A Deputación apoia ao acordeonista internacional ourensán Víctor Prieto

Ourense, 21 de xullo de 2015.- O presidente da Deputación de Ourense recibiu hoxe no Pazo Provincial ao acordeonista ourensán Víctor Prieto quen desenvolve hai anos o seu labor profesional en Nova York, sendo un referente do jazz. Manuel Baltar destacou "a creatividade e o talento profesional de Víctor Prieto" e tamén o compromiso que mantén con Ourense "como se pon de manifesto na máster class de acordeón que o músico organiza na súa localidade natal de Mugares (Toén), con participantes internacionais, e que o vindeiro ano contará co apoio da Deputación de Ourense para realizar ademais da actividade formativa un concerto musical". Na súa visita á institución provincial, Víctor Prieto asinou no Libro de Honra da Deputación, convidado polo presidente Manuel Baltar, quen afirmou que o goberno provincial "apoia e está ao carón de persoas que levan o nome de Ourense polo mundo adiante desenvolvendo actividades destacadas, como é este caso, no ámbito da creatividade cultural e musical".

Manuel Baltar recibe ao alcalde de Piñor, José Luis González

Ourense, 21 de xullo de 2015.- O presidente da Deputación de Ourense, Manuel Baltar, recibiu hoxe no Pazo Provincial ao alcalde de Piñor, José Luis González, na primeira visita do rexedor local á institución provincial desde o inicio do seu mandato municipal. Baltar e González falaron de temas de ámbito social, cultura, económico e de infraestruturas, así como de mellora de viais do municipio de Piñor, asuntos nos que o goberno provincial ven cooperando cos concellos da provincia de Ourense e que na lexislatura 2015-2019 teñen cabida no Plan OU15-19 deseñado e promovido por Manuel Baltar.

Manuel Baltar e a alcaldesa de Melón analizan o Plan urbanístico, que promoverá melloras no municipio

  • Na reunión tamén acordaron que a Deputación de Ourense colaborará nos traballos de desmontaxe e traslado da estrutura do pavillón de deportes.

Ourense, 20 de xullo de 2015.- O presidente da Deputación de Ourense, Manuel Baltar, recibiu no Pazo Provincial á alcaldesa de Melón, Cristina Francisco, con quen analizou o plan urbanístico, que promoverá melloras no municipio. A alcaldesa informou tamén ao presidente provincial dos proxectos para mellorar o acceso ao pobo de A Ponte e o incremento das zonas verdes e espazos de lecer, reintegrando na zona pública un cruceiro que o seu día era público e que actualmente se atopa nunha propiedade privada.

Asemade, prevese a apertura dun vial dende a N-120 ata o velorio, co obxectivo de que os autobuses poidan efectuar as paradas evitando a incomodidade actual que supón para na mesma estrada.

Cristina Francisco estima que no vindeiro mes de setembro estea aprobado definitivamente o Plan especial de protección do patrimonio, que actualmente conta cos informes vinculantes da Confederación Hidrográfica Miño-Sil, da Consellería de Medio Ambiente, da Deputación de Ourense e da Dirección Xeral de Patrimonio dos ministerios de Industria e Fomento.

O Plan especial afectará á contorna do mosteiro e aos proxectos urbanísticos programados nas zonas próximas ao monumento, entre os que figuran a construción dun aparcadoiro e dun centro socio-cultural e deportivo onde hoxe se atopa a estrutura do pavillón, que será desmontada e reincorporada ao novo edificio co apoio da Deputación de Ourense. Precisamente, na reunión Manuel Baltar e Cristina Francisco acordaron que a Deputación de Ourense colaborará nos traballos de desmontaxe e traslado da estrutura do pavillón de deportes. A Dirección Xeral de Patrimonio emitiu informe favorable ao Plan especial de mosteiro e seu entorno, resolución que autoriza a construción do dito edificio para actividades sociais, culturais e deportivas no mesmo lugar onde actualmente se atopa a estrutura do pavillón.

A Deputación de Ourense e a Academia Arxentina das Letras editarán a obra de Francisco Luís Bernárdez

  • Manuel Baltar recibiu hoxe no Pazo Provincial a José Luis Moure, presidente do ente académico, quen asinou no Libro de Honra do goberno provincial.

Ourense, 20 de xullo de 2015.- A Deputación de Ourense e a Academia Arxentina das Letras traballarán conxuntamente para editar a obra do xornalista, poeta, diplomático e galeguista Francisco Luís Bernárdez, a quen se lle dedicou este ano a VII "Festa da Palabra" que o pasado sábado se celebrou na Insua dos Poetas, na Esgueva (Madarnás, O Carballiño). Así o acordaron hoxe na reunión que mantiveron no Pazo Provincial o presidente da Deputación, Manuel Baltar, e o presidente da Academia Arxentina das Letras, José Luis Moure, quen estivo acompañado pola súa dona, Alejandra, e polo poeta e presidente do PEN Galicia, Luís González Tosar.

O encontro tivo lugar no despacho do presidente do goberno provincial, onde o doutor Moure asinou no Libro de Honra da Deputación de Ourense. Na reunión, Manuel Baltar explicoulle os proxectos que nos ámbitos culturais e da emigración está a desenvolver a institución provincial, en concreto os referidos ao Museo Galego da Emigración e á candidatura da Ribeira Sacra como Patrimonio Mundial, proxectos que contan co apoio de José Luis Moure, quen é precisamente fillo dun ourensán de Banga e que estes días "vive unha volta ás orixes", como el mesmo definiu a súa viaxe a Galicia.

Moure interveu o pasado sábado na VII Festa da Palabra, unha celebración na que se reivindicou a figura de Francisco Luís Bernárdez (Bos Aires 1900-1978). A súa vida e obra recóllese agora nun libro no que varios autores rescatan do esquecemento a este ilustre galeguista, e como afirmou o poeta e presidente do Pen Galicia, Luís González Tosar, coordinador da publicación, "é de necesidade manter viva a lembranza de quen fixo tanto pola nosa lingua e pola nosa cultura". O volume que recolle a traxectoria vital e profesional de Bernárdez é unha edición que conta co apoio da Deputación de Ourense, da Xunta e do Pen Galicia.