Manuel Baltar: "A exposición sobre o COB é unha homenaxe a toda a xente que fixo posible o ascenso, situando a Ourense noutra dimensión deportiva, social e económica"

  • O presidente do goberno provincial participou hoxe na inauguración da mostra, organizada polo xornal La Región, que se exhibe na rúa do Paseo para poñer en valor o ascenso do equipo á ACB.

Ourense, 18 de setembro de 2015.- O presidente da Deputación de Ourense, Manuel Baltar, participou hoxe na rúa do Paseo de Ourense na inauguración da exposición "Somos unha cidade de Basquet", organizada polo xornal La Región para poñer en valor o ascenso do COB á ACB e recoñecer o apoio da cidadanía ao equipo. Xunto a Manuel Baltar, no acto participaron tamén o alcalde de Ourense, Jesús Vázquez, e o director de La Región, Sechu Pastoriza.

O presidente do goberno provincial dixo que as imaxes e portadas do xornal que se exhiben nesta mostra "reflicten non só un ascenso deportivo senón unha nova dimensión na que se sitúan a cidade e a provincia nos ámbitos social, cultural e económico co ascenso do COB, algo que nos merecemos porque sen o apoio da xente non sería posible celebrar esta nova etapa", e engadiu que esta iniciativa "supón unha homenaxe que eu agradezo ao grupo de comunicación La Región porque o acadado polo COB é un logro para recordalo e vivilo intensamente, tendo en conta ademais que é o único club que ten garantida na tempada 2016-2017 a súa presencia na ACB, algo que non pode dicir ningún outro equipo de España".

Manuel Baltar subliñou que iso "é crer en Ourense, unha provincia ambiciosa de seu, coa que a Deputación está e seguirá estando, e para min, que vivín o COB desde dentro, é un motivo emocionalmente máis que importante. Saudamos a súa presenza na alta competición e animamos a toda a xente que estivo apoiando a tope ao club a que o siga facendo nesta vindeira tempada, porque Ourense estará con forza e garra pisando duro na alta competición, pois o COB non é novato, esta será a terceira vez que estea na ACB, e agardamos que sexa o inicio dunha época de estabilidade no cumio do baloncesto nacional".

Pola súa banda, o alcalde de Ourense destacou que o ascenso do COB "supuxo un revulsivo e un motivo ilusión, porque como cidade necesitamos ese sentimento de pertenza que vai asociado, entre outros aspectos, ao COB", e convidou á cidadanía a que visite a exposición "para lembrar eses momentos de ledicia que estou seguro se repetirán".

O director de La Región, Sechu Pastoriza, dixo que a mostra "é unha homenaxe a unha provincia e unha cidade que merece estar na elite do deporte, do baloncesto, como é o caso, pero tamén na elite doutros moitos ámbitos aínda non ben explorados nin recoñecidos". "Pretendemos que esta mostra sirva para amosarnos que podemos pelexar polos soños e conseguir que se cumpran".

A Deputación de Ourense entrega axudas a 56 deportistas da provincia

 

  • Nesta edición, por primeira vez, tivo lugar o recoñecemento a un técnico deportivo ourensán de disciplinas individuais.

Ourense, 18 de setembro de 2015.- O Salón de Actos do Centro Cultural "Marcos Valcárcel" acolleu esta tarde a tradicional entrega das axudas aos deportistas ourensáns da Deputación de Ourense. No acto estivo presente o vicepresidente do ente provincial, Rosendo Fernández; o deputado de deportes, Juan Anta; e o director do Servizo de Deportes do Pazo dos Deportes "Paco Paz", Ángel Cid.

En total, foron 56 os deportistas ourensáns que recibiron axudas do ente provincial en distintas modalidades deportivas: ximnasia, ciclocross-btt, atletismo, remo, piragüismo, natación, xadrez, ximnasia, halterofilia, doma clásica, billar, taekwondo, boccia, wu-shu, jiu-jitsu e tiro olímpico.

Nesta edición e, por primeira vez, tivo lugar o recoñecemento público a un técnico deportivo ourensán de disciplinas individuais, que nesta ocasión foi designado a adestradora de ximnasia, María Isaura Hermida Pérez, con case trinta anos exercendo como técnico de ximnasia. Ademais é a única persoa en España que posúe 5 titulacións das 6 modalidades ximnásticas.

Este recoñecemento realízase por entender que a mellora na formación e rendemento dos deportistas ourensáns, teñen nos técnicos un dos seus piares básicos e fundamentais.

Manuel Baltar e Francisco Marín visitan as obras da ponte sobre o río Airoa

  • Deputación de Ourense e CHMS achegan a partes iguais o investimento para a reconstrución da infraestrutura, 116.900 euros.

Ourense, 17 de setembro de 2015.- O presidente da Deputación de Ourense, Manuel Baltar, e o presidente da Confederación Hidrográfica Miño-Sil (CHMS), visitaron esta mañá as obras de construción da ponte sobre o río Airoa no Concello dos Blancos. Os traballos da obra consistiron na construción dun paso sobre o río Airoa para dar continuidade á estrada municipal que une as poboacións dos Blancos e Nóveas, debido ao mal estado no que se atopaba a infraestrutura polas continuas crecidas do caudal, que afectou á seguridade estrutural do mesmo, ademais de dificultar o seu tránsito polas gretas que presentaba a vía. Desta maneira, construíuse un novo pontón sobre o río na confluencia deste coa estrada municipal, adaptado ás características de desaugadoiro establecidas no plan hidrolóxico.

Este proxecto de reconstrución da ponte no municipio dos Blancos foi financiado por ambas entidades que achegaron cada unha delas o 50% do importe total da obra, que ascendeu a 116.900 euros. Con esta actuación dáse continuidade a unha vía pública que facilita o paso entre os veciños e veciñas dos Blancos e de Nóveas que actualmente non podían empregar esta infraestrutura debido as condicións que presentaba.

Rosendo Fernández participa na presentación de "Termatalia 2015"

 

  • A 15ª edición deste certame celebrarase en Expourense entre o 24 e o 26 de setembro.

Ourense, 17 de setembro de 2015.- O vicepresidente da Deputación de Ourense, Rosendo Fernández, participou esta mañá na presentación de Termatalia 2015 en Expourense. A 15ª edición deste certame celebrarase en Expourense entre o 24 e o 26 de setembro.

Termatalia cumpre o seu décimo aniversario como feira internacional superando os datos de participación ata o momento. Conta cunha participación de 39 países e 279 expositores, cunha importante presenza de América Latina e tamén de Europa, que a converten na cita de referencia mundial do turismo de saúde, posicionando ademais a Galicia e a Ourense como centros de capacitación profesional en materia de termalismo.

No acto de presentación tamén estivo presente a directora de Turismo de Galicia, Nava Castro; o alcalde de Ourense, Jesús Vázquez; o presidente do Clúster de Turismo de Galicia, Francisco González; o director territorial de ABANCA en Ourense, Rubén Saavedra, o delegado territorial da Xunta, Rogelio Martínez; e o director de Termatalia, Alejandro Rubín.