Deputación e balnearios de Ourense presentan o máis completo programa de España en ocio e saúde termal

  • A convocatoria ábrese mañá con modalidades de estancias de 6 días e fins de semana, tratamentos de termalismo e "viaxes termais" dende máis de 40 estacións de tren.

  • Manuel Baltar afirma que esta é "unha aposta irrenunciable polo desenvolvemento dunha liña estratéxica e singular para impulsar a competitividade e promoción, entre outros, dos sectores termal e turístico da provincia de Ourense".

Ourense, 9 de febreiro de 2015.- O presidente da Deputación de Ourense, Manuel Baltar, e os representantes dos balnearios da provincia asinaron hoxe no Pazo Provincial o "Convenio de colaboración para o fomento do termalismo saudable e a cultura termal" 2015, unha iniciativa que supón a posta en marcha do máis completo programa de España no que atinxe a ocio e saúde termal.

A convocatoria ábrese mañá para todos os beneficiarios que desexen inscribirse no programa. Inclúe modalidades de estancias de 6 días ou de fins de semana nos cinco establecementos balnearios da provincia de Ourense: Arnoia, Laias e Lobios, pertencentes ao grupo Caldaria, e os de Baños de Molgas e O Carballiño, aos que se sumará en breve o Balneario de Cortegada. O programa tamén contempla tratamentos de termalismo, actividades culturais e "Viaxes termais" dende máis de 40 estacións de tren de diferentes comunidades autónomas, que inclúen prezos especiais nos billetes e traslados dende a estación de Ourense aos balnearios, ida e volta.

Manuel Baltar asinou o convenio con Rafael Luaña, representante do Grupo Caldaria Termal; Eduardo Laherrán, do balneario de Baños de Molgas, e José María de la Figuera, do Gran Balneario de Carballiño. Tamén estiveron presentes no acto de sinatura os alcaldes dos concellos ourensáns que contan con establecementos balnearios: Lobios, Cenlle, O Carballiño, Baños de Molgas, Arnoia e Cortegada, e o director da Área de Benestar da Deputación de Ourense, José Juan Cerdeira, quen explicou os aspectos técnicos do programa de "Termalismo saudable 2015".

O presidente do goberno provincial dixo que esta é "unha aposta irrenunciable polo desenvolvemento dunha liña estratéxica e singular para impulsar a competitividade e promoción, entre outros, dos sectores termal e turístico da provincia de Ourense", e engadiu que a cooperación entre as administracións pública e o sector privado "amosa unha vez máis as fortalezas desta colaboración, o que nos permite hoxe presentar o primeiro programa de España destas características, que incorpora entre as súas melloras a posibilidade que só en 5 minutos a través de Internet os interesados poida tramitar a súa solicitude e dispoñer da documentación para a súa estancia termal".

Manuel Baltar afirmou que coa presentación días pasados en Fitur do Plan "Ourense, a provincia termal", coa colaboración co Concello de Ourense para a estratexia de fondos europeos, e coas accións de promoción internacional como a levada a cabo coa incorporación ao programa de termalismo dos cidadáns da eurocidade Chaves-Verín, "estamos a pasar das palabras aos feitos impulsando un sector diferencial e competitivo que, coa chegada da alta velocidade, poderá converterse nun dos motores económicos da nosa provincia".

O programa de Termalismo saudable 2015 estima poder superar este ano a cifra de mil beneficiarios. En 2014 foron 730 as persoas que se inscribiron neste programa, sendo 1 de cada 3 beneficiarios de fóra da provincia de Ourense. En opinión de Rafael Luaña "este programa, único en España, permítenos promocionar adecuadamente o denominado "ouro branco", que non é outro que o termalismo da provincia de Ourense, contribuíndo así a manter a actividade e o emprego nos establecementos termais".

Tramitación de solicitudes on line

A Deputación de Ourense, por medio da súa Área de Benestar, publica hoxe no BOP o Programa de Termalismo Saudable 2015 "Ourense, a provincia termal", unha actuación enmarcada no ámbito das políticas sociais que oferta servizos de saúde, benestar e envellecemento activo a través do termalismo social baseado nos beneficios -en termos de calidade de vida- que ofrecen as propiedades terapéuticas das augas declaradas como mineiro-medicinais, os servizos médicos asociados ao seu desfrute e as actividades socioculturais que se prestan nas instalacións termais da provincia de Ourense.

A xestión do programa realízase a través da administración electrónica para que o beneficiario poida tramitar a súa solicitude dende calquera lugar e a calquera hora, obtendo unha resposta inmediata e en tempo real sen demoras nin retrasos. No mesmo momento no que o cidadán realiza a solicitude on-line obtén a resolución da administración. A presentación de solicitudes por Internet pódese facer a través da páxina web http://termalismo.depourense.es dende mañá martes e a solicitude-resolución on-line obtense ao momento. Tamén se poden tramitar as ditas solicitudes a través dos Servizos sociais dos concellos.

Programas

Programa de Estancias Termais de 6 días/5 noites: este programa contempla estancias de luns a sábado que inclúen 5 noites de aloxamento, pensión completa, 10 tratamentos termais con asesoramento médico e animación sociocultural. Os requisitos para poder participar neste programa son: ter cumpridos os 50 anos de idade e non padecer enfermidade nin alteración ou contraindicación médica que dificulte a normal convivencia nos establecementos balnearios.

Programa de fins de semana-cultura termal: aberto a maiores de 18 anos, consiste en estancias en balnearios para unha ou dúas persoas, puidendo estar acompañadas dun menor de ata 12 anos. O programa inclúe pensión completa, 2 técnicas de balneario por persoa e acceso ilimitado ás piscinas termais.

Programa de tratamentos termais: inclúe 20 técnicas de balneario durante 10 días. Este programa é para persoas que teñan cumpridos os 50 anos.

Programa de estancias de 6 días + tren: este programa (xestionado a través da web: www.trenbalnearios.com) engade ás estancias de 6 días o desprazamento en tren dende máis de 40 estacións de ferrocarril e o traslado ao balneario. Entre as estacións figuran: A Coruña, Albacete, Alacante, Astorga, Barcelona, Bilbao, Burgos, Cáceres, Calatayud, Cartagena, Castellón, Córdoba, Cuenca, Girona, León, Lleida, Madrid, Málaga, Monforte Murcia, Palencia, Ponferrada, Pontevedra, Segovia, Santiago de Compostela, Sevilla, Valencia, Vigo, Zamora e Zaragoza, entre outras.

Con este último programa preténdese poñer en valor a función social do tren e as altas prestacións das novas infraestruturas ferroviarias así como a progresiva posta en marcha de novos traxectos de alta velocidade y as posibilidades que elo ofrece ao cidadán. No programa está implicada de forma moi activa Renfe Viajeros S.A, a través da creación dunha tarifa especial dende cada estación de orixe e integrando a xestión dos billetes de tren dentro do contido do programa, de maneira que o beneficiario obtén o billete de tren coa propia solicitude da súa participación no programa, sen necesidade de realizar unha xestión específica para o desprazamento.

Este acordo entre a Deputación de Ourense e Renfe para as viaxes termais permitirá que todos os luns, de febreiro a decembro, os viaxeiros que desexen pasar un días gozando das bondades do termalismo poidan viaxar á provincia de Ourense aproveitando excelentes ofertas de viaxe en tren, traslados e estancias en balnearios dende máis de 40 das principais estacións de ferrocarril de España, combinando as liñas regulares de tren co posterior traslado incluído aos establecementos balnearios da provincia ourensá.

Preténdese así incrementar a competitividade do sector termal provincial cun modelo que poida sentar as bases e aproveitar, dentro de tres anos, toda a potencialidade da chegada do AVE a Ourense e as reducións de tempos que xa se producirán este ano 2015 grazas á apertura de novos tramos de alta velocidade na viaxe entre Madrid e Ourense.

A Deputación de Ourense presenta o primeiro programa transfronteirizo de termalismo España-Portugal

  • Os cidadáns da eurocidade Chaves-Verín poderán este ano participar no programa de Termalismo Saudable "Ourense, a provincia termal" que ofrece tratamentos, servizos médicos e actividades socio-culturais nas instalacións balnearias da provincia de Ourense.

  • Manuel Baltar asinou hoxe na sede da eurocidade o convenio de colaboración co alcalde de Verín e o vicepresidente da Cámara Municipal de Chaves.

Ourense, 6 de febreiro de 2015.- A Deputación de Ourense é o primeiro goberno provincial que pon en marcha un programa de termalismo social transfronteirizo España-Portugal, permitindo aos residentes da eurocidade Chaves-Verín beneficiarse do programa de Termalismo Saudable "Ourense, a provincia termal" que desenvolve a institución provincial, e que ofrece tratamentos termais, servizos médicos e actividades socio-culturais nas instalacións balnearias da provincia de Ourense.

O presidente do goberno provincial, Manuel Baltar asinou hoxe na sede da eurocidade co alcalde de Verín, Juan Jiménez, e co vicepresidente da Cámara Municipal de Chaves, Carlos Penas, o convenio de colaboración que permitirá aos cidadáns portugueses residentes en Chaves participar do programa de Termalismo Saudable en igual condición que os empadroados en calquera municipio da provincia de Ourense, en virtude da súa pertenza á eurocidade Chaves-Verín.

O Programa de Termalismo Saudable 2015 significa a extensión por primeira vez dunha política social desenvolvida por unha administración provincial española aos cidadáns do país veciño en base da súa pertenza a unha Agrupación Europea de Cooperación Territorial (AECT) como é a eurocidade Chaves-Verín.

En opinión de Manuel Baltar, "esta iniciativa supón un impulso máis ao desenvolvemento dun sector estratéxico para a provincia de Ourense como é o Termalismo, unha aposta inequívoca do goberno provincial por potenciar unha das nosas singularidades, e agora, coa internacionalización da nosa riqueza termal, favoreceremos a promoción non só do noso termalismo senón tamén do noso patrimonio, turismo, gastronomía e medio natural".

A igualdade de trato entre os cidadáns empadroados en calquera municipio de Ourense e os cidadáns residentes en Chaves-Verín, que recolle o Programa de Termalismo Saudable, é coherente coa asunción do concepto das Agrupacións Europeas de Cooperación Territorial, "unha identidade xurídica que facilita o recoñecemento da nova dimensión transfronteiriza para aproveitar as oportunidades que esta situación de privilexio xeográfico concede aos residentes de ámbolos dous lados da fronteira", explica Manuel Baltar.

Ocio e saúde

A Deputación de Ourense, por medio da súa Área de Benestar, publicará no BOP o próximo 9 de febreiro o Programa de Termalismo Saudable 2015 "Ourense, a provincia termal", unha actuación enmarcada no ámbito das políticas sociais que oferta servizos de saúde, benestar e envellecemento activo a través do termalismo social baseado nos beneficios -en termos de calidade de vida- que ofrecen as propiedades terapéuticas das augas declaradas como mineiro-medicinais, os servizos médicos asociados ao seu desfrute e as actividades socioculturais que se prestan nas instalacións termais da provincia de Ourense.

O programa contempla distintas modalidades nas que poden participar os cidadáns que cumpran os requisitos de idade que cada modalidade esixe, con independencia do concello de España no que residan, se ben a subvención á que aceden é maior se están empadroados nalgún municipio da provincia de Ourense ou residen na eurocidade Chaves-Verín.

A xestión do programa realízase a través da administración electrónica para que o beneficiario poida tramitar a súa solicitude dende calquera lugar e a calquera hora, obtendo unha resposta inmediata e en tempo real sen demoras nin retrasos. No mesmo momento no que o cidadán realiza a solicitude on-line obtén a resolución da administración.

Asemade, as bases reguladoras do Programa 2015 tamén contemplan o papel das "Entidades Adheridas", unha figura ideada para todas aquelas entidades que queiran proporcionar apoio tecnolóxico aos seus cidadáns a través da xestión das solicitudes.

Os organismos interesados poderán xestionar solicitudes ao programa, para o cal, previamente, terán que asinar un convenio coa Deputación de Ourense que os acredita como "Entidade Adherida" ao programa. Desta maneira, os cidadáns poderán xestionar as súas solicitudes a través dos Servizos Sociais da eurocidade, tanto os de Verín como os de Chaves, converténdose a AECT e os concellos que a conforman nos primeiros en adquirir a condición de "Entidade Adherida" ao programa de Termalismo Saudable 2015 da Deputación de Ourense.

O proxecto "LIFE Regenera Limia" porá en marcha máis de vinte actuacións para mellorar a conca do río Limia

 

  • A Deputación de Ourense e o Inorde, socios do proxecto, participan en investigacións sobre fertilizantes e xurros, e poñendo a disposición 10 hectáreas de terreo para actividades prácticas en xestión de fertilizantes.

Ourense, 5 de febreiro de 2015.- O Ministerio de Agricultura, Alimentación e Medio, a través da Confederación Hidrográfica Miño-Sil, investirá máis de dous millóns de euros (2.053.000 €) na posta en marcha do proxecto "LIFE Rexenera Limia", que nace co obxectivo de recuperar a calidade medioambiental do río Limia ao seu paso por esta bisbarra de Ourense mediante máis dunha vintena de actuacións.

Este proxecto, que foi elixido pola Comisión Europea de entre preto de 1.500 candidaturas, pretende aplicar un conxunto de medidas preventivas e de rexeneración para reducir os nutrientes de orixe gandeira nas masas de auga da conca do río Limia, para cumprir cos obxectivos medioambientais que establece a Directiva Marco da Auga e a normativa de transposición á lexislación española.

A Casa da Cultura de Xinzo de Limia acolleu hoxe unha xornada na que os socios do proxecto explicaron as diferentes técnicas que se utilizarán para mellorar a conca do río. A xornada foi inaugurada polo presidente da Deputación de Ourense, Manuel Baltar; o presidente da CH Miño-Sil, Francisco Marín; a directora xeral de Conservación da Natureza, Verónica Tellado, e o alcalde de Xinzo de Limia, Antonio Pérez, e contou tamén coa participación de representantes das empresas Ecolagunas e Gas Natural, así como de Alberto de Anta, xefe da Área de Xestión Ambiental da CH Miño-Sil, quen explicou as actividades do proxecto.

A Deputación de Ourense e o Inorde, socios do proxecto, participan en investigacións sobre fertilizantes e xurros, e poñendo a disposición 10 hectáreas de terreo para actividades prácticas en xestión de fertilizantes.

O presidente da Deputación de Ourense, Manuel Baltar, destacou no acto de inauguración "a importancia da cooperación público-privada que nos une neste proxecto, que aporta para a comarca da Limia -a máis importante no ámbito agrario de Galicia- un traballo rigoroso e necesario para achegar solucións medioambientais co fin de conseguir que A Limia e, por extensión, a provincia de Ourense sexan máis "verdes" e melloren o seu medio ambiente".

O proxecto europeo "LIFE Regenera Limia" ten como obxectivo levar a cabo accións preventivas no ámbito medioambiental na cunca do río Limia para facer compatible a actividade gandeira co bo estado das masas de auga da comarca da Limia.

Xestión de residuos gandeiros

En concreto, hoxe presentáronse 26 accións entre as que destaca o desenvolvemento de solucións alternativas para a xestión dos residuos gandeiros, destinadas a reducir o seu impacto no medio ambiente a través zonas húmidas artificiais intensivas de macrófitos. Trátase de crear un sistema de lagoas artificiais como proxecto piloto de tratamento de zurros de porcino por medio de métodos naturais de depuración.

Ao mesmo tempo, considérase a creación e posta en marcha dun sistema de control Integrado de xestión de fertilizantes e estercos en chans agrarios que permita un emprego máis eficiente destes, reducindo as achegas difusas de nutrientes ás augas, traballo no que participa a Deputación de Ourense.

Está previsto tamén a reconversión das antigas explotacións mineiras de extracción de area na Canle de Antela nun sistema lagunar de pozas que potencien a capacidade de depuración natural do curso fluvial e que contribúa á recuperación de espazos húmidos na ZEPA da Limia.

Tamén se levará a cabo a recuperación ambiental dos leitos fluviais modificados e a rexeneración e reconexión de sistemas laguares para reducir a presenza de nutrientes na auga e a eutrofización, á vez que se recuperarán os ecosistemas locais de especial transcendencia en espazos incluídos na Rede Natura 2000.

Coa posta en marcha destas actuacións espérase que unha vez que finalice o proxecto, que terá unha duración de tres anos, se reduza a concentración de nutrientes na auga, o uso de fertilizantes (un 30% menos), o de estercos (un 50% menos) e que haxa un 40% menos de gases de efecto invernadoiro.

O programa contempla tamén accións de formación e información aos sectores máis afectados, estando prevista a participación de aproximadamente un millar de persoas no conxunto das actuacións previstas.

A xornada de hoxe completouse cun foro de debate no que se analizou o estado das masas de auga da bacía do Limia, as redes de control e investigación da calidade das augas, o emprego de boas prácticas como garantía de rendemento agrícola e as boas prácticas nos ámbitos agrícola, gandeiro e forestal.

No proxecto, cofinanciado polo programa LIFE da Unión Europea, participan como socios beneficiarios a Xunta de Galicia -a través da Consellería de Medio Ambiente, Territorio e Infraestruturas-, a Deputación de Ourense, o Inorde, as empresa Ecolagunas e Coren, o sector gandeiro e Gas Natural como colaborador financeiro.

Toda a información do proxecto está dispoñible na web www.regeneralimia.org.

As obras do río Badella, en Bande, permiten a mellora medioambiental desta contorna fluvial

  • Manuel Baltar visitou as obras xunto co presidente da CH Miño-Sil, o subdelegado do Goberno e o alcalde de Bande, uns traballos nos que se investiron 430.000 €.

Ourense, 4 de febreiro de 2015.- O presidente da Deputación de Ourense, Manuel Baltar, xunto co subdelegado do Goberno en Ourense, Roberto Castro; o presidente da Confederación Hidrográfica Miño–Sil, Francisco Marín; o alcalde de Bande, José Antonio Armada, e a deputada Ana Belén Vázquez, visitaron hoxe as obras de acondicionamento do leito e marxes do río Badella ao seu paso por Bande, unhas actuacións nas que o Ministerio de Agricultura, Alimentación e Medio Ambiente investiu 430.000 euros para a mellora medioambiental desta contorna fluvial.

Estas actuacións están incluídas no programa operativo de financiamento con cargo aos Fondos de Desenvolvemento Rexional (Feder), e contan coa participación e apoio cidadán das poboacións implicadas, co obxectivo de levar a cabo actuacións para a mellora medioambiental no ámbito do río. Os traballos foron financiados nun 80% a través de fondos europeos e o 20% restante foi sufragado polo propio organismo de conca. O Concello de Bande, pola súa banda, puxo a disposición os terreos necesarios para a execución das obras.

As actuacións comezaron coa demolición, limpeza e roza dalgúns elementos inadecuados situados no leito e marxes do río Badella, entre eles o antigo matadoiro municipal situado no leito do río. Posteriormente procedeuse á construción de camiños peonís para a conseguir un corredor fluvial natural de máis de 1.2 quilómetros á altura do antigo matadoiro municipal e ata as proximidades do pavillón de deportes, unidos por un pontón próximo ao núcleo urbano.

O proxecto tivo como obxecto resolver o alto grao de degradación ambiental que presentaba o río Badella, potenciando a integración do río no núcleo urbano e permitindo a convivencia de ámbolos dous para o desfrute de actividades de ocio no ámbito fluvial.