Manuel Baltar pon a Aceites Abril como exemplo "da calidade e innovación ourensá"

 

  • O presidente da Deputación visitou, acompañado por José Manuel Pérez Canal e directivos e técnicos da empresa, esta compañía agroalimentaria, unha das cinco máis importantes de España no sector, que exporta a máis de 30 países.

  • Baltar cualificou á compañía como "modelo de emprendemento e progreso empresarial, que lidera desde Ourense un ámbito do mercado agroalimentario como o dos aceites, no que destaca a seguridade alimentaria e a protección do medio ambiente".

Ourense, 28 de xaneiro de 2018.- O presidente da Deputación de Ourense, Manuel Baltar, puxo como exemplo de "calidade e innovación ourensá" á empresa agroalimentaria Aceites Abril, na visita que realizou á súas instalacións, destacando que esta firma, que conta con máis de cincuenta anos de historia "caracterízase polo seu respecto ao medio ambiente, a constante innovación e a procura en todas as súas liñas de produción, envasado, embalaxe, loxística e xestión, por unha constante evolución e innovación tecnolóxica".

O presidente do goberno provincial percorreu as instalacións de Aceites Abril -situadas no polígono industrial de San Cibrao das Viñas- acompañado polo conselleiro delegado da empresa, José Manuel Pérez Canal, e por directivos e técnicos da compañía, para coñecer o proceso de produción e distribución dos diferentes aceites que a firma comercializa en máis de trinta países dos mundo, con presenza nos cinco continentes, exportando China, Xapón, Rusia, Estados Unidos, a Unión Europea, Venezuela, Irán, Filipinas, Angola ou Australia.

"Aceites Abril é un modelo de emprendemento e progreso empresarial que lidera desde Ourense un ámbito do mercado agroalimentario como o dos aceites –destacou Manuel Baltar-, un sector en constante evolución e onde a seguridade alimentaria e a protección do medio ambiente fan que sexa un reto aínda máis difícil acadar altas cotas de éxito nacional e internacional como o que Aceites Abril demostrou ao longo da súa traxectoria e sigue facendo hoxe en día".

José Mánuel Pérez Canal agradeceu a súa visita ao presidente da Deputación de Ourense e tamén "o labor de apoio ás políticas de internacionalización que leva a cabo o goberno provincial en colaboración coa Confederación Empresarial de Ourense, con iniciativas como o Plan ExportOU".

Pérez Canal asumiu no seu día a dirección da empresa fundada polo seu pai, Manuel Pérez Delgado, en 1962. Desde entón Aceite Abril comezou unha traxectoria que a converten en referente no ámbito dos aceites, sendo unha das cinco compañías máis importantes deste sector en España. Actualmente conta con máis de 100 empregados.

A empresa comercializa aceites vexetais das variedades: oliva e oliva virxe extra, ecolóxicos, monovarietais, aceite de oruxo de oliva, xirasol, sementes e especiais para freír, envasados y a granel. As súas instalacións abranguen tres naves industriais cunha superficie de 9.500 m2, 37 tanques de almacenamento de 992 toneladas e unha capacidade de envasado de 540.000 litros/día, grazas ás nove liñas de envasado. Ademais abarca por completo o proceso de produción e conta con maquinaria propia de soprado de plástico para botellas.

Asemade, a compañía dispón dunha planta de refinadora de aceite con 20 tanques, con capacidade de almacenaxe de 8.000 toneladas e unha produción de 400 Tn/día, así como dun centro loxístico en Vilagarcía de Arousa con 5 tanques de almacenamento, cunha capacidade de 4.425 toneladas.

Entre as innovacións de Aceites Abril destaca o seu aceite virxe extra 100 % galego, un dos proxectos estratéxico da empresa, baseado na recuperación do olivar galego para a produción de aceites de primeira calidade, das variedades arbequina e picual, un produto con matices de mazá verde, herba fresca e améndoa.