A VII "Festa da Palabra" revindica a figura do galeguista e xornalista Francisco Luís Bernárdez

  • Manuel Baltar afirmou na clausura do acto na Insua dos Poetas que a palabra "é compromiso e progreso" e defendeu a Ourensanía, "un horizonte amplo e plural, o noso xeito de percorrer o mundo".

  • González Tosar, falou da necesidade "de manter viva a lembranza de Francisco Luís Bernárdez", nun acto no que se entregaron os galardóns que recoñecen a persoeiros e entidades dos ámbitos social, das letras, emigración, Arte e Medio Ambiente, e comunicación.

Ourense, 18 de xullo de 2015.- A VII "Festa da Palabra", que se celebrou hoxe na Insua dos Poetas, na Esgueva (Madarnás, O Carballiño), reivindicou a figura do xornalista, poeta, diplomático e galeguista Francisco Luís Bernárdez (Bos Aires 1900-1978). A súa vida e obra recóllese nun libro no que varios autores rescatan do esquecemento a este ilustre galeguista, e como afirmou o poeta e presidente do Pen Galicia, Luís González Tosar, coordinador da publicación, "é de necesidade manter viva a lembranza de quen fixo tanto pola nosa lingua e pola nosa cultura". O volume que recolle a traxectoria vital e profesional de Bernárdez é unha edición que conta co apoio da Deputación de Ourense, da Xunta e do Pen Galicia.

Tosar foi precisamente o encargado de abrir o acto nesta xornada festiva para a palabra na nosa lingua. Con el estaba o presidente da Deputación de Ourense, Manuel Baltar; e o conselleiro de Cultura, Román Rodríguez; o presidente da Real Academia Galega, Xesús Alonso Montero; o presidente da Academia Arxentina das Letras, José Luís Moure; o secretario xeral de Cultura, Anxo Lorenzo; o secretario xeral de Política Lingüística, Valentín García, e o vicepresidente do Parlamento, Miguel Santalices, xunto a persoeiros dos ámbitos institucional, social e cultural de Galicia.

Na clausura do acto Manuel Baltar afirmou que a palabra "é compromiso e progreso" e defendeu a Ourensanía, "un horizonte amplo e plural, o noso xeito de percorrer o mundo, como a definiu o propio Tosar: "Sólida mestura de astucia pándiga e de íntima e fonda reflexión dos que máis sabemos dos camiños do mundo, porque os percorremos case todos, a pé e detrás da roda". Baltar, quen agradeceu a todos os que achegan "ilusión e vitalidade a este territorio único e singular, comprometidos coa cultura e coa lingua propias de Galicia", reafirmou que somos ourensáns, "coñecedores do bo e do ruín, sufridos, narrativos e agudos".

O presidente do goberno provincial dixo coincidir co que Risco –e tamén Bernárdez- expresaba en 1917 na revista neosófica "La Centuria", onde escribiru: "Ourense está moito máis preto de Nova York que de Madrid", "Aínda que isto no sexa certo en canto a distancias, explicou Manuel Baltar, si é verdade desde unha perspectiva cultural, na que cómpre ter en conta o papel da Ourensanía, porque os ourensáns, moi amantes do noso, que non entendemos de fronteiras nin de dogmas, preferimos ser máis ben rebeldes e inadaptados. Gústanos sorprender. E como me dixo nunha ocasión Ogando Vázquez a modo de consello: "Hai que rebelarse de voz". Rematou afirmando o presidente da Deputación que hoxe, "na festa das festas", "as palabras son compromiso, porque poden que as leve o vento, máis ditas quedas".

No acto, que contou coas actuacións musicais de Miriam Sandoval e Lorena Lores, inaugurouse a Fonte das "Sete Palabras" e entregáronse os galardóns que recoñecen a persoeiros e entidades dos ámbitos social, das letras, emigración e comunicación. En concreto, no que atinxe ás Letras o galardoado foi o escritor Manuel Ribas; en Cultura Galega a Emigración, Francisco Lores Mascato; en Arte e Medio Ambiente, o Grupo Ecoloxista Outeiro; en Compromiso Económico e Social, o Grupo Gadisa; e en Comunicación e Difusión Cultural, o xornal Faro de Vigo.

Ourense e Lugo entregan á Xunta os informes técnicos para a candidatura da Ribeira Sacra como Patrimonio Mundial

  • No acto que tivo lugar hoxe no mosteiro de San Pedro de Rocas Manuel Baltar agradeceu ás institucións e ao equipo científico-técnico "a implicación, coherencia e consenso, que farán que chegue o recoñecemento para que a Ribeira Sacra sexa o que xa é: Patrimonio Mundial".

Ourense, 18 de xullo de 2015.- O mosteiro de San Pedro de Rocas (Esgos) acolleu hoxe o acto de entrega dos informes técnicos por parte das deputacións de Ourense e Lugo á Consellería de Cultura en relación á candidatura da Ribeira Sacra como Patrimonio Mundial. No acto participaron o presidente da Deputación de Ourense, Manuel Baltar; o valedor do Pobo, José Julio Fernández, o conselleiro de Cultura, Román Rodríguez, o presidente do Consorcio de Turismo da Ribeira Sacra, Juan Carlos Armesto, en representación da Deputación de Lugo, e o alcalde de Esgos, Mario Rodríguez.

Manuel Baltar agradeceu a presenza de todas as institucións hoxe en San Pedro de Rocas "para dar entre todos un paso máis, coherente co que puxemos en marcha en setembro de 2013, cando tiven oportunidade de convocar aos alcaldes dos municipios ourensáns da Ribeira Sacra para anunciarlles que íamos relanzar a candidatura da Ribeira Sacra como Patrimonio Mundial". Baltar subliñou que esa coherencia tamén a amosou a Deputación de Lugo ao aprobar a mesma moción ca Deputación de Ourense coa unanimidade de todos os grupos políticos, e despois coa sintonía do goberno autonómico e do Valedor do Pobo ao coñecer que tiñamos interese en que este coordinara os traballos técnicos que xustificaran cientificamente a presentación da candidatura".

O presidente da Deputación pediu "máxima celeridade" á Xunta de Galicia "para que pronto poidamos celebrar esa distinción, que será un recoñecemento internacional de algo que para nós xa é patrimonio mundial, esta fermosa Ribeira Sacra. Hoxe estamos aquí, no mosteiro de San Pedro de Rocas, onde hai máis de 1.500 anos xa había vida intelixente e onde cada ano son máis de 40.000 os turistas que visitan este monumento, berce da Ribeira Sacra". Baltar remarcou que entre Ourense e Lugo non hai limites provinciais, "é un todo, un conxunto, e paga a pena todos os esforzos que empreguemos para acadar ese recoñecemento".

O presidente do goberno provincial agradeceu a implicación de todas as institucións e o labor do equipo multidisciplinar, "que puxo á nosa disposición o Valedor do Pobo, porque nesta tarefa estamos implicados ata o final", e lembrou que a vindeira semana reunirase a comisión entre concellos e deputacións para seguir coa Xunta de Galicia nesa andaina a prol do obxectivo último, e rematou pedindo que sigamos todos "con esa mesma coherencia e consenso porque esa unanimidade fará que chegue o recoñecemento para que a Ribeira Sacra sexa o que xa é: Patrimonio Mundial".

Pola súa banda, o conselleiro de Cultura confirmou que o goberno autonómico "iniciará agora o camiño administrativo para conseguir o recoñecemento da Ribeira Sacra como ben da humanidade", "pois –dixo- estamos nunha contorna singular, tanto pola súa paisaxe como pola riqueza patrimonial, e que ten tamén unha fonda tradición de ocupación humana cunha das paisaxes construtivas máis diferenciadas do mundo, como é o traballo que fixeron os habitantes da Ribeira Sacra para adaptarse á natureza e cultivar a vide nas pendentes, construíndo un sistema de bancais que é practicamente único no mundo para colleitar un produto como o viño da Ribeira Sacra que conta con denominación de Orixe".

O Valedor do Pobo remarcou que é de xustiza "que a humanidade recoñeza o valor da Ribeira Sacra e tamén que o goce, porque a singularidade desta contorna así o merece". No mesmo senso, Juan Carlos Armesto dixo que a Ribeira Sacra "máis aló do seu patrimonio, a súa paisaxe e o seu viño ten un valor máis que engadir: a unidade, pois 21 concellos, dúas deputacións, empresarios e a cidadanía da contorna estamos xuntos neste proxecto para que a Unesco e o mundo nos outorguen ese galardón".

Solicitude de BIC

Trala entrega da memoria científica, o paso seguinte será a solicitude de expediente de Ben de Interese Cultural (BIC) por parte da Consellería de Cultura. Os traballos técnicos foron desenvolvidos por expertos nas áreas temáticas de: Produción agrícola e formas de cultivo; Xeografía física; Edafoloxía; Botánica; Patrimonio cultural (Historia, Historia da Arte, Arqueoloxía, Arquitectura e Antropoloxía); Economía aplicada e Produción vitivinícola. O documento enviarase agora ao Ministerio de Cultura para a súa presentación polo Reino de España -unha vez aprobada polo Consello do Patrimonio Histórico Español- ante o Centro de Patrimonio Mundial para que sexa avaliada polo Comité do Patrimonio Mundial.

A candidatura define, describe e delimita o ben proposto, ademais de delinear a súa historia e acreditar un valor universal excepcional, especificando neste caso como dito valor vaise manter e salvagardar por medio da protección legal e da xestión dos recursos que testemuñan o dito valor; cal será o proceso de xestión e o sistema a desenvolver, así como quen vai participar no mesmo.

Chega agora o momento de que a Xunta inicie o proceso para a declaración de BIC, trámite fundamental para que a solicitude se eleve ao Goberno do Estado para que sexa debatida na Unesco cando corresponda.

A gañadora do XII Premio "Pura e Dora Vázquez", agradece ás dúas escritoras ourensás "o feito de que abriran camiño na narrativa infantil"

  • Manuel Baltar entregou hoxe o galardón á escritora Eli Ríos e á ilustradora Patricia Román propoñendo que a partires de agora o acto se faga nos centros educativos ourensáns "para achegar aínda máis este premio aos seus destinatarios: o público infantil e xuvenil".

Ourense, 17 de xullo de 2015.- O presidente da Deputación de Ourense, Manuel Baltar, entregou hoxe o Premio "Pura e Dora Vázquez" á escritora coruñesa Eli Ríos e á ilustradora de Ciudad Real Patricia Román, galardoadas na XII edición deste certame, un dos máis importantes da literatura galega no ámbito infantil e xuvenil e que o goberno provincial organiza co obxectivo de recoñecer o legado das escritoras ourensás Pura e Dora Vázquez e promover a lectura entre os máis novos. Nun acto que tivo lugar no Salón de Plenos da Deputación de Ourense, Manuel Baltar propuxo que a partires da vindeira edición "o acto de entrega do premio se celebre nun centro educativo da provincia de Ourense para achegar aínda máis este recoñecemento aos seus destinatarios: o público infantil e xuvenil".

O presidente do goberno provincial felicitou as galardoadas e resaltou o explicitado polos xurados, "a alta calidade literaria e artística dos traballos premiados: o texto Bicha, de Eli Ríos, e as ilustracións de Patricia Román, baseadas no traballo narrativo da primeira". Baltar destacou que este premio "louba a traxectoria de Pura e Dora Vázquez e todo o que elas significaron nos ámbitos do ensino e a cultura, e nos leva a seguir mantendo viva a súa memoria, a súa obra e o seu compromiso coa nosa terra".

O presidente da Deputación tamén subliñou o feito de que foran dúas mulleres as premiadas este ano, "un motivo máis de orgullo", como o feito, dixo, "de que esteamos a celebrar xa a 12ª edición dun galardón que entregamos precisamente hoxe, 17 de xullo, data na que se cumpren 62 anos da apertura do parque temático infantil "Disneyland".

Pola súa banda, Eli Ríos dixo no seu discurso que este premio "ten unha significación moi especial para min porque lembra a figura de dúas mulleres que abriron camiño na narrativa infantil, un xénero tan maltratado", e agradeceu á Deputación de Ourense o impulso que da con este premio á literatura feita para os máis novos "porque nos da visibilidade aos escritores que gozamos escribindo para nenos e xóvenes".

Patricia Román afirmou que foi todo un reto "ilustrar esta historia para nenos pre-adolescentes, porque tiven que documentarme sobre as preferencias que teñen na actualidade os mozos e mozas desta idade, tan implicados como están nos temas sociais". Neste senso, destacou que a súa obra ilustrativa "está feita con máis realismo do que adoita traballar, pero sen perder a maxia e a fantasía".

Tamén tivo unhas palabra de agradecemento para o presidente Baltar e para a Deputación de Ourense o fillo de Dora Vázquez, Antonio Alejo Rodríguez Vázquez, quen animou ás premiadas a seguir "por ese camiño de excelencia e creatividade" e á Deputación "a continuar coa súa labor cultural de manter o nome de Pura e Dora Vázquez sempre presente na nosa literatura".

O xurado do premio "Pura e Dora Vázquez" -galardón dotado con 1.500 euros e diploma para cada unha das modalidades- destacou no caso da obra Bicha, de Eli Ríos "o atractivo dos seus personaxes para o lector e a importancia que o relato da a amizade entre nenos e animais, ademais de axeitarse perfectamente para ser ilustrada dentro do espírito do premio". De todos os textos presentados ao premio, o xurado destacou a gran calidade literaria e salientou a dificultade que isto supuxo na elección. A gañadora foi seleccionada de entre dúas obras que competiron ata o final, sendo elixida finalmente Bicha por maioría.

No caso do traballo de ilustración de Patricia Román –quen gaña o premio por segundo ano consecutivo- o xurado fixo mención á orixinalidade das ilustracións, "que se adaptan moi ben ao texto premiado na modalidade literaria e axudan a narrar a historia", ademais de destacar "a técnica empregada para a realización das ilustracións –debuxo a man coloreado dixitalmente- e a calidade do conxunto da obra".

Manuel Baltar destaca "a maridaxe entre viño, cultura e cooperación institucional", na presentación do Ribeiro Blues Winefestival

  • O evento, que conta co apoio da Deputación de Ourense, celebrarase en Castrelo de Miño os días 7 e 8 de agosto.

Ourense, 17 de xullo de 2015.- O presidente da Deputación de Ourense, Manuel Baltar, cualificou hoxe ao "Ribeiro Blues Winefestival" como un evento no que se produce "unha excelente maridaxe entre cultura, viño e cooperación institucional", afirmando que a Deputación de Ourense "colabora con esta idea innovadora e de vangarda que aposta polo futuro da viticultura no Ribeiro e a súa promoción dunha maneira singular e atractiva irmanando viño e boa música".

O presidente do goberno provincial fixo esta afirmación no acto de presentación deste evento, que este ano celebra a súa segunda edición, e que terá lugar no Parque Náutico de Castrelo de Miño os días 7 e 8 de agosto. No acto, Manuel Baltar estivo acompañado polo alcalde de Castrelo de Miño, Xurxo Rodríguez, e polo presidente do Consello Regulador da Denominación de Orixe Ribeiro, Miguel Ángel Viso.

No Ribeiro Blues Winefestival participarán máis de trinta adegas e colleiteiros "nun evento que lle pon a banda sonora ao Ribeiro nunha contorna privilexiada como é a do parque náutico", explicou o alcalde. Mentres que Miguel Ángel Viso destacou que o consello regulador "estará sempre ao carón de iniciativas como esta, que potencia a imaxe da viticultura no Ribeiro e a todo o sector do viño".

A presentación, que tivo lugar no salón de actos do Centro Cultural "Marcos Valcárcel" da Deputación de Ourense, contou coa actuación en directo da cantante de jazz Shanna Waterstown, unha das artistas convidadas a participar no festival, xunto con Khalif "Wailing" Walker, J. Teixi Band, Big Lis & Gumbo Band, The Tetas Van, Virginia Labuat, jeb Rault & The Trio e Johnny Cat & The Poor Dogs.

Saúdos,