Ángela Fernández Rey gaña o X Premio Pura e Dora Vázquez de Narración coa obra "Por que está triste Miañas?"

O xurado deu a coñecer hoxe o fallo na Deputación de Ourense, destacando da obra que transmite entre os nenos o sentido da amizade, o compañeirismo e a solidariedade. Dende hoxe queda convocado o "X Premio Pura e Dora Vázquez de Ilustración", cuxos traballos deberán basearse no texto literario gañador.

A obra "Por que está triste Miañas?", da escritora ourensá Ángela Fernández Rey, foi elixida por unanimidade polo xurado como gañadora da X edición do "Premio Pura e Dora Vázquez de Narración", dotado con 1.500 euros, que convoca a Deputación de Ourense. O xurado deu a coñecer o fallo hoxe trala reunión mantida no Centro Cultural "Marcos Valcárcel" da Deputación de Ourense, destacando da obra premiada "o feito de que fomenta e transmite o sentido do compañeirismo, a amizade e a solidariedade entre os nenos", e subliñando tamén "o áxil ritmo narrativo e cunha linguaxe perfectamente acaída para o público infantil".

O xurado destaca asemade a orixinalidade do enfoque narrador da obra, que radica en que transmite a través dos animais os valores máis destacados do ser humano. Sinala tamén o xurado que esta obra de Fernández Rey "sirve para poñer en valor o fomento da literatura dirixida aos máis novos e o xénero literario da fábula", e "permitirá acadar un perfecto equilibro entre narración e ilustración", pois este é un galardón que premia estas dúas facetas creativas: a literaria e a artística.

Tamén destaca da obra o rápido ritmo narrativo da historia, que "atrapa" ao lector de principio a fin, cuns diálogos moi ben conseguidos.

Para Ángela Fernández Rey este é o seu primeiro premio literario. Segundo a normativa do premio, a obra gañadora será enviada aos interesados en participar no "X Premio Pura e Dora Vázquez de Ilustración", para o cal a Deputación de Ourense abre a convocatoria dende hoxe. A esta modalidade de ilustración poderán concorrer os ilustradores que presenten os seus traballos, inéditos e orixinais -non menos de dez ilustracións-, tomando como base o texto premiado de Ángela Fernández Rey. Nesta modalidade establécese un premio de 1.500 euros, e a data límite para presentar os traballos é o 20 de decembro de 2012.

O xurado do "X Premio Pura e Dora Vázquez de Narración" estivo presidido por Avelino García Ferradal, deputado de Cultura da Deputación de Ourense, e integrado por José Manuel Fernández López, José Antonio Santos Guede, Isabel Almuiña González e Celia Díaz Núñez (gañadora da edición 2011), actuando como secretario Fernando R. Méndez, responsable de Comunicación da Deputación de Ourense.