Manuel Baltar visita os concellos de Maceda e Esgos

Ourense, 23 de abril de 2018.- Infraestruturas, cultura, deporte e medio ambiente son os ámbitos que centraron a visita, hoxe, do presidente da Deputación de Ourense, Manuel Baltar, aos concellos de Maceda e Esgos, onde se reuniu cos alcaldes destes municipios, Rubén Quintas e Mario Rodríguez, respectivamente. En Maceda, o presidente do goberno provincial analizou co rexedor local temas de infraestrutura viaria, proxectos futuros en materia cultural e a colaboración entre deputación e concello nos ámbitos deportivo e social, visitando ademais a escola infantil municipal "Contacontos". En Esgos, Manuel Baltar tratou co alcalde temas referidos á colaboración entre ámbalas dúas administracións en materia medioambiental e de abastecemento de auga a varios núcleos de poboación, e visitou a contorna da que será a futura biblioteca municipal-aula da cultura, obra que se levará a cabo restaurando dúas antigas palleiras.

A Deputación de Ourense conmemorará o centenario da escritora Pura Vázquez

  • Manuel Baltar afirma que esta "é a homenaxe da provincia de Ourense a autora por excelencia da literatura para nenos e mozos na nosa lingua".

  • Nunha efeméride tan especial, os 100 anos do seu nacemento, a Deputación quere honrar a memoria de quen tivo sempre como orixe e meta o público infantil e xuvenil, ao cal dedicou o seu saber e a súa altura intelectual e docente", destaca o presidente.

Ourense, 21 de abril de 2018.- A Deputación de Ourense está a ultimar os actos conmemorativos do centenario da escritora e mestra Pura Vázquez, nacida en 1918 no barrio do Polvorín da capital ourensán. Así o confirmou o presidente da Deputación de Ourense, Manuel Baltar, quen afirma que este "é un recoñecemento da provincia de Ourense para quen deu todo da súa intelectualidade en favor da súa terra: docencia, creatividade e saberes culturais, que van máis aló das letras, pois Pura Vázquez era o sentimento feito palabra pola súa Ourense, a autora por excelencia da literatura para nenos e mozos na nosa lingua", destaca o presidente Baltar.

A súa prolífica obra abrangue un total de 45 títulos de poesía, narrativa e teatro, "tendo sempre como orixe e meta o público infantil e xuvenil, ao cal dedicou a súa altura intelectual e docente, polo cal, neste sinalada efeméride, os 100 anos do seu nacemento, a Deputación de Ourense quere honrar a súa memoria", afirma Manuel Baltar.

O goberno provincial está a planificar as diferentes actividades que se levarán a cabo para destacar o legado persoal e intelectual de Pura Vázquez, entre conferencias, actos de homenaxe e xornadas que analizarán en detalle os aspectos académicos, pedagóxicos e culturais da escritora ourensá.

Carmen Purificación Vázquez Iglesias, Pura Vázquez, naceu o 31 de marzo de 1918 e faleceu o 25 de xullo de 2006. Ela e a súa irmá, Dora, mestras ambas, foron pioneiras da literatura infantil e xuvenil, feito que a Deputación de Ourense recoñece desde fai dezaseis anos co premio que leva o nome das escritoras. A súa labor docente e literaria, brindándolle aos seus alumnos textos de poesía, narrativa e teatro, foi recollida en libros tan significativos como Rondas de Norte a Sur, poesía infantil (1968); Versos para nenos da aldea (1963), Monicreques (1974), e Teatro completo para nenos (2000).

Admirada por Cabanillas, Cela, Carmen Conde, Gerardo Diego, Celso Emilio Ferreiro ou Fernández del Riego, entre outros autores, Pura Vázquez foi nomeada académica correspondente da Real Academia Galega en 1949, a solicitude de Otero Pedrayo e outros intelectuais ourensáns. Desde moi nova publica os seus textos na prensa galega, sendo os primeiros no diario La Zarpa, que dirixía Basilio Álvarez. En 1943 publica o seu primeiro libro, Peregrino de amor, hoxe perdido, no que combinaba poemas en galego e castelán. Posteriormente, en 1944, a Deputación de Ourense publícalle a obra Márgenes veladas, o seu primeiro libro en castelán, e tamén será a institución provincial a que lle edite o seu derradeiro traballo, en 2004, Todo vén de esa luz, libro compartido coa súa irmá, Dora.

A Deputación exporá a súa experiencia de éxito como provincia especializada en deporte acuático, nas xornadas sobre encoros, economía e territorio

  • Manuel Baltar analizou con directivos da Federación de asociacións de concellos con encoros as potencialidades e as repercusións económicas que a actividade hidroeléctrica supón para os concellos.

Ourense, 20 de abril de 2018.- O presidente da Deputación de Ourense, Manuel Baltar, acompañado polo vicepresidente da institución provincial, Rosendo Fernández, reuniuse no Pazo Provincial co secretario xeral e o coordinador da Federación nacional de asociacións e municipios con centrais hidroeléctricas e encoros, José María Agullana e Francisco Gómez, para analizar as potencialidades dos encoros e as repercusións económicas que a actividade hidroeléctrica supón para os concellos.

A provincia de Ourense conta con 43 concellos afectados por presas e encoros, dos cales 19 teñen centrais hidroeléctricas, sendo 23 o total de presas e encoros existentes na provincia. Para debater sobre a importancia do retorno económico que esta actividade hidroeléctrica ten para os concellos, Manuel Baltar confirmou que a Deputación de Ourense participará nas Primeiras xornadas técnicas sobre esta temática, que se desenvolverán en Badaxoz en xuño próximo, sendo o tema central do debate: "O encoro como motor económico do territorio".

Manuel Baltar, que é vicepresidente da Federación de asociacións de concellos con encoros, afirma que unha parte dos beneficios económicos que xeran as empresas hidroeléctricas "teñen que reverter nos concellos e, polo tanto, nos veciños dos municipios, para que esas achegas económicas se convertan en mellora de servizos e infraestruturas". Precisamente, o presidente provincial dixo que a Federación nacional de municipios con encoros "traballa nesa liña de cooperación para que os concellos poidan negociar mellor as condicións, co obxectivo de que se recoñezan os dereitos que teñen por acoller nos seus territorios este tipo de infraestruturas hidráulicas".

Na xuntanza acordaron que a Deputación de Ourense participará nestas xornadas con relatorios técnicos, expoñendo as experiencias existentes ao respecto na provincia de Ourense, entre as que Manuel Baltar destacou a aposta do goberno provincial polo deporte náutico, aproveitando a idoneidade das augas da provincia de Ourense para practicar disciplinas deportivas como o remo ou o piragüismo, e salientou ao Cerlac, o Centro de Adestramento de Remo e Piragüismo situado en Laias, como "un referente para equipos e seleccións internacionais destas disciplinas deportivas, instalacións polas que pasaron xa as seleccións de España, Australia, Holanda, Bielorrusia, Ucraína, e equipos que virán, como México, China ou Francia, para realizar aquí os seus períodos preparatorios".

O obxectivo das xornadas técnicas de Badaxoz é impulsar as políticas sociais e económicas dos territorios rurais que se atopan arredor dos embalses, aproveitando a existencia destes para impulsar políticas de desenvolvemento, tanto na área lúdica e deportiva como no ámbito turístico ou gastronómico. O programa das xornadas incluirá tamén experiencias e workshops entre empresas dedicadas ao turismo rural e a deportes de aventura, así como debates sobre a lexislación ambiental das diferentes comunidades autónomas e a necesidade de harmonizar a mesma.

Pablo Pérez: "A reforma das instalacións deportivas de Carrís demostra o grao de compromiso da Deputación con Barbadás"

  • O deputado de Cooperación visitou hoxe os campos de fútbol municipais neste concello.

Ourense, 20 de abril de 2018.- "Manuel Baltar comprometeuse coa reforma das instalacións deportivas e os 200.000 euros que a Deputación destinará a esta obra demostran o grao de cumprimento deses compromisos co Concello de Barbadás por parte do presidente da institución provincial". Así se expresou o deputado de Cooperación, Pablo Pérez, quen acompañado pola deputada provincial de Infraestruturas e portavoz do PP de Barbadás, Consuelo Vispo, visitou esta mañá os campos de fútbol dos Carrís, nos que, grazas á modificación de crédito prevista polo grupo de goberno da Deputación, procederase á reforma destes campos. Unha visita na que tamén estivo presente o concelleiro de Deportes de Barbadás, Adrián Varela.

Pablo Pérez afirmou que fronte ás críticas da oposición sobre o reparto dos fondos da Deputación procedentes do remanente de tesourería, "Baltar responde con altura de miras política para cooperar nun proxecto que vai beneficiar a un concello que precisa das mellores instalacións deportivas, xa que alí adestran preto de 300 rapaces dunha vintena de equipos de fútbol, unha das Escolas Deportivas máis numerosas da provincia e onde tamén xoga un dos clubs máis representativos do fútbol ourensán", sinalou Pablo Pérez referíndose á Unión Deportiva Barbadás, cuxo presidente Jose Manuel Fernández tamén estaba presente na visita.

O deputado de Cooperación lembrou que esta modificación de crédito hai que agradecerlla ao grupo popular no Concello de Barbadás, "que realizou as xestións necesarias diante do presidente da Deputación para conseguir o apoio económico, a petición do propio alcalde, logo de votar en contra en dúas ocasións á senllas propostas do PP neste sentido, o que resulta absolutamente incomprensible". A deputada provincial de infraestruturas e portavoz do PP de Barbadás, Consuelo Vispo, ratificou as palabras de Pablo Pérez, afirmando que este proxecto "é un compromiso do goberno provincial cos veciños de Barbadás".

A reforma das instalacións deportivas dos Carrís permitirán renovar o céspede do campo de fútbol once e dotar de herba artificial o campo de terra no que adestran os rapaces máis cativos, ademais de realizar obras de acondicionamento nun dos muros do edificio para evitar humidades no interior dos vestiarios.