A Deputación de Ourense adxudicou a obra do parque dos Catro Camiños do Carballiño

  • Suporá un investimento de 50.000 euros e consistirá na substitución do solo de area por un de caucho e a mellora dos accesos.

Ourense, 20 de outubro de 2015.- A Deputación de Ourense adxudicou a obra de mellora no espazo público do barrio dos Catro Camiños, no concello do Carballiño, cumprindo así un compromiso que o ente provincial adquirira no seu día cos veciños e veciñas do Carballiño. O deputado responsable da área de Cooperación do organismo provincial, Pablo Pérez xunto coa deputada provincial, Teresa Cerdeira, visitaron as instalacións do parque infantil carballiñés. Pablo Pérez asegurou que esta axuda "reitera o compromiso da Deputación de Ourense cos concellos da provincia, colaborando para que os nenos e nenas ourensáns teñan espazos públicos de calidade nos que poder xogar".

A área pública localizada no barrio dos Catro Camiños, está claramente diferenciada en dúas zonas, unha para os máis cativos e outra para persoas de maior idade, e será na primeira delas onde se efectuará esta intervención. As obras que se realizarán na zona do parque infantil, basearanse na substitución da area da zona de xogos que en moitas épocas do ano resulta inservible, por caucho. Ademais modificarase o pavimento das zonas de paso que serán en pedra e adaptando mellor as zonas de entrada ao recinto, coa colocación de pavimento que evite a entrada de animais.

Mariluz Barreiros, Premio "Ourensanía 2015"

  • O xurado emitiu o ditame hoxe na Casa dos Poetas, en Celanova, destacando da premiada ser a promotora e presidenta da Fundación "Eduardo Barreiros", dedicada á perpetuación da memoria do impulsor da industria do automóbil na España de mediados do século XX.

  • A entrega do premio terá lugar no Teatro Principal de Ourense o 11 de novembro, día de San Martiño, xornada do patrón da Ourensanía.

Ourense, 19 de outubro de 2015.- A presidenta da Fundación "Eduardo Barreiros", Mariluz Barreiros, ven de ser recoñecida co Premio "Ourensanía 2015", un galardón que concede a Deputación de Ourense como recoñecemento honorífico a aqueles ourensáns ou persoas vinculadas á provincia de Ourense que teñen destacado nas súas facetas profesionais, sociais ou intelectuais.

O xurado, reunido hoxe na Casa dos Poetas, en Celanova, constituído para a ocasión en virtude do acordo da Xunta de Goberno da Deputación provincial de Ourense e presidido polo seu titular, Manuel Baltar, emitiu seu ditame destacando: "Logo de teren deliberado sobre as diversas propostas presentadas e valoradas as súas traxectorias biográficas nos máis que sobrados valores e recoñecementos que todas elas ostentan no ámbito do que representa o concepto da Ourensanía, acordou concederlle o Premio "Ourensanía 2015" a Mariluz Barreiros Ramos, filla do exemplar empresario ourensán Eduardo Barreiros Rodríguez, como promotora e actual presidenta da Fundación Eduardo Barreiros, dedicada á perpetuación da memoria do seu pai no rol de impulsor da industria da automoción na España de mediados do século XX, así como ao fomento da investigación no campo da tecnoloxía do automóbil, ademais de á difusión cultural de todo canto ten que ver co mundo do motor, exemplo do cal son o premio bianual "Eduardo Barreiros", a creación de bolsas de estudos de postgrao relacionadas coa enxeñería do automóbil ou o Museo "Eduardo Barreiros", situado en Valdemorillo (Madrid) e que pasa por ser a primeira mostra monográfica dedicada a unha figura relevante do mundo da automoción en España".

A acta salienta que, con este recoñecemento, o xurado desexa personalizar en Mariluz Barreiros a toda a familia Barreiros Rodríguez, incluíndo nela á súa nai Dorinda Ramos -tamén ourensá- e aos irmáns de Eduardo, Valeriano, Graciliano e Celso, orixinarios da parroquia de San Miguel do Campo (Nogueira de Ramuín) "onde Eduardo comezou a despuntar moi novo como un admirable emprendedor adiantado ao seu tempo e con cuxa actividade chegou a fomentar a creación de 25 mil postos de traballo directos e a xerar máis de 100 mil empregos indirectos".

A concesión deste quinto galardón da Ourensanía a Mariluz Barreiros coincide, non de xeito casual, coa conmemoración do 50 aniversario da creación do polígono de San Cibrao das Viñas, dado que unha das súas liñas industriais, a actual Galfor S.A., foi unha das tres primeiras empresas que apostou por instalarse nunha área industrial que, con 320 empresas alí asentadas e máis de 8.000 traballadores asistindo diariamente a ela, constitúe hoxe en día un dos principais motores económicos da provincia de Ourense.

O xurado fai tamén unha mención explícita á etapa final de Eduardo Barreiros como promotor da industria automobilística na Habana dos anos 80, "onde o seu papel de incombustible emprendedor chegou a acadar límites certamente transgresores e incluso heroicos, moi propios dos valores que representa a Ourensanía, ao conseguir reproducir na Cuba de Fidel Castro o sistema de produción industrial da automoción baseado na transformación dos motores de gasolina en motores diésel, que tantos éxitos nacionais e internacionais lle concedera na antagónica España dos anos 50 e 60".

A entrega do galardón terá lugar no Teatro Principal de Ourense o día 11 de novembro, día de San Martiño, xornada indiscutible do patrón da Ourensanía, e contará cunha ampla representación de persoeiros dos ámbitos social, cultural, económico e institucional. No transcurso deste acto, o presidente da Deputación de Ourense entregaralle á premiada unha figura de bronce do escultor Xosé Cid, ademais dunha copia da presente acta, que dá fe do premio.

Finalmente, é desexo do xurado aproveitar a súa estadía na Casa dos Poetas de Celanova para deixar constancia de que hai agora dez anos, este mesmo espazo tan simbólico para a literatura galega foi a Casa de acollida do primeiro acto de reafirmación da Ourensanía, concretamente o día 12 de novembro de 2005.

O xurado, presidido polo presidente da Deputación de Ourense, Manuel Baltar, estivo integrado por Antonio Piñeiro, secretario da Fundación Curros Enríquez (quen actuou como secretario do xurado), e os vogais: Luís González Tosar, presidente do PEN Club de Galicia; Virxilio Rodríguez, vicerreitor do Campus de Ourense; Jesús de Juana, director da UNED en Ourense, Eva Torres, directora do Museo Municipal de Ourense, e Juan Luís Saco, catedrático e intelectual.

O Inorde presenta as Xornadas Ferroviarias na estación Baños de Molgas

  • As actividades desenvolveranse os días 22, 23 e 24 de outubro.

Ourense, 19 de outubro de 2015.- As Xornadas Ferroviarias na estación de Baños de Molgas que terán lugar os días 22, 23 e 24 de outubro, foron presentadas esta mañá no Pazo Provincial da Deputación de Ourense. No acto estivo presente o presidente do Inorde, Rosendo Fernández; o xerente do Inorde, Jose Manuel Rodríguez; e o coordinador das xornadas, Francisco Gil.

"Tras o bo resultado do proxecto europeo "Estaciones Vivas", foi concedido ao Inorde un reforzo financeiro para realizar novas accións como estas xornadas ferroviarias", asegurou Rosendo Fernández, e engadiu, "teñen como obxectivo apostar pola promoción turística das Estacións en base aos usos para os que foron dotadas", dende auténticos museos itinerantes de tradición e paixón, ata a recreación da historia do ferrocarril, pasando por unha homenaxe a Moncho Borrajo, xunto con outras estacións dedicadas a albergues turísticos.

Este proxecto que está cofinanciado polo Programa Operativo de Cooperación Transfronteriza España-Portugal (POCTEP), consistiu na rehabilitación de seis infraestruturas ferroviarias en desuso, na provincia de Ourense e o Funicular de Santa Luzia en Viana do Castelo, "co obxectivo de dotalas de valor e permitir a súa sostibilidade futura", afirmou o presidente do Inorde.

En canto á programación das xornadas vanse tratar "distintos aspectos que están relacionados co mundo do ferrocarril dende o punto de vista etnográfico, histórico, cultural e patrimonial", asegurou Francisco Gil. Entre as actividades do día 22 atópase a inauguración das xornadas, unha proxección comentada polo autor do documental "Carrilanos, los túneles de un tiempo", así como un debate. Ao día seguinte terá lugar a fabricación de ferrocarrís en miniatura, unha mesa redonda, a visita ás Estacións do Inorde, entre outras actividades que se contemplan no programa. O día 24 os participantes terán a opción de facer un recorrido turístico pola Ribeira Sacra.

Manuel Baltar afirma que investir en coñecemento e innovación "sitúa aos territorios na vangarda"

  • O presidente do goberno provincial inaugurou hoxe en Ourense a VI Xornada científica da Asociación Galega de Médicos Forenses destacando "o labor e os investigadores que nesta rama da medicina temos en Galicia".

Ourense, 16 de outubro de 2015.- O presidente da Deputación de Ourense, Manuel Baltar, dixo hoxe no acto de inauguración da VI Xornada científica da Asociación Galega de Médicos Forenses que investir en coñecemento e innovación "sitúa aos territorios na vangarda", e destacou "o labor e os investigadores que na rama da medicina forense temos en Galicia".

O presidente do goberno provincial participou no acto de inauguración xunto ao forense Fernando Serrulla, membro do comité organizador, e ao xefe territorial da Consellería de Presidencia da Xunta de Galicia en Ourense, Manuel Pardo Cid. Baltar destacou a colaboración entre Deputación de Ourense e Xunta de Galicia "para levar a cabo accións formativas e de divulgación científica como é esta xornada, na que se dan cita expertos forenses de España, Portugal e Estados Unidos", e na que teñen especial relevancia os temas de plena actualidade sobre os que se debaten, centrados todos na medicina e psicoloxía forense do ancián.

Neste senso, ao longo de toda a xornada, que está co-organizada pola Deputación de Ourense e a Asociación Galega de Médicos Forenses, ofreceranse relatorios sobre "Internamento psiquiátrico involuntario no ancián", "Instrumentos de avaliación en anciáns nos procesos de incapacidade civil", "Causas de morte xudicializada de anciáns", "Prevención da accidentalidade de maiores", "Maltrato ao ancián", e no ámbito internacional un relatorio sobre "Causas de morte en maiores no Norte de Portugal". O programa complétase con talleres sobre "Técnicas de autopsia" e "Entrevista clínica".

Fernando Serrulla agradeceu á Deputación de Ourense e a Manuel Baltar "o apoio que por parte do goberno provincial tivemos dende o primeiro momento para levar a cabo a organización e desenvolvemento da xornada" e destacou "o éxito de convocatoria, dado o número de expertos nacionais e internacionais que se dan cita neste evento científico no Centro Cultural "Marcos Valcárcel" da Deputación de Ourense".