A organización da "Vuelta a España" 2016 estima que o retorno económico mínimo para a provincia de Ourense será de 1,5 millóns de euros

  • A organización da "Vuelta a España" 2016 estima que o retorno económico mínimo para a provincia de Ourense será de 1,5 millóns de euros.

  • Manuel Baltar e Javier Guillén reuníronse hoxe no Pazo Provincial para analizar a repercusión económica e social e para definir o modelo de etapa que terá a proba ciclista

  • Cinco días completos de todo o operativo suporán a ocupación de 2.500 prazas nos establecementos hoteleiros da capital e da provincia de Ourense.

Ourense, 29 de setembro de 2015.- O presidente da Deputación de Ourense, Manuel Baltar, e o director xeral da "Vuelta a España", Javier Guillén reuníronse hoxe no Pazo Provincial para para analizar a repercusión económica e social e para definir o modelo de etapa que terá a proba ciclista española en 2016, un evento deportivo dos máis importantes do mundo do que a organización estima que terá un retorno económico mínimo de 1,5 millóns de euros para a provincia de Ourense.

Cinco días completos de todo o operativo –ciclistas, equipos técnicos e persoal administrativo, así como medios de comunicación e público en xeral-, suporán a ocupación de 2.500 prazas nos establecementos hoteleiros da capital e da provincia de Ourense, ao que hai que sumar os gastos de manutención e o impacto publicitario e promocional que este gran operativo terá en positivo para a provincia de Ourense.

Baltar e Guillén concordaron en destacar a importancia que ten o feito de que a primeira etapa se dispute en Ourense, "xa que implica que os equipos permanezan máis días na nosa provincia e o feito de ser o punto de partida engade un atractivo especial tanto para afeccionados como para medios de comunicación pola expectación que xera o inicio dunha das probas ciclistas máis importantes do calendario internacional", explica o presidente do goberno provincial.

O anuncio de que por primeira vez na historia desta proba a "Vuelta" sairá da provincia de Ourense fixérono público o pasado 11 de setembro Manuel Baltar e Javier Guillén, acompañados da directora da Axencia Galega de Turismo, Nava Castro, algo que fi cualificado como "unha excelente noticia" polo presidente do goberno provincial quen destaca que será "un magnífico escaparate para difundir toda a nosa riqueza natural, artística, histórica e turística, con enclaves tan singulares como a Ribeira Sacra".

"A importante repercusión mediática da "Vuelta" contribuirá a destacar a singularidade de que a provincia de Ourense é un dos destinos termais máis importantes do mundo", afirma Baltar, destacando o ámbito internacional que acada o termalismo na nosa provincia –centro da eurorrexión Galicia-Norte de Portugal- e os aspectos técnicos, paisaxísticos e de infraestruturas termais "que fan de Ourense un dos territorios do mundo con mellores condicións para actividades turísticas, de lecer e terapéuticas neste eido, fortalecido todo elo polo Plan "Ourense, a provincia termal" que lle dará a este sector estratéxico o impulso necesario para converter aínda máis ao termalismo nun dos grandes motores da economía ourensá".

A Escola Provincial de Danza inicia o curso 2015-2016 o 5 de outubro

Ourense, 30 de setembro de 2015.- A Escola Provincial de Danza do Centro de Cultura Popular "Xaquín Lorenzo" da Deputación de Ourense inicia o vindeiro luns, 5 de outubro, o curso 2015-2016 para as actividades de Baile, Pandeireta e Canto, e de Gaita para acompañamento de grupos de baile, así como o Obradoiro de Tecido Tradicional. As clases impartiranse de luns a venres de 17.30 a 21.00 horas e poden participar todas as persoas maiores de 5 anos.

A matrícula continuará aberta durante o mes de outubro ata cubrir as prazas dispoñibles. Os interesados en participar poderán realizar a matrícula no local da Escola de Danza situado no Centro Comercial "As Lagoas", na praza Daniel González, onde se pode recoller o formulario de inscrición e onde haberá que cubrir unha ficha cos datos persoais e adxuntar unha fotografía. O horario de oficina durante o mes de setembro será de 9.00 a 14.30 horas.

Para máis información poden chamar ao teléfono 988317880 ou a través dos correos electrónicos This email address is being protected from spambots. You need JavaScript enabled to view it. ou This email address is being protected from spambots. You need JavaScript enabled to view it. .

Manuel Baltar clausura os actos do 50º aniversario do Polígono de San Cibrao das Viñas

  • "A gran virtude dos pioneiros que construíron o Polígono foi que creron e apostaron por Ourense, con paixón e grandes doses de ilusión e emprendemento", expresou o presidente do goberno provincial.

Ourense, 28 de setembro de 2015.- O presidente da Deputación de Ourense, Manuel Baltar, foi o encargado de clausurar os actos conmemorativos do 50º aniversario do Polígono de San Cibrao das Viñas. Tanto no evento celebrado na denominada "Arboreda do tempo" –na que se plantaron 50 árbores en homenaxe aos anos que trascorreron desde a creación do polígono- como na gala que tivo lugar no Auditorio Municipal de Ourense, Baltar tivo palabras de agradecemento para a Asociación de Empresarios, representada na persoa do seu presidente, Elías Mera, e para persoeiros como Ricardo Martín Esperanza, David Ferrer, Eduardo Barreiros, Eulogio Gómez Franqueira, Olano Gurriarán, Ángel Mario Carreño, Ángel Ruiz Fildago, López Ramón, Manuel Gómez-Franqueira, Fernández Julbe e Manuel Rodríguez de la Fuente, "porque todos eles e moitos máis pertencen á historia con maiúsculas de Ourense".

"Para triunfar hai que atreverse, e os que puxeron en marcha este polígono e todas as empresas que integran este motor económico de Galicia tamén se atreven. Un día tiveron unha idea, apostaron, arriscaron e triunfaron. Fixeron unha aposta polo seu patrimonio pero tamén unha aposta polo noso territorio: creron en Ourense", expresou Manuel Baltar.

O presidente do goberno provincial lembrou que foi a Deputación de Ourense quen promoveu, daquela, a creación da Caixa de Aforros Provincial de Ourense e que conxuntamente con esta entidade "foi tamén un dos primeiros actores que puxo en valor esta zona industrial da nosa provincia, para situala como un referente galego e español".

Amor, paixón e corazón foron, en opinión de Manuel Baltar, os elementos que conformaron o cerne do Polígono industrial de San Cibrao das Viñas. "O tan demandado enlace coa A-52 é importante, por suposto que si, pero máis o son os seus empresarios e ese asociacionismo que puxo en valor o polígono e que fai que hoxe, acertadamente, celebremos os seus cincuenta anos", afirmou o presidente provincial, quen engadiu que aínda queda moito por vir "a este territorio que deu sobradas mostras do seu bo facer como pobo traballador, creativo e emigrante que é; un territorio de talento que non o sería tanto se non tivese un espazo como o Polígono de San Cibrao para dar renda solta a esa imaxinación que fai deste Ourense un ilusionante proxecto colectivo. O goberno provincial está e seguirá estando ao seu carón para potencialo, para promovelo e para loitar por Ourense".

Os actos contaron coa presenza, ademais de Manuel Baltar, do conselleiro de Industria, Francisco Conde; dos alcaldes de San Cibrao da Viñas e de Ourense, Manuel Fernández e Jesús Vázquez; do presidente da Asociación de Empresarios do polígono, Elías Mera, e en representación dos empresarios, directivos das tres primeiras firmas que se instalaron no polígono: Barreiros Ourense (CIE Galfor), Muebles Calvo e Orember (Finsa).

No acto que tivo lugar na "Arboreda do Tempo", ao carón do edificio multiusos do polígono e no que colaborou a Real Banda de Gaitas da Deputación de Ourense interpretando como peche o Himno Oficial de Ourense, as autoridades descubriron unha placa de homenaxe cos nomes de todas as empresas que nestes cincuenta anos integraron e integran esta área empresarial, e púxose en valor a importancia dos datos económicos que xera o polígono, que conta con 8.000 traballadores e 360 empresas instaladas na actualidade e cuxa facturación supón o 20 % do PIB provincial, cunha porcentaxe de actividade industrial que é o 10 % do total da provincia, todo elo nunha superficie de 4,8 millóns de metros cadrados.

Baltar propón un novo financiamento local, abordado conxuntamente co autonómico

  • Na conferencia que ofreceu hoxe no Fórum Europa, en Santiago, titulada "Reformulando a política provincial", reivindicou a inclusión da FEMP no Consello de Política Fiscal e Financeira.

  • O presidente da Deputación de Ourense pide "un gran pacto político demográfico" ante o problema da crise demográfica, "que leva aparellada unha consecuencia clara: a perda de peso específico dun territorio".

  • Destacou a transparencia como "liña estratéxica institucional" e que o Plan Ourense 15-19 do goberno provincial "inclúe a posta en marcha da primeira Plataforma Provincial de Participación Cidadá de España".

  • "As negociacións para conformar o meu goberno duraron once horas, as que estiveron abertos os colexios electorais o 24 de maio. Un pacto coas veciñas e veciños de Ourense".

  • No que atinxe á situación catalana, Baltar avogou polo diálogo: "Nin a Constitución nin o Estatuto son inmutables; non son o problema, son a solución, porque fixan procedementos para reformalos".

Santiago de Compostela, 28 de setembro de 2015.- O presidente da Deputación de Ourense, Manuel Baltar, protagonizou hoxe en Santiago o almorzo-coloquio do "Fórum Europa Tribuna Galicia", que organiza Nueva Economía Fórum, coa conferencia titulada "Reformulando a política provincial". O acto, que tivo lugar no Parador dos Reis Católicos, contou coa presenza de máis de douscentos asistentes dos ámbitos institucional, político, empresarial, cultural e social. Manuel Baltar foi presentado pola presidenta do Consello Económico e Social, Corina Porro.

Na cuarta ocasión que participa nesta tribuna de debate e opinión –as anteriores foron en 2010, 2012 e 2014-, Manuel Baltar reivindicou a inclusión da Federación Española de Municipios e Provincias (FEMP) no Consello de Política Fiscal e Financeira. Baltar, que desde o pasado 20 de setembro forma parte da Xunta de Goberno da FEMP, pediu tamén "un gran pacto político demográfico" ante o problema da crise demográfica, "que leva aparellada unha consecuencia clara: a perda de peso específico dun territorio". "Trátase –dixo- dunha grave ameaza que esixe un gran pacto político con medidas urxentes a todos os niveis territoriais. Aprobar unha folla de ruta común inatacable, sen terreo para a demagoxia, sen frivolidade política, sen utilización partidista. Con actuacións que equilibren o territorio, que non abran máis fendas e que reduzan as existentes".

Asemade, destacou a transparencia como "liña estratéxica institucional" e dixo que o Plan Ourense 15-19 –o documento que marca a senda do goberno provincial ourensán neste período- "inclúe a posta en marcha da primeira Plataforma Provincial de Participación Cidadá de España"

Baltar tivo tamén un recoñecemento para concelleiras e concelleiros, alcaldes e alcaldesas, "eses que saben que ser alcalde é bastante máis que reducilo déficit ou o prazo de pago medio a provedores. A política é algo máis. A política entra no terreo dos sentimentos e das emocións, das aspiracións do colectivo, dun benestar que non se mide só coas estatísticas", e destacou que a política municipal, o contacto permanente cos dirixentes dos concellos, "proporciona a seguridade de contar co pulso dun territorio, dunha provincia. O contacto reiterado ao longo do mes, do ano, do mandato. Falar cunha media diaria de 16 alcaldes ou alcaldesas proporciona unha foto moi aproximada da realidade e das expectativas dunha comunidade", expresou.

A importancia da provincia

Manuel Baltar afirmou que a provincia "non é só unha circunscrición electoral" e dixo que "visión" e "cooperación" son palabras clave para facer provincia. "Para min a máis importante é "visión". E saúdo a tese doutoral que se está a elaborar na universidade galega, por Jardón Ferreiro baixo a dirección do doutor Orosa, sobre a creación dunha marca territorial baseada na identidade competitiva como estratexia de posicionamento xeo-local: a Ourensanía. Unha tese que terá a oportunidade de expoñerse en México, na Universidade Autónoma de Ciudad Juárez, no XV Congreso Internacional sobre Integración Rexional, Fronteiras e Globalización. Unha oportunidade para estudar a aplicabilidade dos postulados teóricos do Place Branding aos 7.273 km2 do territorio ourensán".

Financiamento

Manuel Baltar expresou a súa convicción de que estamos no momento "de abordar a reforma do sistema de financiamento de comunidades autónomas e entes locais. Unha abordaxe que debe practicarse de xeito simultáneo: subsistema autonómico e subsistema local. Ao mesmo tempo para que non haxa preponderancia de un sobre o outro e para deseñalo tendo en conta unha perspectiva de conxunto, ideal para a acción política duradeira. Pensemos sempre no medio e longo prazo e fuxamos do "curtopracismo". Un momento histórico no que chegou tamén a obriga de contar co municipalismo español no Consello de Política Fiscal e Financeira. Será entón o momento de completar a frase citada e falar de "unha administración, unha competencia, un financiamento"-

Novo escenario

Baltar dixo que o 24 de maio abriuse un escenario "onde pasei de ser o presidente de deputación galega con menos tempo no cargo ao presidente decano dos gobernos provinciais galegos, por obra e graza das urnas. As negociacións para conformar goberno provincial duraron once horas, exactamente as que transcorreron dende a apertura dos colexios electorais ata o seu peche. Un acordo cos cidadáns de Ourense. Non presidentes sorpresa nin presidentes por comenencia. Presidente que quería ser presidente. Non perder nin un minuto dende o escrutinio".

Transparencia

Referíndose á transparencia, Manuel Baltar destacou que se trata "dunha actitude, unha liña estratéxica institucional que habita nun piar inexcusable na democracia, tal e como a entendemos hoxe en día", e engadiu que na democracia actual, seguindo o pensamento de Jurgen Habermas, "temos que escribir con maiúsculas verbas como SOCIEDADE, DIÁLOGO, ÉTICA, PARTICIPACIÓN, DELIBERACIÓN e INCLUSIÓN. Cuestións que desenvolvín cando falei e escribín da "democracia substantiva". E anunciou que proximamente "poremos en marcha a primeira Plataforma Provincial de Participación Cidadá do Estado. Unha das medidas do "Plan Ourense 15-19".

Manuel Baltar defende a innovación e o coñecemento como verdadeiras ferramentas de progreso, e neste sentido dixo que Ourense "é unha provincia, unha deputación, que segue con interese modelos de desenvolvemento territorial e de xestión pública como os casos de Tilburg nos Países Baixos ou Curitiba no Brasil, e moi de cerca apostas polo emprendemento como a gañadora de Israel. Sen dúbida un modelo exitoso do seu ecosistema de innovación, tratándose do país coa maior concentración de innovación e emprendemento, a maior cantidade de start up per capita e a maior porcentaxe de PIB investido en I+D+i para uso civil".

Cataluña

No que atinxe á situación catalana, Baltar avogou polo diálogo: "Nin a Constitución nin o Estatuto son inmutables; non son o problema, son a solución, porque fixan procedementos para reformalos". Afirma que ámbalas dúas "establecen as normas precisas e o número de apoios para aprobar esa reforma. Eu mesmo participei nun intento de reforma do Estatuto de Autonomía para Galicia, perfectamente posible e nalgúns aspectos necesarios para adaptalo á realidade que non é a de 1981. España ten a Constitución que quere e terá a Constitución que queira. E Galicia ten o Estatuto que quere e terá o Estatuto que queiran galegas e galegos. Nunca é tarde para o diálogo e a negociación cando existe vontade política. Así é como aparecen puntos de encontro e intereses comúns".

Finalmente, en clave galeguista, Manuel Baltar referiuse á necesidade de "reconquistar Galicia para si mesma, coa sensatez e a firmeza intelectual do pensamento e da acción dun galeguista exemplar, Carlos Casares, quen non dubidou en asumir responsabilidades políticas, cando foi necesario, para axudar a construír o país soñado, a nación das palabras". Neste senso, expresou que a nosa sociedade, a galega, "é aberta ás transformacións e respectuosa coa tradición. A Galicia aldea e a Galicia cidadán, a base rural, a base mariñeira e o pulo urbano. A Galicia do pan e do viño, a dos rebuldeiros areais da beiramar e a do grave silencio da montaña, "acabada simbolización das fontes vitais deste noso país", en acertada definición de Otero Pedrayo".