulle directamente ao premiado a concesión deste galardón que vén a recoñecer o seu labor e a súa traxectoria. Baltar dixo que López Amado é "un ourensán que acredita a súa condición polo traballo e creatividade que atesoura. É un magnífico exemplo da relevante achega que se pode facer desde Ourense ao sector audiovisual e é un fantástico aliado para o OUFF e o seu futuro".

O Premio Ourense foi na edición anterior para o actor Luis Tosar, e entre os galardoados en edicións anteriores están os directores Luis Gª. Berlanga, Enrique Urbizu e Emilio Martínez Lázaro, ademais dos actores José Sacristán, Imanol Arias e Emilio Gutiérrez Caba. Igualmente foron recoñecidas en anteriores edicións do festival as actrices Lola Dueñas, Mercedes Sampietro, a directora Pilar Miró e a escritora Elvira Lindo.

Norberto López Amado

Norberto López Amado naceu en 1965 en Ourense. É director e produtor, tanto de cinema como de televisión, coñecido por longametraxes como "Nos miran" (2002), series de TV como "El tiempo entre costuras" (2013) ou documentais como "¿Cuánto pesa su edificio, Sr. Foster?" (2010). Estudou a carreira de Dereito e mentres a cursaba, aprendía cinema no Taller de Artes Imaxinarias. Empezou a traballar na Axencia EFE na área de televisión e aí tomou o seu primeiro contacto co sector audiovisual. Os seus comezos no cinema foron realizando curtametraxes, que ao principio financiaba co seu soldo ou pedindo créditos. "El espíritu de la Luna" (1994), a súa primeira curta, acadou un gran éxito. Pero o seu gran lanzamento foi a longametraxe "Nos miran", protagonizado por Carmelo Gómez e Iciar Bollaín.

A continuación comezaría unha brillantísima carreira en televisión participando en numerosas series de éxito. Filmou capítulos para "El comisario", "El internado" ou "Herederos". En 2010 fixo unha paréntese na televisión para dirixir o documental "¿Cuánto pesa su edificio, Sr. Foster?", premiado en varios festivais de todo o mundo. Volvería a televisión asinando capítulos para "Tierra de lobos" (2010-2011) e "Las aventuras do capitán Alatriste" (2013). A continuación chegarían dúas das series de máis éxito "El tiempo entre costuras" (2013-2014) e "El príncipe" (2014), das cales filmou sete capítulos en total.

En 2015 dirixe "La decisión de Julia", que formou parte da sección oficial do Festival Internacional de Cinema de Ourense, levándose a súa protagonista Marta Belaustegui, o premio á mellor actriz. En 2002 forma parte do xurado da sección oficial na sétima edición do certame ourensán.

En 2015 inicia a serie "Mar de plástico" completando sete capítulos e regresa ao cinema tres anos despois con "El cuaderno de Sara". Volve a televisión e firma dous capítulos de "Brigada Costa del Sol" e un de "Secretos de estado", ambas deste ano. Entre as súas facetas menos lembradas figura a co-dirección xunto a Miguel Bosé do programa musical "Séptimo" para TVE.

En breve comezará o proxecto "3Camiños', que se converterá na primeira serie de ficción internacional e transmedia en torno ao Camiño de Santiago e ás vivenzas emocionais ao redor da peregrinación cunha trama non "lineal", desenvolta en tres momentos temporais distintos e rodada en seis idiomas. Liderada pola produtora galega Ficción Producciones, con apoio da Xunta de Galicia e Xacobeo 2021, rodarase a partires de novembro en España, Alemaña, Corea do Sur, Francia e México, países de orixe dos protagonistas.

Baltar visita as obras de construción dunha escola infantil en Paderne de Allariz

Ourense, 8 de agosto de 2019.- O presidente da Deputación de Ourense, Manuel Baltar, visitou hoxe as obras de construción dunha escola infantil da Galiña azul que se están a levar a cabo no Concello de Paderne de Allariz e que ofrecerá 41 prazas en tres unidades. A Deputación de Ourense destina para este centro, promovido pola Mancomunidade de concellos da comarca de Ourense presidida polo alcalde de Paderne de Allariz, unha achega de preto de 150.000 euros.

Na visita estivo acompañado pola delegada territorial da Xunta en Ourense, Marisol Díaz Mouteira; os alcaldes de Paderne de Allariz e de Esgos, José Manuel Fernández e Mario Rodríguez; e o xerente do Consorcio Galego de Servizos Sociais, Perfecto Rodríguez.

Ourense, escenario da "Sacroxira" de Luar na Lubre

  • A Deputación de Ourense colabora con esta proposta cultural que espallará os sons da Ribeira Sacra por lugares emblemáticos da provincia.

  • Manuel Baltar destacou, na presentación destes concertos, o éxito do grupo musical asegurando que se trata dun dos "expoñentes máis notables da cultura galega universal e internacional da que veñen facendo gala en 30 anos de traxectoria exitosa".

Ourense, 8 de agosto de 2019.- Ourense será o escenario da "Sacroxira" que ofrecerá o grupo musical Luar na Lubre e coa que espallará, co apoio da Deputación de Ourense, os sons da Ribeira Sacra por lugares emblemáticos da provincia de Ourense. A presentación desta proposta cultural tivo lugar hoxe na sala de prensa do Pazo Provincial, acto no que participou o presidente da Deputación de Ourense, Manuel Baltar e o líder do grupo musical, Bieito Romero, acompañados polos alcaldes dos concellos que acollerán os concertos desta xira.

Manuel Baltar destacou o éxito de Luar na Lubre asegurando que se trata dun dos "expoñentes máis notables da cultura galega universal e internacional da que veñen facendo gala en 30 anos de traxectoria exitosa". Ademais, o presidente do goberno provincial salientou a posta en valor que fai este grupo pola Ribeira Sacra lembrando que o ano pasado, tamén coa colaboración da Deputación de Ourense, presentaron "un traballo musical en homenaxe a esa terra á que lle puxeron banda sonora e que resulta un regalo para os sentidos".

O presidente da Deputación de Ourense, quen agradeceu ao grupo musical que na súa axenda teña "un lugar preferente a Ribeira Sacra e, polo tanto, a provincia de Ourense", animou a todo o mundo a gozar destas representacións que "son eventos únicos nos que se mestura a magnífica música de Luar na Lubre con lugares emblemáticos da nosa provincia". Así mesmo, Baltar felicitou ao grupo polo "éxito desa gravación que tivo lugar na Ribeira Sacra e pola súa repercusión internacional que axuda a que contemos cunha banda sonora como esta que é, sen dúbida, o himno da Ribeira Sacra".

Pola súa parte, Bieito Romero explicou que o nome de "Sacroxira" nos Mosteiros débese a que "boa parte do concerto musical que nós incluímos neste traballo discográfico ten moito que ver co sagrado", e salientou a importancia de celebrar estes concertos que permitirán ao grupo "dar a coñecer in situ e, sobre todo, dunha maneira directa, o que significa poñer música a estes sitios".

En canto á xira, o líder do grupo musical dixo que entendían que tiñan que "pasar por estes lugares antes de rematar con esta xira, que leva case máis de dous anos con máis de cen concertos por toda a Península e por moitos lugares do mundo", e aínda que a xira está nunha fase final, Bieito Romero asegurou que "non ten remate" porque a Ribeira Sacra sempre estará presente na súa música.

A xira na provincia de Ourense comezará o 8 de agosto, no mosteiro de Santo Estevo de Ribas de Sil, continuando o 13 de agosto no mosteiro Santa María de Montederramo; o 30 de agosto actuarán no Parador de Monterrei; o 15 de setembro en San Pedro de Rocas; e rematarán coa xira o 20 de setembro en Santa María de Xunqueira de Espadanedo.

A Deputación de Ourense aproba axudas para temas de Servizos Sociais, Cultura, Deportes e Infraestruturas

Ourense, 8 de agosto de 2019.- A Xunta de Goberno da Deputación de Ourense aprobou na reunión celebrada hoxe diversas axudas para cooperar con concellos e entidades en proxectos culturais, deportivos, de servizos sociais e infraestruturas. En concreto, no apartado de cooperación con entidades, a Xunta de Goberno aprobou, en materia cultural, dúas axudas para Sarabela SL, unha delas de 15.000 euros para a MITEU 2019 e a outra, que ascende aos 20.000 euros, será destinada á celebración do FITO 2019.

Pola súa parte, a Agrupación Coral de Ruada recibirá unha axuda de 32.280 euros para vestiario e material diverso, mentres que a Asociación Cultural Pen Club de Galicia contará cunha axuda de 25.000 euros para gastos de funcionamento da entidade correspondentes ao ano 2019. Para esta mesma finalidade, a Xunta de Goberno aprobou unha axuda de 10.000 euros para a Asociación Cultural da Castaña, así como outra de 22.000 euros para a Asociación Cultural 1809 A Batalla para a Festa de "1809. A Batalla", en Boborás.

Outra das axudas aprobadas na reunión foi para a Fundación para a Protección dos Discapacitados Psíquicos da Terra de Celanova, por importe de 25.000 euros, destinada aos gastos de funcionamento da entidade correspondentes ao 2019. Asemade, aprobouse unha axuda de 36.886 euros para "Hermanitas de los Ancianos desamparados de la Casa Asilo de Verín", para a adquisición dunha furgoneta. E, por último, en materia deportiva, aprobouse unha axuda de 10.000 euros para a Escuderia de Clásicos de Ourense para o "25 Rallye de Ourense de Vehículos Clásicos y Antiguos".

No relativo á cooperación cos concellos da provincia, na reunión aprobouse unha axuda para o Concello de Cenlle, de 50.000 euros, destinada á Escola de mestres de Esposende. Para o Concello de Riós aprobouse unha axuda de 30.000 euros para os gastos de funcionamento do Centro de Desenvolvemento Agroforestal, correspondente ao ano 2019 e, para o Concello de Vilar de Santos, aprobouse o pago anticipado de 31.526 euros para o proxecto de mellora enerxética. Por último, aprobouse unha modificación do Plan Provincial de cooperación ás obras e servizos municipais de 2019 relativa ao municipio de Melón que substitúe a obra "Carril – bici na N120 na parroquia de Quins", pola obra "acondicionamento de beirarrúa e travesía municipal", cun orzamento total de 48.000 euros.

Resolucións

Asemade, a Xunta de Goberno aprobou catro resolucións de concursos para a concesión de axudas en materia de deportes, cultura e servizos sociais. Por un lado, aprobou a resolución definitiva da convocatoria de axudas dirixida a entidades sociais para proxectos de servizos sociais para o ano 2019, a través do cal a institución provincial destina máis de 300.000 euros en axudas para preto de 60 proxectos.

Na reunión aprobouse tamén a resolución do concurso para a concesión de axudas para a realización de festivais, ciclos, mostras ou actividades análogas correspondentes ao ano 2019. Dita resolución recolle un investimento total de 80.000 euros para diversas actividades. Neste mesmo apartado cultural, aprobouse a resolución do concurso para a concesión de axudas a concellos para a organización de actividades culturais e recreativas correspondentes ao exercicio 2019. Mediante este concurso, a Deputación de Ourense destina un orzamento de 99.941 euros para os proxectos culturais de 50 municipios ourensáns.

A última resolución aprobada durante a xuntanza foi a do concurso para a concesión de axudas a clubs deportivos de Ourense para o ano 2019 que recolle máis de cen axudas para diferentes disciplinas deportivas como fútbol, kickboxing, patinaxe, taekwondo, ximnasia, xadrez, wushu, entre outras.