O Consello Termal Ourensán analiza as liñas básicas do proxecto de lei de augas termais

  • O acto, celebrado no salón de plenos da Deputación de Ourense, contou coa participación do vicepresidente da institución provincial, Rosendo Fernández; o conselleiro de Economía, Francisco Conde, e o director técnico do plan "Ourense, a provincia termal", Mario Crecente.

Ourense, 24 de setembro de 2019.- O Consello Termal Ourensán, o órgano que ten a función de velar polo cumprimento do plan "Ourense, a provincia termal", celebrou hoxe no salón de plenos do Pazo Provincial de Ourense unha reunión para coñecer as liñas básicas do proxecto de lei de augas termais con fins lúdicos, que expuxo o conselleiro de Economía, Emprego e Industria da Xunta de Galicia, Francisco Conde. O acto contou, ademais dos integrantes do Consello, co vicepresidente da Deputación de Ourense, Rosendo Fernández, e Mario Crecente, director técnico do Plan "Ourense, a provincia termal", unha iniciativa promovida pola Deputación de Ourense, que desenvolven conxuntamente o goberno provincial e a Xunta de Galicia.

Trala benvida por parte de Rosendo Fernández, o titular de Economía do goberno autonómico reivindicou "a necesidade de protexer o patrimonio termal galego apoiándose na colaboración, no entendemento e na innovación como eixos sobre os que vertebrar o futuro do sector". Conde chamou á necesidade dun traballo conxunto entre os principais actores do sector, incluíndo ao Consello Termal Ourensán, que integra a representantes dos balnearios e dos ámbitos institucional, académico e empresarial.

Francisco Conde destacou o proxecto de lei de aproveitamento lúdico de augas termais aprobado polo Consello da Xunta o pasado 1 de agosto, un proxecto que converte a Galicia en pioneira na regulación desta materia e que vela por garantir a hixiene e a salubridade dos aproveitamentos turísticos de augas termais, blindando a súa sustentabilidade medioambiental, protexendo a integridade patrimonial do entorno e promocionando o desenvolvemento económico e social dos concellos termais. Os obxectivos desta regulación permitirán completar o mapa termal galego, ofrecendo novas oportunidades para atraer un maior volume de turistas, desenvolvendo o medio rural e creando novos postos de traballo.

Deste xeito, este proxecto -consensuado cos principais representantes do sector- complementa a lexislación xa existente para balnearios terapéuticos, diferenciando entre espazos termais pensados con perspectiva lúdica e establecementos balnearios, suxeitos á normativa vixente, sumando con esta medida maior seguridade xurídica e técnica ao sector e ofrecendo un réxime de inspección sanitaria que salvagarde o cumprimento da lei. "Con esta lei, os usuarios terán a garantía absoluta da calidade das augas por parte dos establecementos", matizou Conde.

Debido ao seu patrimonio termal, Galicia é a maior potencia nacional deste campo e unha das principais representantes do termalismo europeo, contando con 300 captacións de augas mineromedicinais, 21 balnearios (7 deles con distintivo Q de Calidade Turística) e 3 centros de talasoterapia. Un sector que conta con 3.000 prazas hostaleiras, situando á cabeza de España, con preto de 150.000 usuarios que reportan unha facturación de 60 millóns de euros e que mobilizan o emprego directo ou indirecto de 1.400 postos de traballo no eido.

Esta situación é particularmente significativa na provincia de Ourense, que aglutina 7 balnearios de grande relevancia (o 35% de Galicia), incluíndo o triángulo formado por Ourense, O Carballiño e O Ribeiro, e que converten á capital ourensá na segunda cidade europea, por detrás de Budapest, con maiores reservas de augas mineromedicinais.

Pola súa banda, Mario Crecente salientou entre as accións que se teñen desenvolvido dentro o plan "Ourense, a provincia termal" os programas de termalismo social e o proxecto "Raia termal", e no que atinxe ás infraestruturas termais destacou as obras xa rematadas como os balnearios de Cortegada e Caldas de Partovia, e outras en trámite en Punxín, Prexigueiro ou Laias, e temas como a viñoterapia, en Leiro, e as eco-caldas de Lobios. Crecente salientou tamén como outras accións do plan a sinalización das vilas termais, o acceso ao parque industrial de Cabreiroá, a área de caravanas de Cenlle, e o albergue de peregrinos de Ourense, e referiuse aos parques acuáticos de Ourense, sobre os que se avanzan dúas opcións: un na contorna de Untes, que podería converterse no primeiro parque acuático de auga termal, e a outra solución pensada na contorna de Monterrei, próximo á cidade de Ourense.