"Espazo abisal", exposición de María José Pulido no Centro Cultural "Marcos Valcárcel"

O Centro Cultural "Marcos Valcárcel" da Deputación de Ourense inaugurou o pasado martes a exposición ESPAZO ABISAL, da pintora María José Pulido, nun acto no que ademais da artista estiveron presentes o vicepresidente da Deputación, Rosendo Fernández, o editor Bieito Ledo, o crítico de arte Xabier Limia de Gardón e o director do centro cultural, Francisco González.

Afincada en Barcelona, María José Pulido regresa á súa cidade natal (Ourense) para amosarnos o seu "Espazo Abisal", no Centro Cultural "Marcos Valcárcel" da Deputación. Son cadros que reproducen un ambiente entre imaxinario e real, un hábitat que se move nas augas profundas do océano: "Este espazo sérveme de pretexto para desenvolver un paralelismo entre seres concretos e fantásticos", afirma. A artista aborda a obra "dunha forma poética, pretendendo amosar unha variedade máis rica cá simple dualidade".

Trazos cromáticos, nos que se intúen formas que se moven en medio de sombras de luz, sitúan a proposta de María José Pulido entre dous mundos: "Atráeme a figuración, pero non o realismo". Así, crea seres recoñecibles, pero transformados polo maxín da artista como reflexo do recordo que queda ao evocalos. Xeometría, xustaposición de planos e fusión dimensional caracterizan as obras desta exposición.

María José Pulido, licenciada en Belas Artes pola Universidade San Carlos de Valencia, tamén realizou estudios na Escola de Cinematografía de Barcelona e tivo becas en Passau (Alemania), Monterrey (México) e Lima (Perú). Ademais de pintura, ten realizado traballos de deseño gráfico, edición audiovisual e performance. Entre outros lugares, os seus traballos estiveron no MACBA (2004), Arteleku (2005), Festival de Berlín (2006) ou no Reina Sofía (2012).

A Deputación de Ourense porá en marcha un plan piloto de mantemento de estradas municipais e provinciais, que comezará en Trives

  • Manuel Baltar visitou a estación de montaña de Cabeza de Manzaneda e mantivo unha reunión con alcaldes da comarca.

O presidente da Deputación de Ourense, Manuel Baltar, anunciou na súa visita á comarca de Trives que a institución provincial porá en marcha no ano 2015 un plan piloto de conservación e mantemento da rede de estradas de titularidade provincial e municipal co obxectivo de contribuír cos concellos á mellora destas vías de comunicación. Así llo comunicou Baltar aos representantes municipais cos que mantivo unha reunión de traballo hoxe, previa á visita que o presidente provincial realizou ás instalacións da estación de montaña de Cabeza de Manzaneda.

Manuel Baltar, quen estivo acompañado por técnicos do Servizo de Vías e obras da Deputación de Ourense, comprometeuse a que sexa a comarca de Trives a primeira na que se leve a cabo este plan piloto de mantemento e conservación de estradas, e tamén anunciou melloras na OU-0703, a principal estada de acceso a Cabeza de Manzaneda dende Trives.

Na xuntanza, na que estiveron presentes os alcalde de Chandrexa de Queixa, Manzaneda e Trives e o tenente alcalde de San Xoán de Río, Baltar explicou que esta actuación en infraestruturas viarias "levarase a cabo en 2015 nunha comarca que consideramos estratéxica para o desenvolvemento dun sector tan importante como é o turismo, un sentir que compartimos dende a Deputación cos alcaldes da comarca que así no lo transmitiron".

Posteriormente, Manuel Baltar percorreu as instalacións da estación de montaña acompañado polo responsable da xestión do complexo, Arturo Rodríguez, para coñecer as melloras realizadas coas achegas que a Deputación de Ourense destinou o ano pasado á estación de montaña, en total 150.000 euros para investimentos de carácter tecnolóxico. A colaboración da institución provincial este ano centrarase en diversos programas promocionais e de difusión da estación de montaña.

O "Campamento da Ourensanía" nace co obxectivo de concienciar aos máis novos na defensa da natureza e do patrimonio da provincia de Ourense

  • As actividades de lecer, que se desenvolverán no albergue do Corgo (Muíños) o vindeiro mes de agosto, van dirixidas a nenos e nenas de entre 9 e 14 anos.

Concienciar aos máis novos sobre a importancia da defensa da natureza e do medio ambiente, e ampliar os seus coñecementos sobre o patrimonio material e inmaterial da provincia de Ourense son os obxectivos do Campamento da Ourensanía "Explora Ourense", que, promovido pola Deputación de Ourense en colaboración co colectivo Sustinea, terá lugar entre os días 9 ao 14 de agosto no albergue do Corgo (Muíños), dirixido a nenos e nenas de entre 9 e 14 anos. Esta actividade foi presentada hoxe no Pazo Provincial a cargo do asesor de Cultura da Deputación de Ourense, César Fernández, e do representante de Sustinea, Paulo Vázquez.

"Trátase –segundo explicou César Fernández- de crear entre os máis cativos unha verdadeira conciencia de ourensanía, de que aprecien e coñezan as cousas importantes que nos ofrece a provincia de Ourense en todos os aspectos, dende o cultural ao etnográfico pasando pola nosa riqueza paisaxística, natural e monumental".

"Ao longo dos seis días no campamento os monitores actuarán de guías para os rapaces, ensinándolles os recursos naturais e patrimoniais da nosa provincia", comentou Paulo Vázquez, quen deu conta das diversas actividades que se desenvolverán nestas xornadas de convivencia, con días dedicados ao Bosque, os Animais, a Aldea e os Ríos, nos que os participantes realizarán roteiros ambientais polo Xurés, travesías náuticas polo encoro das Conchas ata o campamento romano de Aquis Querquennis, visitas á aldea de Salgueiro para coñecer o funcionamento dun antigo forno e mesmo rutas para descubrir pegadas de animais.

O programa de actividades complétase con descubertas etnográficas, exercicios de orientación e de coñecemento de especies autóctonas, e un obradoiro gastronómico con produtos naturais.

É a primeira vez que a Deputación de Ourense por en marcha unha iniciativa deste tipo, habilitando para elo un total de 80 prazas para nenos e nenas que queira participar neste campamento de verán. O custe, coa estancia de 5 noites/6 días en pensión completa, é de 75 € por participante, e os interesados poden realizar a súa inscrición a través da web www.exploraourense.com. A data límite de inscrición é o día 18 de xullo.

O Centro Cultural inaugura unha exposición sobre a India e Nepal do fotógrafo Plácido L. Rodríguez

O Centro Cultural "Marcos Valcárcel" da Deputación de Ourense inaugura esta tarde, ás 20.15 horas, unha exposición sobre a India e Nepal do fotógrafo ourensán Plácido L. Rodríguez. A mostra, titulada "Arquitecturas da alma" recolle en 40 fotografías pasaxes da vida cotiá dos habitantes destes dous países así como fermosas paisaxes, "todo un mundo de espiritualidade, cores e aromas que impregna ao viaxeiro dende o primeiro momento que visita estas terras", explicou o artista, quen define a naturalidade e a bonhomía como trazas características dos habitantes da India e de Nepal, "o que permite ao fotógrafo realizar o seu traballo coa calma e a reflexión necesarias".

A presentación do catálogo e da exposición tivo lugar esta mañá neste mesmo espazo expositivo, e contou coa presenza, ademais do autor, do vicepresidente da Deputación de Ourense, Rosendo Fernández; do director do Centro Cultural, Francisco González, do autor do texto do catálogo, Manuel Blanco Luis, e do asesor de Cultura da institución provincial, César Fernández.

O máis destacado da exposición, en palabras de Manuel Blanco Luis, "é como soubo Plácido L. Rodríguez captar a mirada dos personaxes retratados nas fotografías, pois a través destas miradas un pode atoparse cunha cultura fascinante e complexa, e mesmo semella que son estas fotos as que nos miran a nós e non nós a elas".

Espiritualidade, vida, morte e unha chea de existencias tan naturais como anónimas é o que nos ofrece esta mostra que permanecerá en exposición ata o vindeiro 15 de agosto no Centro Cultural para que os amantes da fotografía e das viaxes poidan contemplala dende unha visión crítica e emotiva ao mesmo tempo.