O Centro Galego de Barcelona apoia o Museo Galego da Emigración, que promove Manuel Baltar

  • O presidente da Deputación de Ourense recibiu no Pazo Provincial a Manoel Carrete, con que analizou temas referidos á emigración e lle explicou as iniciativas que o goberno provincial está a levar acabo neste ámbito.

Ourense, 21 de xuño de 2015.- O Centro Galego de Barcelona amosa "o seu apoio total" á creación do Museo Galego da Emigración que promove o presidente da Deputación de Ourense, Manuel Baltar. Así llo confirmou Manoel Carrete, presidente da entidade galega en Barcelona, quen se entrevistou con Manuel Baltar no Pazo Provincial xunto con Pepita Álvarez, integrante da directiva do centro galego, para analizar temas de actualidade referidos á emigración galega.

O presidente do goberno provincial destacou no encontro a importancia "que tiveron, teñen e sempre terán os nosos emigrantes", afirmando que Galicia, e sinaladamente Ourense, "é unha terra creativa e emigrante, dous aspectos que unidos deron de si importantes logros acadados en moitos ámbitos culturais, sociais, científicos e empresariais". Baltar subliñou que a importancia que o goberno provincial lle da á emigración reflíctese en iniciativas como a web "Ourense emigrante", na que estamos a traballar, e mesmo no que será o referente da emigración galega: o Museo Galego da Emigración, que terá a súa sede na provincia de Ourense".

Baltar explicou que estase a traballar xunto con Olegario Sotelo Blanco e co antropólogo Manuel Mandianes "para facer realidade este xusto recoñecementos aos nosos emigrantes, porque rara é a casa ou a familia que non teña alguén que estivera ou estea no estranxeiro", e iso contribuíu en gran medida ao desenvolvemento desta provincia".

O presidente da Deputación avanzou que o museo "deberá evidentemente mostrar parte do que foi a historia da emigración, con obxectos, relatos e recordos, pero tamén deberá ser o espazo que amose os moitos éxitos que os nosos emigrantes conseguiron ao longo das súas vidas, que foron moitos e que tamén deben ser coñecidos. Un museo interactivo e non un espazo exclusivamente de nostalxia exclusivamente, senón tamén de aprendizaxe".

Manoel Carrete, historiador e avogado en exercicio, confirmoulle ao presidente provincial que o Centro Galego de Barcelona apoiará esta iniciativa. El leva tres anos á fronte desta entidade en Barcelona e forma parte da segunda xeración de galegos residentes en Cataluña. Precisamente, a súa tese de doutoramento trata sobre a diáspora galega en Cataluña a principios do século XX. Foi socio da Casa Galega de Hospitalet, cambiando posteriormente ao Centro Galego de Barcelona, e tamén é vicepresidente da Federación de Entidades Culturais Galegas de Cataluña.

Os xóvenes deportistas, protagonistas do torneo de fútbol 8 "Ourense provincia termal"

  • Celebrarase os días 27 e 28 de xuño no campo do Couto coa participación dos equipos de fútbol base do Pavillón, Escola Deportiva Ourense, Deportivo da Coruña e Real Valladolid.

Ourense, 19 de xuño de 2015.- O presidente da Deputación de Ourense, Manuel Baltar, xunto ao futbolista Borja Fernández, e os directivos da Escola Deportiva Ourense (EDO) Javier Caldas e Manuel Meiriño, presentou hoxe o torneo de fútbol 8 "Ourense provincia termal", que se disputará os días 27 e 28 de xuño no campo do Couto coa participación dos equipos de categoría Benjamín do Pavillón Ourense, Escola Deportiva Ourense, Deportivo da Coruña e Real Valladolid. "Trátese dun acontecemento que une aspectos tan importantes como o deporte a saúde e os valores de traballo e sacrificio que acreditan a deportistas como Borja Fernández", afirmou Manuel Baltar, engadindo que Borja "é un defensor de Ourense porque leva o nome da nosa provincia aos máis altos ámbitos deportivos".

O presidente do goberno provincial destacou que este torneo promociona "a nosa singularidade turística como é o termalismo, e con ela todas as potencialidades da provincia, ao que hai que engadir o aspecto fundamental que é a quen vai dirixido este torneo: ao deporte de base, algo que sempre apoiará a Deputación de Ourense. Entre todos imos consolidar este torneo, unha iniciativa pola que felicito aos seus creadores, dado impulso que lle están a dar ao ámbito deportivo dirixido especialmente aos máis novos".

Borja Fernández agradeceu a posta en marcha deste campus, "que permitirá aos deportistas máis pequenos aprender e convivir cos valores máis salientables da práctica deportiva, algo que sempre deben ter presente, dentro e fóra do deporte". E Javier Caldas dixo que este torneo nace coa idea de que os nenos "teñan como referente a Borja Fernández, aproveitando a excelente pegada que deixou en todos os clubs nos que militou: Real Madrid, Deportivo, Xetafe, Mallorca, Valladolid, Eibar e mesmo na India, onde xogou unha tempada". Caldas agradeceu á Deputación de Ourense o apoio para a realización deste torneo e tamén ao Grupo Caldaria, en cuxos establecementos de Laias e Arnoia se hospedarán os xogadores.

O torneo dispútase na modalidade de liga, todos contra todos, no Campo do Couto e dará comezo o sábado, 27 de xuño, ás 17.00 horas, co partido entre a EDO e o Real Valladolid. Seguidamente xogarán Pavillón-Deportivo, EDO-Pavillón e Deportivo-Valladolid. O domingo, 28 de xuño, entre as 11.00 e as 13.00 xogarán EDO-Deportivo e Pavillón-Vallladolid, para rematar coa entrega de trofeos.

Manuel Baltar defende a "alianza de cooperación" cos xóvenes empresarios "porque eles son o emprendemento da provincia"

  • O presidente do goberno provincial foi o persoeiro convidado hoxe no almorzos de negocios que organiza o Círculo de Xóvenes Empresarios de Ourense.

Ourense, 19 de xuño de 2015.- O presidente da Deputación de Ourense, Manuel Baltar participou hoxe nun almorzo-coloquio organizado polo Círculo de Xóvenes Empresarios de Ourense que se celebrou lugar no Centro Cultural "Marcos Valcárcel". O encontro, que nesta ocasión tivo como convidado ao presidente do goberno provincial, enmárcase no programa de almorzos de negocios que promove o Círculo de Xóvenes Empresarios para manter contacto e establecer canles de colaboración cos diferentes institucións e, neste caso, coa Deputación de Ourense. O obxectivo é coñecer as experiencias e proxectos dos interlocutores convidados e transmitirlles propostas e logros por parte dos xóvenes emprendedores da provincia de Ourense.

Manuel Baltar explicou na súa intervención as liñas mestras dos últimos anos de xestión ao fronte do goberno provincial e os plans de futuro a medio e longo prazo, e agradeceu o talante proactivo amosado polos xóvenes empresarios, implicados sempre na mellora económica da nosa provincia, e subliñou a "alianza de cooperación con eles porque, en definitiva, son os autores do emprendemento e do futuro na provincia de Ourense".

O presidente do ente provincial e os xóvenes empresarios concordaron en que o Inorde pode prestar un servizo tanto de asesoramento como de impulso ás iniciativas conxuntas que propoñan, "pois todos eles teñen interiorizada a importancia da provincia, do noso territorio e da cooperación empresarial, e a Deputación de Ourense acollerá esas iniciativas de apoio á promoción empresarial, porque se melloran as empresas, melloran as condicións da provincia e poderemos atender ese gran problema que é a falta de emprego e inverter esa tendencia".

Madrid dedica unha rúa ao municipio de Muíños, no distrito de Vallecas

Ourense, 18 de xuño de 2015.- O Concello de Madrid ven de comunicar á Deputación de Ourense e ao Concello de Muíños a asignación dunha rúa no distrito de Vallecas dedicada ao municipio ourensán de Muíños. Segundo o escrito fechado o pasado 5 de xuño, a proposta foi aprobada por unanimidade no pleno do mes de maio, no que tamén se asignaron nomes a outras quince rúas da capital de España.

En concreto, a xa denominada "Calle de Muíños" atópase na zona industrial de La Atalayuela, entre as rúas Guadalcanal e Sierra de la Demanda. O expediente para a asignación do nome tivo a súa orixe en 2013, se ben os responsables municipais de Vallecas agardaron ao maior desenvolvemento da zona de La Atalayuela para facer efectiva a denominacións das novas rúas.

Manuel Baltar agradece ao Concello de Madrid que tivese a ben incluír no seu rueiro o nome dun municipio da provincia de Ourense, "algo que contribuirá a seguir promocionando este importante concello da Baixa Limia, caracterizado pola súa riqueza natural, monumental e paisaxística". Tamén o alcalde de Muíños, Plácido Álvarez, amosou a súa satisfacción pola dedicación da rúa "o que supón unha axuda para que o noso municipio se coñeza e cada vez sexan máis os visitantes que se achegan á nosa contorna".