A Ribeira Sacra, declarada por unanimidade candidata de España a Patrimonio Mundial da UNESCO

  • Manuel Baltar -quen reactivou esta iniciativa en 2013- afirma que "o obxectivo esta conseguido", e agradece ao Consello de Patrimonio Histórico, "que ditaminase de maneira unánime este acordo, que será beneficioso para a Ribeira Sacra e para todo Ourense".

  • O presidente da Deputación de Ourense, quen asistiu no mosteiro de Santo Estevo de Ribas de Sil, ao acto de clausura do Consello de Patrimonio Histórico, salientou "a importancia de que o goberno provincial ourensán promovese esta candidatura, e estes son os froitos: que representantes de todas as comunidades autónomas distingan a Ribeira Sacra, o que supón unha homenaxe as xentes que ao longo dos séculos fixeron deste territorio un dos máis fermosos de Europa".

  • O presidente da Xunta de Galicia, Alberto Núñez Feijoo, expresou "a ilusión dos galegos por compartir co resto de España, de Europa e do mundo os tesouros da Ribeira Sacra", destacando o incremento turístico deste territorio, que crecen case un 50 %, "converténdose ademais nun destino referente da desestacionalización".

  • A Ribeira Sacra abrangue 22 concellos das provincias de Ourense e Lugo, entre os vales do Sil e o Miño. Reúne un conxunto de cenobios, mosteiros, igrexas, capelas e cruceiros que, pola súa variedade e densidade, configuran un espaza cultural único en todo o mundo", destaca o Consello de Patrimonio Histórico.

Ourense, 5 de abril de 2019.- A Ribeira Sacra foi elixida hoxe candidata de España para Patrimonio Mundial da UNESCO. Así o ditaminou por unanimidade o Consello de Patrimonio Histórico, reunido no mosteiro de Santo Estevo de Ribas do Sil (Nogueira de Ramuín), "cuxos membros distinguen con esta iniciativa o que representa a defensa da historia, a natureza e a cultura dun territorio único en Europa", expresou o presidente da Deputación de Ourense, Manuel Baltar, quen foi quen de reactivar en 2013 esta iniciativa e impulsar a cooperación entre administracións e entidades para que hoxe se acade este importante recoñecemento.

O presidente do goberno provincial valorou como "obxectivo conseguido" o resultado do ditame do Consello de Patrimonio Histórico, e sinalou que o feito de que o acordo fose por unanimidade "énchenos de orgullo porque se trata dunha decisión beneficiosa para a Ribeira Sacra e para toda a provincia de Ourense". Baltar salientou "a importancia do papel xogado polo goberno provincial ourensán, que promoveu esta candidatura, e estes son os froitos: que representantes de todas as comunidades autónomas distingan a Ribeira Sacra, o que supón unha homenaxe as xentes que ao longo dos séculos fixeron deste territorio un dos máis fermosos de Europa", expresou o presidente.

A Ribeira Sacra abrangue 22 concellos das provincias de Ourense e Lugo, entre os vales do Sil e o Miño. Reúne un conxunto de cenobios, mosteiros, igrexas, capelas e cruceiros que, pola súa variedade e densidade, configuran un espazo cultural único en todo o mundo, destaca o Consello de Patrimonio Histórico.

"Culmínase así un proceso longamente esperado desde que o 9 de setembro de 2013 convoquei aos alcaldes da Ribeira Sacra da provincia de Ourense para plantexarlles a reactivación da candidatura, e unanimemente dixeron que si", destaca Manuel Baltar. "Durante o tempo que vai desde entón, logo de comunicarllo á Deputación de Lugo, de conseguir a implicación da Xunta de Galicia e de que o Valedor do Pobo se sumase á candidatura, conseguimos que o 28 de decembro de 2018 a Ribeira Sacra fose declarada Ben de Interese Cultural (BIC) –sinala Baltar-, o paso previo para que hoxe poidamos dicir que o obxectivo está conseguido: a Ribeira Sacra é candidata de España a ser declarada Patrimonio Mundial pola UNESCO", remarca.

"Aí está a importancia de Ourense, de marcarse retos, e dun goberno provincial que impulsou esta candidatura, que será de inmensa relevancia para a provincia de Ourense, que coa chegada da Alta Velocidade e explotando a nosa condición termal estamos chamados a protagonizar un futuro moi beneficioso", afirma Manuel Baltar, engadindo que o recoñecemento de hoxe "é unha distinción que significa un galardón para a historia de Ourense, de Lugo e de Galicia, e para as súas xentes, que construíron unha sociedade de concordia e convivencia preservando o noso medio natural e converténdoo en orgullo de pertenza ao noso".

Pola súa banda, o presidente da Xunta de Galicia, Alberto Núñez Feijoo, expresou "a ilusión dos galegos por compartir co resto de España, de Europa e do mundo os tesouros da Ribeira Sacra", destacando o incremento turístico deste territorio, que crecen case un 50 %, "converténdose ademais nun destino referente da desestacionalización".

Feijóo lembrou que coa declaración de Ben de Interese Cultural da Ribeira Sacra, dentro da categoría de paisaxe cultural, desenvolvese un réxime de protección específico para unha extensión aproximada de 180 quilómetros cadrados, para optar á inclusión na lista do Patrimonio Mundial da Unesco. "Foi un longo proceso que podería culminar o mesmo ano no que se celebrará o Ano Xacobeo, 2021, "polo que sería unha feliz coincidencia que a Ribeira Sacra fose declarada Patrimonio da Humanidade ao mesmo tempo que celebramos o ano santo".

O Consello do Patrimonio Histórico, presidido polo director xeral de Belas Artes, Román Fernández-Baca, ditaminou que a paisaxe cultural da Ribeira Sacra sexa a elixida para formar parte da Lista de Patrimonio Mundial da UNESCO. A candidatura española será presentada ante o organismo internacional en febreiro de 2020 e a inclusión resolverase en 2021. Os valores que levaron ao Consello a elixir este territorio residen na beleza e conservación da paisaxe simbólica máis occidental da Europa continental, configurando un espazo único, exemplo do monacato primitivo que se desenvolveu a finais do século IV, grazas a uns conxuntos arquitectónicos de extraordinaria singularidade que ilustran 1.500 anos de historia. O paso do eremitismo ao monacato e a posterior expansión beneditina deixou un bosque de igrexas que ilustran a riqueza e variedade da arquitectura románica dos séculos XII e XIII.

Á marxe do importante patrimonio cultural e arquitectónico, a Ribeira Sacra tamén é unha paisaxe viva e o máximo expoñente da relación entre home e natureza. Proba dista interacción do ser humano co medio son as monumentais terrazas nas ladeiras dos canóns do Sil e o Miño para a explotación dunha agricultura de subsistencia baseada no policultivo. A esencia desta paisaxe antrópica atopámola con todos os seus matices nos terreos de ribeira e bocarribeira.

Música, videoxogos, animación 3D e tendencias tecnolóxicas, ocupan a cuarta xornada da "Ourense ICC Week" 2019

  • O espazo gamer da Semana das Industrias Culturais e Creativas, dedicado ás E-Sports, comezou cunha charla sobre os riscos do mal uso dos videoxogos.

  • Tamén se celebrou esta mañá unha masterclass a cargo da Escola Trazos sobre animación 3D e deseño gráfico de vangarda, nun sector en auxe cun nivel de empregabilidade superior ao 97%.

  • Pola tarde será a quenda para as tendencias tecnolóxicas con Jaime García Cantero; a música da man de Adriana Proenza e Soledad Vélez; e o concerto de Kiko Veneno no Teatro Principal.

Ourense, 5 de abril de 2019.- O espazo gamer da "Ourense Icc Week" 2019, comezou hoxe no Liceo de Ourense, cunha charla destinada á mocidade, da man do médico e tamén gamer, José Luís Morales, quen dixo que "os videoxogos en si mesmos non son aditivos, hai unha tendencia a demonizalos", pero engadiu que é moi importante saber recoñecer cando hai un problema ante o seu abuso. Morales explicou que as adicións non supoñen sempre unha dependencia física ou psicolóxica a unha substancia, "falamos da adición condutual" adictos ao azar, ao deporte, ao traballo, ás compras e, por suposto, ás novas tecnoloxías onde o móbil, pode chegar a supoñer o maior perigo pola facilidade de acceso e por como o utilizamos. " Os móbiles de hoxe en día superan en tecnoloxía á usada para que o home chegase a lúa, e sen embargo nós usámolos para xogar ao Clash Royale", dixo Morales.

Morales explicou que ao seu entender, o verdadeiro risco de adición está na nova tendencia das chamadas "Loop Boxer" ou recompensas que utilizan algúns videoxogos de consolas pero, sobre todo, os xogos gratuítos dos móbiles. Trátase de cofres, sobres ou sorpresas que dotan de vantaxes aos xogadores, e polas que habitualmente hai que pagar. "Isto é un verdadeiro xogo de azar, non está regulado, e constitúe o perigo deste tipo de xogos". O especialista, engadiu ademais que a apertura destes premios supón para o noso cerebro "chutes constantes de dopamina, serotonina ou adrenalina" causantes dos comportamentos dependentes.

Como consello para evitar estas condutas aditivas, o doutor recomendou utilizar sempre o reforzo positivo e os límites por parte dos pais. "Os videoxogos pódense empregar como recompensa cando un rapaz cumpre as súas obrigas, pero nunca debemos dar o móbil a un neno que se porta mal para que se calme".

Na charla estivo un grupo de alumnos de 2º da ESO do IES Blanco Amor, e outro de 1º de bacharelato do Colexio Padre Feijóo-Zorelle. O mozos escoitaron previamente a Alfonso Rodríguez, coñecido como FonsoCN no mundo gamer, e fundador da marca de e-sports MundoGT, que fixo un repaso pola historia desta disciplina dende a mítica Atari ata os grandes torneos mundiais da actualidade.

A outra cita da mañá foi unha masterclass a cargo da Escola Trazos de Madrid, celebrada no auditorio da sede de Afundación en Ourense. Unha charla, na que o director da academia, Jesús Justicia, aproveitou para invitar aos mozos de Ourense a interesarse polo mundo do deseño, destacando que a empregabilidade no sector supera o 97% e que en moitos casos, a demanda das empresas supera a oferta de profesionais, co cal "moitas veces facemos formacións moi específicas de alumnos que xa teñen traballo antes de rematar". Neste sentido, o director da Escola afirmou que "a comunicación de hoxe en día é puro deseño gráfico, é a ferramenta indispensable para a publicidade".

Hoxe quixeron achegar ao público e "facer terreal toda a maxia" que pode realizarse coas ferramentas de deseño gráfico. O encargado de alcanzar este obxectivo foi o ex-alumno da Escola, Aniball Santaella, un recoñecido experto en 3D e colaborador de empresas como Swiss, BBC, Fonda, Nike Discovery Channel ou Nathionbal Geographic. A través dun corto de animación desenrolado integramente na Escola, Santaella, explicou todo o proceso creativo desde a preprodución ata postproducción dun traballo destas características.

Tendencias tech e música

Pola tarde, as tendencias na tecnoloxía serán as protagonistas na Sede Afundación en Ourense, da man do director de contidos de "El País Retina", Jaime García Cantero, quen analizará o impacto do Internet das Cousas. Posteriormente, ás 18.30 horas, Adriana Proenza e Soledad Vélez actuarán nos Xardíns Padre Feijóo e de alí, trasladaranse as actividades de novo á Sede Afundación en Ourense, co Foro "La Región", onde o presidente de Warner Music, José Carlos "Charly" Sánchez, e o xornalista musical, Vicente "Mariskal" Romero, falarán da industria musical.

Como broche final desta cuarta xornada da "Ourense ICC Week" 2019, o Premio Nacional de Belas Artes, Kiko Veneno, un dos nomes esenciais da música popular española das últimas décadas chega a Ourense no preámbulo da presentación do que será o seu novo disco "Sombrero Roto". A súa actuación ás 21.00 horas, no Teatro Principal de Ourense.

Programación para o fin de semana

Mañá sábado, 6 de abril, continuará no Liceo de Ourense, a ICC E-Sports, o maior encontro de gamers de Galicia, para continuar ás 10.30 horas, no centro cultural "Marcos Valcárcel", coa ICC Kids, con obradoiros de Stop Motion que se desenvolverán por grupos de idades, comezando polos de 7-8 anos, ás 11.30 horas será a quenda para os de 9 e 10 anos e, ás 12.30 horas, rematarán os de 11 e 12 anos.

Posteriormente, as actividades da "Ourense ICC Week" 2019 trasladaranse aos Xardíns Padre Feijóo, coas actuacións musicais de Los Nastys, Joe Crepúsculo e Colectivo Dial. E, da música, pasamos aos Festivais de cine, ás 16.30 horas, no centro cultural "Marcos Valcárcel", onde participará a subdirectora do Festival de Sitges, Mónica G. Massagué; a directora do BCN Film Fest, Contxita Casanovas; o director do Festival Cortocircuito, Pela del Álamo; e o coordinador artístico do OUFF, Miguel Anxo Fernández. Como remate da xornada, celebrarase no centro cultural "Marcos Valcárcel", a entrega dos Premios Rodolfo Prada 2019, á xestión cultural, galardón convocado pola Deputación de Ourense.

O domingo, 7 de abril, comezarán as actividades ás 10.00 horas, no Liceo de Ourense, coa celebración do ICC E-Sports que rematará ás 14.00 horas. Por último, como xornada de clausura a esta quinta edición da Semana das Industrias Culturais e Creativas que organiza a Deputación de Ourense, o humorista Luís Piedrahita, quen ofrecerá o seu monólogo "Las amígdalas de mis amígdalas son mis amígdalas", no Auditorio Municipal de Ourense.

Máis de 6.000 persoas visitan A derradeira leición do mestre, na Deputación de Ourense

  • A obra pictórica icónica do galeguismo, de Alfonso Rodríguez Castelao, que forma parte da mostra "Castelao e Prada, irmaus!", poderá visitarse ata o luns, 8 de abril, ás 21.00 horas.

Ourense, 5 de abril de 2019.- Máis de 6.000 persoas visitaron a obra pictórica icónica do galeguismo, A derradeira leición do mestre, de Alfonso Rodríguez Castelao, que se exhibe por primeira vez na provincia de Ourense, na antiga biblioteca do Pazo Provincial, dentro da exposición "Castelao e Prada, irmaus!", organizada pola Deputación de Ourense.

A exposición que irmanda a dous referentes do galeguismo, Castelao e Rodolfo Prada, nunha mostra única que homenaxea aos dous intelectuais galeguistas, poderá visitarse ata o vindeiro luns, 8 de abril, ás 21.00 horas, antes de que A derradeira leición do mestre volva ao Centro Galicia de Bos Aires, entidade propietaria do cadro.

A Deputación de Ourense adapta os baños do Pazo dos Deportes para persoas ostomizadas

  • Rosendo Fernández destacou hoxe na visita a estas novas instalacións que converten ao "Paco Paz", "no primeiro edificio público da provincia, á marxe dos centros hospitalarios, en adaptarse a estas necesidades".

Ourense, 5 de abril de 2019.- A Deputación de Ourense vén de instalar os baños adaptados para persoas ostomizadas no Pazo dos Deportes "Paco Paz", "converténdose así no primeiro edificio público da provincia, á marxe dos centros hospitalarios, en adaptarse a estas necesidades, para facer de Ourense unha cidade máis inclusiva", destacou o vicepresidente do goberno provincial, Rosendo Fernández, quen visitou hoxe estas novas instalacións acompañado polo asesor de Deportes da Deputación, Bernardino González; e polo presidente e a coordinadora de proxectos de ACCU Ourense, Fernando Jiménez e Chari Álvarez.

De acordo á Lei 10/2014, do 3 de decembro, de accesibilidade, debe proverse de baños adaptados para as persoas con ostomías para que poidan empregar os aseos dos edificios públicos e privados en condicións de igualdade, seguridade e comodidade, co fin de aumentar a súa autonomía persoal e vida independente. Na provincia de Ourense, son "máis de 800 as persoas ostomizadas", salientou Fernando Jiménez.

Estas actuacións levadas a cabo nos baños do Pazo dos Deportes atende ás demandas de ACCU Ourense, "ao observar que cando as persoas ostomizadas deben vaciar a súa bolsa, atópanse con que os equipamentos dos baños adaptados para persoas con discapacidade carecen dos mecanismos necesarios para asegurar un vaciado seguro e hixiénico", explicou o presidente da entidade, quen insistiu en que moitas das persoas ostomizadas "ven como esta situación lles afecta a súa vida social, dado que a falta de baños adaptados ás súas necesidades dificúltalles a normalización das súas actividades". Pola súa parte, Chari Álvarez salientou a colaboración da empresa ourensá Aceros Argimiro, "encargada de deseñar e crear os baños, colaborando activamente con nós e de xeito altruísta".