Último pleno da lexislatura 2011-2015 na Deputación de Ourense

  • Manuel Baltar agradeceu ás deputadas e deputados o traballo realizado ao longo destes catro anos.

Ourense, 11 de xullo de 2015.- A Deputación de Ourense celebrou esta mañá os últimos plenos da lexislatura 2011-2015. Foron dúas sesións extraordinarias, de apenas cinco minutos de duración, da Xunta Xeral de Urbaourense e do Pleno da corporación provincial nas que se aprobaron as actas das sesións anteriores, correspondentes ás ordinarias do 24 de abril de 2015.

A sesión plenaria serviu de despedida para os membros que integraron a corporación durante esta lexislatura, e ao remate da mesma o presidente da Deputación de Ourense, Manuel Baltar, agradeceu ás deputadas e deputados o traballo realizado ao longo destes catro anos.

Manuel Baltar dixo que foi unha lexislatura na que a Deputación e a provincia melloraron. "A Deputación de Ourense gañou en converterse nun instrumento transformador da provincia, e na seguinte lexislatura o obxectivo é seguir mellorando". Baltar agradeceu a colaboración de todos os grupos políticos afirmando que houbo moitos puntos que se aprobaron por unanimidade, "e o goberno coa súa iniciativa foi quen de situar á Deputación á vangarda dos gobernos provinciais de España, facendo axustes duros en materia de persoal pero dando a razón o tempo, como demostra o remanente de Tesourería de 2014, con máis de 25 millóns de euros; gañando en identidade provincial, como por exemplo coa aprobación do Himno Oficial da Provincia de Ourense, o coa celebración da primeira Conferencia nacional de presidentes de gobernos provinciais".

Manuel Baltar citou tamén proxectos e medidas importantes postos en marcha nesta lexislatura como son a Carta de Servizos máis completa de España, o primeiro Código Ético, a Ordenanza de Transparencia ou o feito de ser convidada a Deputación de Ourense a presentar no Comité das Rexións, en Bruxelas, para expoñer as razóns que xustifican a transformación experimentada polo goberno provincial. "A actividade desenvolvida foi grande, pero nada comparado co que ben –explicou o presidente-. O noso reto ven marcado por unha actitude de autoesixencia permanente, así será o chamamento que lle farei aos grupos da oposición, con quen me reunín xa antes da constitución da corporación, que terá lugar o vindeiro 14 de xullo".

O presidente do goberno provincial subliñou que a Deputación de Ourense foi a única institución que, ano tras ano, nun contexto de crise económica tan importante, "foi aumentando os seus orzamentos", e citou a "cooperación" como palabra clave. "Estamos no núcleo duro da Fundación Democracia e Goberno Local e tamén integramos a asociación de concellos máis importante de España despois da FEMP como é a Federación de Concellos con Centrais Hidroeléctricas, que engloba a máis de 1.200 municipios de España, e ademais entraremos a formar parte de Partenalia, a asociación europea de gobernos locais intermedios". "Son moitos os aspectos salientables –remarcou Manuel Baltar-, pero se tivera que destacar un sería a estabilidade institucional".

A constitución da corporación provincial da lexislatura 2015-2019 terá lugar nunha sesión plenaria que se celebrará o vindeiro martes, 14 de xullo, no Salón de Plenos da Deputación de Ourense.

Deputación de Ourense e Xunta estudan fórmulas de xestión para o "Museo do Viño de Galicia"

  • Manuel Baltar recibiu hoxe no Pazo Provincial ao conselleiro de Cultura, Román Rodríguez, con que analizou aspectos organizativos do que será o único museo destas características en Galicia.

  • Na xuntanza abordaron tamén o tema da tramitación da candidatura da Ribeira Sacra como Patrimonio Mundial, que terá o vindeiro 18 de xullo un acto no que estarán presentes as deputacións de Ourense e Lugo, a Xunta e o Valedor do Pobo.

Ourense, 10 de xullo de 2015.- O presidente da Deputación de Ourense, Manuel Baltar, recibiu hoxe no Pazo Provincial ao conselleiro de Cultura, Educación e Ordenación Universitaria, Román Rodríguez, con que analizou posibles fórmulas de xestión para o que será o futuro "Museo do Viño de Galicia", que se está a construír na antiga rectoral de Santo André de Camporredondo, en Ribadavia. Baltar e Rodríguez concordaron en que ámbalas dúas institucións levarán a cabo formulas de colaboración para a xestión do museo –o único destas características na comunidade autónoma- "estando a Deputación de Ourense totalmente receptiva a establecer liñas de cooperación para que as instalacións se poidan explotar convenientemente, tanto no que atinxe a temas de infraestruturas, equipamentos, persoal ou no ámbito de promoción turística", explicou o presidente do goberno provincial.

O museo, do cal están a piques de rematar as obras de construción, situarase na rectoral de Santo André, a tres kilómetros de Ribadavia, un edificio do século XVIII que albergou a granxa vinícola máis importante que o mosteiro de San Martiño Pinario tivo en Galicia.

Na xuntanza, Manuel Baltar e Román Rodríguez tamén analizaron o tema da candidatura da Ribeira Sacra como Patrimonio Mundial, e avanzaron que o vindeiro 18 de xullo terá lugar no mosteiro de San Pedro de Rocas (Esgos) un acto no que participarán os presidente das deputacións de Ourense e Lugo, Manuel Baltar e Elena Candia; o conselleiro de Cultura e o Valedor do Pobo, no cal se abordará o estado de tramitación da candidatura e o Valedor fará entrega ao conselleiro de Cultura dos informes técnicos para o expediente de declaración da Ribeira Sacra como Patrimonio Mundial.

Días pasados, en relación con este tema, Manuel Baltar participou no Parlamento de Galicia no acto de presentación da memoria científica do proxecto da Ribeira Sacra. O paso seguinte será a solicitude de expediente BIC por parte da Consellería de Cultura. O proceso para chegar ate este informe, no que se detallan as especificidades e criterios técnicos que avalan a candidatura, deu comezo en xuño de 2014 cando as deputacións de Ourense e Lugo asinaron co Valedor do Pobo un convenio de colaboración para que este coordinase un equipo académico multidisciplinar co obxectivo de elaborar a memoria científica que se xuntará á candidatura da Ribeira Sacra como Patrimonio Mundial diante da Unesco.

Os traballos técnicos desenvolvéronos expertos nas áreas temáticas de Produción agrícola e formas de cultivo; Xeografía física; Edafoloxía; Botánica; Patrimonio cultural (Historia, Historia da Arte, Arqueoloxía, Arquitectura e Antropoloxía); Economía aplicada e Produción vitivinícola. O documento enviarase ao Ministerio de Cultura para a súa presentación polo Reino de España -unha vez aprobada polo Consello do Patrimonio Histórico Español- ante o Centro de Patrimonio Mundial para que sexa avaliada polo Comité do Patrimonio Mundial.

Comedia, drama e teatro clásico, nas "XXVIII Noites teatrais de Vilamarín"

  • A Deputación de Ourense acolleu hoxe a presentación deste certame, un dos máis importantes de Galicia no ámbito das artes escénicas no verán, que terá lugar do 14 ao 17 de xullo.

Ourense, 10 de xullo de 2015.- Comedia, drama e teatro clásico serán os xéneros protagonistas nas "Noites teatrais de Vilamarín", un dos certames máis importantes no ámbito das artes escénicas de Galicia, que este ano chega á súa 28ª edición. Organizadas polo Concello de Vilamarín e coa colaboración da Deputación de Ourense "as Noites teatrais son unha referencia fixa e notable no calendario teatral do verán en Galicia", destacou o vicepresidente da Deputación de Ourense, Rosendo Fernández, quen estivo acompañado no acto de presentación polo alcalde de Vilamarín, Amador Vázquez; o secretario xeral de Cultura da Xunta de Galicia, Anxo Lorenzo, e a concelleira de Cultura de Vilamarín, Marina Rodríguez.

Rosendo Fernández afirmou que este proxecto "é froito da colaboración entre institucións públicas e privadas, e supón unha excelente maneira de espallar a cultura pola nosa provincia, algo no que a Deputación está e estará sempre, pois iniciativas como esta contribúen ao desenvolvemento social e cultural dos nosos concellos".

Amador Vázquez agradeceu o apoio da Deputación de Ourense e da Xunta, así como de Mariluz Villar e de Luis Rodríguez Míguez, "quen durante quince anos impulsaron as Noites Teatrais e foron quen de darlle o pulo para convertelas no gran certame que hoxe son". O alcalde lembrou que cada ano preto de dúas mil persoas pasan polos espectáculos que ofrecen as Noites, "un público que chega de diferentes lugares de Galicia e que atopa en Vilamarín unha oferta cultural atractiva para o lecer e o goce das artes escénicas".

Pola súa banda, Anxo Lorenzo recoñeceu o esforzo que ao longo destes 28 anos leva facendo Amador Vázquez e todo o equipo que fai posible as Noites Teatrais, "un evento que este ano conxuga o teatro profesional co afeccionado, algo que é moi de salientar, como tamén o feito de que este evento poña en valor o labor que fan as persoas que traballan no ámbito da escena en Galicia, tanto actores, como directores, dramaturgos e técnicos".

O programa desta edición das Noites Teatrais, segundo explicou Marina Rodríguez, desenvolverase entre os días 14 e 17 de xullo, ás 22.30 horas, ofrecéndolle ao público no Auditorio municipal de Vilamarín dúas comedias: "A louca historia de Galicia", que pon en escena o día 15 de xullo a compañía Fulano, Mengano e Citano; e "Chévere", o 17 de xullo, a cargo de "As fillas bravas", compañía gañadora do Premio Nacional de Teatro en 2014. O programa complétase o día 14 con "III", drama baseado no texto "Ricardo III" de William Shakespeare e representado pola Aula de Teatro Universitario de Ourense "Maricastaña"; e o 16 de xullo coa obra de teatro clásico "Cyrano", a cargo de Teatro Galileo.

Manuel Baltar clausurou a asemblea anual da Confederación Empresarial de Ourense

Ourense, 9 de xullo de 2015.- O presidente da Deputación de Ourense, Manuel Baltar, clausurou hoxe a asemblea xeral ordinaria 2015 da Confederación Empresarial de Ourense (CEO), nun acto que tivo lugar no Centro Cultural Afundación da capital ourensá. Xunto ao presidente dos empresarios de Ourense, José Manuel Pérez Canal, e o presidente da Confederación de Empresarios de Galicia (CEG), José Manuel Fernández Alvariño, o presidente do goberno provincial apelou á “reafirmar a idea de crer en Ourense”, sublimando que a institución provincial “mantén abertas liñas de colaboración coa entidade empresarial ourensán” e cuxa continuidade garantiu para os vindeiros anos. Citando a Thomas John Watson, presidente de IBM, Manuel Baltar dixo, referíndose ao mundo empresarial, que para ter éxito “tes que poñer o corazón nos teus negocios e teus negocios no corazón”.